Read Tontemboan Yohanes 6 Bible Online

Yohanes 6 - Tontemboan bible

Yohanes 6

¹Kumawus in itu, si Yesus mangé an lewet in lour Galilea si pengatuulen ka'i lour Tiberias.

²Am bisa-wisake' en angéan-Na keli sé tou mengi-ngiit Sia, ampa'paan sinéréo éra eng kakaya'kaan sé niéma'-Na a sé tou sumakit akar séra imasama'o.

³Wo si Yesus mewali-wali wo sé murit-Na sumosor angé asi esa tolaina, wo séra lumukut am bitu.

⁴An tutuw itu matawio in endo wangko' Paska é tou Yahudi.

⁵An tutuw i Yesus suméré an li'cir-Na, sérén-Na kakeli tou meréro-rérot maai ai Sia. Wo icua-Na a si Filipus, “Am bisa réén e ro'na telesanta ing kakanen, wosama' awéan e ro'na kanen é tou keli anio'?”

⁶Mandé ka'i kailekano i Yesus sapa en émaan-Na oka, taan Sia kumua in taniitu ampa'paan icasalé'-Na ujin si Filipus sa sia wutu-wutul maéman ai Sia.

⁷Isowat i Filipus a si Yesus, “Mandé ka'i telesta roti makawééna in dua ngaatus dinar[7] wo iwéténgta a si esa wo si esa mandé mekélé teké'ke', sé walina ra'ica kawéténgan.”

⁸Awéan esa asé murit i Yesus, makangaran Andreas, sia itu tuari i Simon Petrus. Icuana in tana'i a si Yesus,

⁹“Am bia'i awéan toyaang tuama makaanu lima ngapokol roti wo rua sera'. Taan pakasa en itu ra'ica wana en torona a sé tou sé taniitu eng kakeli anio'.”

¹⁰Icua i Yesus, “Ru'du'o mio' sé tou itu lumukut.” An tampa itu ka'i kelian rukut, anaé sé tou keli itu lumukut am bawo in dukut. Eng kakeli éra itu wona' lima ngariwu tuama, ra'ipé' aicarékén sé wéwéné wo sé toyaang.

¹¹Wo indon i Yesus e roti itu, wo Sia kumua i makapulu'sama' a si Amang Kasuruan wo yéké-éké-Na ai séra sé makalukut. Taniitu ka'i e niéma'-Na a sé sera' itu. Wo séra kuman akar imawesu.

¹²An tutuw éra im baya imawesuo, icua i Yesus a sé murit-Na, “Umungeno mio' sé kakanen matela'u wosama' ra'ica wana en catiya'.”

¹³Wo umungen éra sé tela-tela'u asé tine'bi-te'bi' an lima ngapokol roti itu wo pumpun éra am bantang. Eng kakelina sangapulu' rua wantang.

¹⁴An tutuw é tou itu isuméré in tuus kakaya'kaan niéma' i Yesus, icua éra, “Sia anio' wutu-wutul Nabi i Amang Kasuruan si aijanjio maai ang kayo'baan anio'!”

¹⁵Kailekan i Yesus sapaoka Sia leséén éra e mamuali kolano éra, akar Sia in esa mangé sumingkir an tolaina.

¹⁶An tutuw tumo'tolo mawengi, sé murit i Yesus maio'pé' an lour.

¹⁷Asi témpo itu wengio wo si Yesus ra'ipé' ka'i mai meta'up wo iséra. Wo séra sumaké an londéi, lumewet in lour maangé ang Kapernaum.

¹⁸An tutuw itu en lour tumo'tolo masempa' ampa'paan en deges repet.

¹⁹An tutuw éra madayung in londéi wona' limao kuma'pa enemo kilometer eng katayangna, sérén éra si Yesus mawaya' am bawo in dano maruru mai in londéi éra. Séra maindé'.

²⁰Taan icua i Yesus ai séra, “Si anioo Aku, tioo maindé'!”

