Read Tontemboan Yohanes 18 Bible Online

Yohanes 18 - Tontemboan bible

Yohanes 18

¹Kekawusai i Yesus sumombayang, Sia wo sé murit-Na mangé an lewet in doyongan Kidron. Am bitu awéan esa taman, si Yesus wo sé murit-Na mai an taman itu.

²Si Yudas, si tou eng kumianat si Yesus, makailek ka'i in tampa itu, ampa'paan si Yesus wo sé murit-Na makakeli-keli mali'us am bitu.

³Wo si Yudas mai an tampa itu ang karapi é sangareru' suraro wo sé mengatéir im Balé Le'nas sé airu'du é kikiiten é imam wo sé tou Farisi. Séra mai maali-ali in lantérna, obor wo lulutaw.

⁴Kailekano i Yesus pakasa sé mamuali oka an owak-Na, ampa'paan in ituo Sia rumior angé wo sumusut iséra. Wuéien-Na, “Si séi réén si paéré-érén iow?”

⁵Wo isowat éra a si Yesus, “Si Yesus a Nazaret owo.” Icua i Yesus ai séra “Yakuo Sia.” Si Yudas si cumianat si Yesus, makatulung ka'i am bitu ang karapi éra.

⁶An tutuw i Yesus icumua ai séra, “Yakuo Sia,” séra im baya aicaundur wo care'ba an tana'.

⁷Wo wuéien-Na sumawel ai séra, “Si séi réén si paéré-érén iow?” Wo isowat éra, “Si Yesus a Nazaret owo.”

⁸Icua i Yesus ai séra, “Aicua-Kuo ai camu, Yakuo Sia. Sa Yaku si paéré-érén iow, iwayao mio' sé murit-Ku anio' mangé.”

⁹Icua-Na in taniitu, akar malekepo sapa sé aicua-Nao. Tana'i sé aicua-Nao itu, “Pakasa sé tou sé aiwééo i Amang a Yaku, ra'ica wana mandé esake' tou en catala.”

¹⁰An tutuw itu si Simon Petrus maali-ali sa'bel, kémbutenna en sa'bel wo parakenna en lunteng kakan i esa ata i imam wangko' akar imapokol. E ngaran i ata itu Malkus.

¹¹ Taan icua i Yesus a si Petrus, “Iwaléo mio' sumawel en sa'belmu itu. Aitantuo i Amang-Ku wosama' sangkumen-Ku eng kawenduan.[18] Tioo pakala-kalaanmu Aku mendam ing kawenduan itu.”

¹²Kumawus in itu, si kikiiten é suraro Romawi wo sé suraro wo ka'i sé mengatéir im Balé Le'nas sé iparu'du' é kikiiten é agama Yahudi, tumangka' si Yesus wo wa'kesen éra.

¹³Iwali éra Sia kataré-taré a si Hanas, ampa'paan sia itu émpo i Kayafas si asi ta'un itu imamuali imam wangko'.

¹⁴ Si Kayafas anioo en sumangkumo sumina'u sé kikiiten é tou Yahudi tanu si anio', “Lébé loor esake' tou e maté wotaré pakasa sé tou Yahudi pakapaté-patén.”

¹⁵Si Simon Petrus wo si esa murit walina ka'i mengii-ngiit an somoi i Yesus. Si murit walina anio' makatuus si imam wangko', anaé sia muntep mewali-wali wo si Yesus ang kintal im balé i imam wangko' itu.

¹⁶Taan si Petrus mento'ke' ang kesot an diit im papalen im pager. Wo si esa murit walina si makatuus si imam wangko' itu kumesot sumawel wo mepaar ang karapi i esa wéwéné si mengatéir im papalen pauntepan wo iwalina si Petrus muntep ang kintal im balé.

¹⁷Icua i ata wéwéné si mengatéir im papalen itu a si Petrus, “Ra'ica réén ico ka'i esaan asé murit i Tou itu?” Wo isowat i Petrus ai sia, “Ra'ica yaku!”

¹⁸Asi wengi itu uting keli. Sé ata am balé itu wo sé tou sé mengatéir im Balé Le'nas, rumicet api am baa owo, wo séra tumulung an duru in api e nguméngé in owak. Wo si Petrus ka'i tumulung am bitu mewali-wali wo iséra e nguméngé in owak.

¹⁹Wo tumo'tolo si imam wangko'[19] mamuéi a si Yesus andumoro' é murit-Na wo ka'i andumoro' in sususuien-Na.

²⁰Isowat i Yesus ai sia, “Ang karapi ra'ica ipaene-enep ipemaa-maar-Ku a sé tou keli ang kayo'baan. Wo ipenusu-nusui-Ku am balé-walé paapo'an é agama Yahudi wo am Balé Le'nas, am pali'usan é tou Yahudi. Ra'ica wana en ayenep-Ku.

