Read Tontemboan Yohanes 20 Bible Online

Yohanes 20 - Tontemboan bible

Yohanes 20

¹Asi endo kataré asi duminggu itu, imamoondopé' keli wo ruméimbengé', si Maria Magdalena mangé ang kinuburan i Yesus. Séréna em batu aipénet ang kubur itu miléio.

²Wo sia tuméron mangé meta'up wo si Simon Petrus wo si murit walina si caupus i Yesus, wo icuana ai séra, “Si Tuang niindoo é tou ang kubur, ra'ica kailekan ami Sia aiweta' am bisa.”

³Si Petrus wo si murit walina itu mangé ang kubur.

⁴Séra in dua tuméron mewali-wali, taan si murit walina itu en tatéron wo si Petrus, akar sia en dior icateka' ang kubur.

⁵Sia asalo icumuru wo suméré in an untep ing kubur itu wo sérénna eng kaéng lénen an tana'o. Taan sia ra'ica imuntep an untep.

⁶Wo mai si Simon Petrus, si aitela'u i murit walina itu. Si Petrus muntep ang kubur, sérénna ka'i eng kaéng lénen itu an tana'o,

⁷wo eng kaéng si aisaput an do'kos i Yesus ra'io an tembir ing kaéng lénen itu, taan linepeto wo aicaérao an tampa walina.

⁸Wo muntepo ka'i si murit en diorai icateka' ang kubur itu, sinéréna waya wo pinercayana sapaoka si Yesus tinouo sumawel.

⁹Ampa'paan akar asi oras itu ka'i ra'ipé' kaangéan éra sapa en aipatic ang Kitap Le'nas sapaoka si Yesus musti tumou sumawel an uner é tou imaté.

¹⁰Kumawus in itu, sé rua murit itu maréng angé am balé.

¹¹Si Maria Magdalena makatulungke' ang kesot ing kubur wo mengamé-ngamé'. Ang karapi i mengamé-ngamé' sia kumuru wo suméré in an untep ing kubur.

¹²Sérénna awéan rua malaékat sé mekarai ing kulo', makalukut asi tampa winetaan owo i mayat i Yesus. Si esa an duru in do'kos wo si esa an duru ing kécéi.

¹³Wo wuéien é malaékat itu ai sia, “Inang, kéitu réén ko maamé'?” Isowat i Maria, “Si Tuangku niindoo é tou, wo ra'ica kailekanku am bisa em binetaan éra Sia.”

¹⁴Kekawusna icumua in taniitu, sia maréng in somoi, sérénna si Yesus makatulung am bitu, taan ra'ipé' kailekanna Sia itu si Yesus.

¹⁵Wo icua i Yesus a si Maria, “Inang, kéitu réén ko maamé'? Si séi réén em paéré-érénmu?” Paweroten i Maria si tou itu mengatéir in taman, wo icua i Maria, “Tuang, sa si tuang e mindo i mayat-Na, icuao mai a yaku am bisa winetaanmu Sia, wosama' Sia ro'na indonku.”

¹⁶Wo icua i Yesus ai sia, “Maria!” Wo si Maria ka'i maréng in somoi wo rumoma' a nunuwu' Ibrani, “Rabuni!”, eng kaangéanna, ‘Guru’.

¹⁷Icua i Yesus ai sia, “Tioo timboienmu en owak-Ku, ampa'paan Aku ra'ipé' imangé a si Amang-Ku. Taan mangéo taré ko a sé poo-poow-Ku, wo icuao mangé ai séra sapaoka intarépé' Aku maangém a si Amang-Ku wo ka'i Amangmu, siituo si Amang Kasuruan-Ku wo ka'i Amang Kasuruanmu.”

¹⁸Kumawus in itu si Maria Magdalena mangé a sé murit i Yesus, wo icuana ai séra, “Sinérékuo si Tuang!” Wo isisilna waya ai séra sapa sé aicuao i Yesus ai sia.

¹⁹Asi ari duminggu itu ka'i an tutuw imawengio, sé murit i Yesus mali'us an esa walé. Wo kusiin éra waya em papalen ampa'paan icaindé' éra sé kikiiten é tou Yahudi. Tumarépé'anke' mai si Yesus tumulung an uner éra wo icua-Na, “Eng kaeluran mewali-wali wo icamu.”

²⁰Kekawus-Na kumua in taniitu, ituru'-Na ai séra eng kama wo em petic-Na. Sé murit-Na arui an tutuw éra suméré si Apo' Yesus.

²¹ Wo icua-Na sumawel ai séra, “Eng kaeluran mewali-wali wo icamu! Yaku ayutuso mai i Amang-Ku ang kayo'baan, taniituo ka'i camu, yutus-Ku mangé am bisa-wisa ang kayo'baan anio'.”

²²Kekawus-Na kumua in taniitu, sengon-Na séra im baya ang karapi ing kumua, “Terimano mangé e Roh Le'nas.

²³ Sa ampungan iow eng kamesé-meséaan é tou, eng kamesé-meséaanna niampungano. Wo sa ra'ica ampungan iow eng kamesé-meséaan é tou, eng kamesé-meséaanna ra'ica niampungan.”

²⁴Si Tomas si pengatuulen Didimus esaan asé sangapulu' rua murit i Yesus. An tutuw i Yesus mai mapaturu' in owak a sé murit-Na itu, si Tomas ra'ica mewali-wali wo iséra.

²⁵Wo icua é murit itu a si Tomas, “Sinéréo ami si Tuang!” Taan icua i Tomas ai séra, “Sa ra'ipé' sinéréku eng kalat pinakuan am palara ing kama-Na, wo ra'ipé' aitopokku en tuturu'ku ang kalat im pinakuan itu, wo ra'ipé' aitopokku en tuturu'ku am petic-Na, wutu-wutul ra'ipé' percayanku.”

²⁶Kekawus i walu ngando, mali'us ka'i sumawel sé murit Yesus am balé itu, wo si Tomas mewali-walio wo iséra. Mandé ka'i pakasa em papalen kinusi', tumarépé'anke' si Yesus mai wo tumulung an uner éra. Icua-Na, “Eng kaeluran mewali-wali wo icamu!”

²⁷Wo icua-Na a si Tomas, “Iweta'o mai en tuturu'mu am bia'i wo séréno mai eng kama-Ku. Yuluro mai eng kamamu wo itopoko mai am petic-Ku. Tioo ka'i ko ra'ica mercaya, taan percayano mai!”

²⁸Wo icua i Tomas, “Icoo si Tuangku wo ka'i Amang Kasuruanku!”

²⁹Wo icua i Yesus ai sia, “Ampa'paan Aku sinérémuo, akar ko mercaya. Kinamango sé tou ra'ica suméré taan mercaya.”

³⁰Wutul keliané' sé tuu-tuus kakaya'kaan walina si niéma' i Yesus an dior é murit-Na, sé ra'ica aipatic asi kitap anio'.

³¹Taan pakasa sé aipatico asi kitap anio', en itu aipatic wosama' percayan iow si Yesus ituo si Mesias wo Toyaang i Amang Kasuruan, wosama' percayan iow Sia wo kéréan iow eng katouan akar ing kauré-uré.