²¹Kelinga in suara-Na séra arui keli wo sungkulen éra Sia sumaké an londéi. Wo ra'ipé' uré Sia sumaké an londéi asi témpo itu ka'i en londéi éra icateka'o am paangéan éra.

²²Asi woondona mai, kelian tou makaento'pé' an lewet in lour mangéré si Yesus. Pinangéré éra Sia ampa'paan kailekan éra kaawii awéan esa londéi an tembir in lour sinakéan é murit i Yesus, taan Sia in esa ra'ica isumaké asi londéi itu.

²³Ang karoro'an in itu awéan londé-londéi sé mai ang kota Tiberias owo wo sumuwa' an diit in tampa kinanan i roti é tou keli, kekawus i Apo' Yesus kumua i makapulu'sama'.

²⁴Anaé, ampa'paan sinéréo é tou keli si Yesus wo sé murit-Na ra'ica am bitu, sé tou keli itu sumaké an londé-londéi sé mai ang kota Tiberias owo wo mangé ang Kapernaum e mangéré si Yesus.

²⁵An tutuw é tou keli icateka' ang Kapernaum, séra meta'up wo si Yesus, icua éra ai Sia, “Guru, kawisa réén si Guru aicateka' mai am bia'i?”

²⁶Wo isowat i Yesus ai séra, “En ulitna icua-Ku mangé ai camu, pinangéré miow Aku ra'ica ampa'paan sinéréo miow en tuu-tuus kakaya'kaan si niéma'-Ku wo makailek sa si séi réén Aku, taan pinangéré miow Aku ampa'paan kamu icumano i roti itu akar mawesu.

²⁷Tioo matawoi e makéré ing kakanen si ro'na maka'pu wo mawuruk, taan tumawoio mangé e makéré ing kakanen si ra'ica kawisa mawuruk wo si mawéé ing katouan akar ing kauré-uré. Si méé ing kakanen itu ai camu Yakuo si Toyaang i Tou, ampa'paan Aku aitantuo i Amang Kasuruan e méé ing kakanen itu.”

²⁸Wo wuéien éra a si Yesus, “Sapa réén e musti émaan ami e méma' in tawoien si icasalé' i Amang Kasuruan?”

²⁹Isowat i Yesus a sé tou keli, “Si anioo en icasalé' i Amang Kasuruan émaan iow: Percayano mai Aku si ayutus-Na mai.”

³⁰Wo icua éra ai Sia, “Sa taniitu, sapa en tuus si ro'na ipapaturu' ai cami wosama' kami ro'na mercaya sa si Guru itu asi Amang Kasuruan owo. Wo tuus sapa en émaan oka i Guru?

³¹ Indior sé apo-apo' ami cumano i manna si aiwéé i Musa an tutuw éra an tana' kapayasan. En itu tanu si aipatic ang Kitap Le'nas, ‘Séra winéan-Na kakanen an sorga owo.’ ”

³²Wo icua i Yesus ai séra, “En ulitna icua-Ku mangé ai camu, indior ra'ica si Musa e méé ing kakanen si an sorga owo itu a sé apo-apo' miow, taan si Amang-Ku. Wo intarépé' si Amang-Ku méé ai camu kakanen wutul an sorga owo.

³³Eng kakanen wutul si aiwéé mai i Amang Kasuruan itu tumumpa mai an sorga owo akar méma' i tou ang kayo'baan anio' menonou akar ing kauré-uré.”

³⁴Wo icua éra ai Sia, “Tuang, peméé-méé mai eng kakanen itu ai cami.”

³⁵Icua i Yesus ai séra, “Yaku anioo eng kakanen si mengaéma' sé tou menonou akar ing kauré-uré. Wo si tou maai a Yaku, sia itu ra'io ka'i kawisa i maarem, wo si séike' si maéman a Yaku, sia itu ra'io ka'i kawisa i maré'om.

³⁶Taan tanu sé aicua-Kuo ai camu, mandé ka'i sinéréo miow Aku, ra'ipé' ka'i percayan iow Aku.