²¹Kéitu réén wuéienmu en itu a Yaku? Wuéieno mangé a sé tou sé ilumingao in sususuien-Ku. Tantu, kailekano éra sapa sé aipasusui-Ku itu.”

²²Kekawus i Yesus icumua in taniitu, awéan si esa tou matéir im Balé Le'nas makatulung am bitu sumepé' in amo i Yesus. Icuana, “Taniitu réén em ipakasowat-Mu a si imam wangko'?”

²³Isowat i Yesus ai sia, “Sa suméa' en aicua-Ku itu, icuao mai sapa eng kaséaan-Ku itu. Taan sa en aicua-Ku itu wutul kéitu réén ko sumepé' Yaku?”

²⁴Kumawus in itu, iru'du' i Hanas sé tou e makawali si Yesus a si imam wangko' Kayafas. An tutuw itu eng kama-Na pakawa'kesené'.

²⁵An tutuw itu, si Simon Petrus makatulungé' mangéngé in owak an duru in api, wo icua é tou am bitu ai sia, “Raica réén ico ka'i esaan tou murit i Yesus?”

²⁶Isangkal i Petrus, icuana, “Ra'ica yaku.” Am bitu awéan ka'i si esa ata i imam wangko', sia itu poow i ata en luntengna pinarak i Petrus. Icuana, “Ico si tarépé' kinaséréanku an taman mewali-wali wo si Yesus?”

²⁷Taan sinangkalke' i Petrus wo asi témpo ituke' tumarépé'anke'mai kumukuko mai si co'ko'.

²⁸Asi Woondona mai imamoondopé' keli, iwali éra si Yesus am balé owo i Kayafas, wo mangé an istana i gubernur Romawi. Taan sé kikiiten é tou Yahudi itu ra'ica mekiit muntep an untep in istana itu ampa'paan paweroten é tou Yahudi najis em balé é tou ra'ica Yahudi. Ra'ica kiim éra numajis in owak éra, ampa'paan asi endo itu séra musti kuman ing kakanen Paska.

²⁹Ampa'paan in ituo si gubernur Pilatus kumesot wo meta'up wo iséra. Sia mamuéi, “Sapa réén en aitudu miow a si Tou anio'?”

³⁰Isowat éra ai sia, “Sa Sia ra'ica tou léwo', ra'ica woo isarakan ami Sia a si tuang.”

³¹Icua i Pilatus ai séra, “Iwalio Sia icesot, wo akimeno mangé Sia iciit in atoran iow.” Icua é kikiiten é tou Yahudi, “Ra'ica toro kami mukum si esaan tou em patén.”

³² Aicua éra in taniitu wosama' lekepen en aicua i Yesus sa tumambisa Sia maté.

³³Wo si Pilatus muntep sumawel an untep in istana gubernur, wo towanna si Yesus wo wuéienna, “Icoo réén si colano é tou Yahudi?”

³⁴Isowat i Yesus, “Em binuéimu itu an atému owo in esa, kuma'pa awéan tou walina en icumua ai co andumoro' Yaku?”

³⁵Wo icua i Pilatus, “Tou Yahudi réén aku? Sé tou-Mu in esa wo sé kii-kiiten é imam en sumarakano Ico a yaku. Sapao réén e niéma'-Mu?”

³⁶Isowat i Yesus, “Eng Kakolanoan-Ku ra'ica asi cayo'baan anio'. Sa eng Kakolanoan-Ku asi cayo'baan anio', tantu sé makiit Yaku sumundur oka wosama' Aku ra'ica isarakan a sé tou Yahudi. Taan eng Kakolanoan-Ku ra'ica asi cayo'baan anio' owo.”

³⁷Wo icua i Pilatus ai Sia, “Anaé, kolano réén Ko?” Isowat i Yesus, “Ico en icumua sapaoka Yakuo si colano. Yaku aitou wo mai ang kayo'baan eng kumua in sususuien wutul andumoro' i Amang Kasuruan. Si séike' sé masalé' luminga in sususuien wutul andumoro' i Amang Kasuruan, tantu pengalinganna sé ipakua-Ku.”

³⁸Icua i Pilatus ai Sia, “Sapa réén en sususuien wutul itu?” Kekawus i Pilatus kumua in taniitu, sia kumesot sumawel an istana wo icuana a sé tou Yahudi am bitu, “Ra'ica wana eng kaséaan kinéréanku asi Tou itu.

³⁹Taan iciit ing kanaramen iow, pengawekarku esa tou susur in endo wangko' Paska. Intarépé' icasalé' réén iow sa iwekarku si Colano miow tou Yahudi anio'?”

⁴⁰Wo ayangko' érake', “Tioo si Tou itu! Iwekaro si Barabas!” Si Barabas itu tou mengarampok.