³⁷Pakasa en tou sé aiwééo i Amang-Ku a Yaku maai oka a Yaku, wo si séike' si maai a Yaku, sia ra'ica kawisa yusér-Ku.

³⁸Ampa'paan Aku tumumpao mai an sorga owo ra'ica méma' ing kasalé'an-Ku in esa taan méma' ing kasalé'an i Amang Kasuruan si mutuso mai Aku.

³⁹Wo si anioo eng kasalé'an i Amang si mutusai Yaku: Icasalé'-Na pakasa sé tou sé aiwéé-Na a Yaku mandé esake' ra'ica wana en icatala. Wo icasalé'-Na touen-Ku sumawel séra im baya am papaté asi endo kaka'puan ing kayo'baan.

⁴⁰Ampa'paan si anioo eng kasalé'an i Amang-Ku: Si esa wo si esa tou suméré sé niéma' i Toyaang wo maéman ai Sia, makéré oka ing katouan akar ing kauré-uré. Séra touen-Ku sumawel am papaté asi endo kaka'puan ing kayo'baan.”

⁴¹Wo sé tou Yahudi membere-mbereng andumoro' i Yesus, ampa'paan aicua-Na Sia itu kakanen si tumumpao mai an sorga owo.

⁴²Icua éra, “Ra'ica réén Sia anio' si Yesus, toyaang i Yusuf? Si amang wo si inang-Na katuusanta. Kéitu réén intarépé' ipakua-Na Sia itu tumumpao mai an sorga owo?”

⁴³Wo icua i Yesus ai séra, “Tioo kamu membere-mbereng.

⁴⁴Ra'ica wana esaan tou ka'i e ro'na maai a Yaku sa asalo kumiit ing kasalé'anna in esa. Si esa wo si esa tou ro'na mai a Yaku ampa'paano si Amang si mutusai Aku matawoio an aténa. Wo si séike' si maai a Yaku touen-Ku oka sumawel asi endo kaka'puan ing kayo'baan.

⁴⁵ En itu aipatico ang kitap-kitap é nabi tana'i: ‘Séra im baya susuian oka i Amang Kasuruan.’ Anaé, si esa wo si esa tou sé lumingao wo tumerimao in sususuien i Amang, maai oka a Yaku.

⁴⁶Ra'ica wana tou en sumangkumo suméré si Amang. Aluar Yaku en isuméréo si Amang ampa'paan Aku mai asi Amang Kasuruan owo.

⁴⁷En ulitna icua-Ku mangé ai camu, si séike' si maéman a Yaku, sia itu ro'na menonou akar ing kauré-uré.

⁴⁸Yaku anio' kakanen si méma' in tou menonou akar ing kauré-uré.

⁴⁹Sé apo-apo' miow icumano i manna an tana' kapayasan taan séra imatéo waya.

⁵⁰Taan eng kakanen si tumumpa mai an sorga owo intarépé' am bi'ao, si séike' eng kuman in itu sia ra'ica maté.

⁵¹Yakuo eng kakanen si mawéé ing katouan si tumumpao mai an sorga owo. Sa si tou kuman ing kakanen anio', sia menonou oka akar ing kauré-uré. Eng kakanen si wéé-Ku itu, siituo en owak-Ku si iwéé-Ku oka a sé tou ang kayo'baan wosama' séra ro'na menonou akar ing kauré-uré.”

⁵²Kelinga in itu, sé tou Yahudi meindo-indoan roma' séra wo iséra. Icua éra, “Tambisa réén Sia ro'na méé in owak-Na eng kanenta?”

⁵³Wo icua i Yesus ai séra, “En ulitna icua-Ku ai camu, sa ra'ica kanen iow en owak-Ku si Toyaang i Tou wo melep in enda'-Ku, kamu ra'ica menonou akar ing kauré-uré.

⁵⁴Si séike' eng kuman in owak-Ku wo melep in enda'-Ku, sia makéré oka ing katouan akar ing kauré-uré wo touen-Ku oka sumawel asi endo kaka'puan ing kayo'baan.

⁵⁵Ampa'paan en owak-Ku itu kakanen wutul wo en enda'-Ku itu elepen wutul.

⁵⁶Si séike' eng kuman in owak-Ku wo melep in enda'-Ku, si tou itu menonou ang karapi-Ku, wo Aku mewali-wali wo isia.

⁵⁷Si Amang-Ku palemboian ing katouan. Siao si mutusai Aku, wo Aku menonou ampa'paan i Amang. Taniitu ka'i si séike' eng kuman in owak-Ku menonou oka akar ing kauré-uré ampa'paan Yaku.

⁵⁸Yaku anioo eng kakanen si tumumpao mai an sorga owo. Eng kakanen anio' ra'ica meputé wo eng kakanen sé kinan é apo-apo' miow. Séra icumano in itu taan séra imatéke' waya. Taan si séike' mangé eng kuman ing kakanen si an sorga owo, sia menonou oka akar ing kauré-uré.”

⁵⁹Pakasa en anio' aicua i Yesus ang Kapernaum an tutuw-Na masusui am balé paapo'an é agama Yahudi.

⁶⁰Keli tou an uner é makii-kiit si Yesus iluminga sapa si pakua-Na itu wo séra mengkung-kuanan, “En sususuien anio' taloso uter. Ra'ica wana tou e makawoo kumiit in sususuien anio'.”

⁶¹Kailekan i Yesus sé tou makii-kiit Sia itu membere-mbereng ampa'paan in ituo icua-Na ai séra, “Kéitu, ra'ica réén icasalé' miow sé aicua-Ku itu?

⁶²Sa ra'ica icasalé' miow, tumambisa réén sa sérén iow Aku Toyaang i Tou icaangkai angé an tampa-Ku owo?

⁶³Sé tou ra'ica makawoo méma' in owakna menonou akar ing kauré-uré. Wayake' i Roh i Amang Kasuruan e méma' si tou ro'na menonou akar ing kauré-uré. E nunuwu' sé aicua-Ku itu, nunuwu' i Roh-Na wo sé nunuwu' itu iméma' sé tou menonou oka akar ing kauré-uré.

⁶⁴Taan an uner iow awéan sé ra'ica maéman.” Icua i Yesus in taniitu, ampa'paan asi catarépé' kailekan-Na sé ra'ica maéman wo si sumarakan Sia a sé kaséké'.

⁶⁵Wo icua ka'i i Yesus, “Ampa'paan in ituo aicua-Kuo ai camu: Ra'ica wana mandé esake' tou e ro'na mai a Yaku sa kumiitke' ing kasalé'anna in esa. Si esa wo si esa tou ro'na mai a Yaku ampa'paano si Amang e méma' sia mai a Yaku.”

⁶⁶Tumo'tolai asi oras itu, keli en tou sé mengakiit si Yesus tumela'u Sia, wo ra'io kiim ka'i kumiit Sia.

⁶⁷Wo icua i Yesus a sé sangapulu' rua murit-Na, “Itela'u ka'i réén iow Aku?”

⁶⁸ Isowat i Simon Petrus ai Sia, “Tuang, asi séi oka en angéan ami? Wayake' si Apo' Yesus e mengakua in Taar andumoro' tumambisa kami menonou akar ing kauré-uré.

⁶⁹Icami anio' maémano wo makaileko si Tuang itu Le'nas si ayutus i Amang Kasuruan.”

⁷⁰Icua i Yesus, “Ra'ica réén Yakuo in esa en sumisir camu sangapulu' rua tou mamuali murit-Ku? Taan si esaan ai camu, sia itu makiit ing kasalé'an i kikiiten é sétang.”

⁷¹Em peangé-angén i Yesus itu si Yudas, si toyaang i Simon Iskariot. Ampa'paan si Yudas en sumarakan oka si Yesus a sé kaséké', mandé ka'i sia itu esaan tou asé sangapulu' rua murit-Na.