Read Tontemboan Yohanes 7 Bible Online

Yohanes 7 - Tontemboan bible

Yohanes 7

¹Kekawus in itu, si Yesus méma' im bawayaan-Na lumi'cir in sangkum ing Galilea. Ra'ica kiim-Na maangé an sangkum in Yudea ampa'paan sé kikiiten é agama Yahudi am bitu rumaméji maté Sia.

²An tutuw itu matawio in endo wangko' é tou Yahudi si patuulen endo wangko' Terung Lalaina.[8]

³Anaé, icua é poo-poow i Yesus ai Sia, “Lébé loor itela'u-Mu en tampa anio' wo Ko mangé an Yudea en tuma'néi in endo wangko', wosama' sé tou mengakiit ai Co ro'na suméré ka'i in tawoien sé émaan-Mu sa.

⁴Ampa'paan sa si esa tou masalé' katuusan é tou keli, sapake' en émaanna ra'ica ipaenep-enepna. Anaé, sa émaan-Mu en tawoien itu, ituru'o mio' en owak-Mu a sé im pakasa in tou ang kayo'baan.”

⁵Aicua é poo-poow i Yesus in taniitu, ampa'paan séra in esa ka'i ra'ipé' mercaya sa Sia itu ayutus i Amang Kasuruan.

⁶Wo icua i Yesus ai séra, “Ra'ipé' an témpona Aku maangé. Taan sa kamu kawisake' ro'na maangé.

⁷Sé tou ang kayo'baan anio' ra'ica masuut icamu, taan Yaku icasuut éra ampa'paan pengakua-Ku em paémaan éra léwo'.

⁸Icamuo taré sé maangé am pésta pata'néian in endo wangko' itu. Sa Aku ra'ipé' maangé ampa'paan ra'ipé' an témpona Aku maangé.”

⁹Taniitu en aicua i Yesus a sé tuari-Na, wo Sia ka'i mento' ang Galilea.

¹⁰Taan kekawus é poo-poow i Yesus mangém an Yerusalem en tuma'néi in endo wangko' itu, si Yesus mangé ka'i ang karapi i maene-enep akar ra'ica kinailekan é tou.

¹¹Asi endo wangko' itu an Yerusalem Sia paéré-érén é kikiiten é agama Yahudi, wo séra membum-buéian, “Am bisa réén Sia?”

¹²Wo keli tou mengkeng-kewitan i esa wo sé walina andumoro' Sia. Awéan sé makua, “Sia itu tou sama'.” Awéan ka'i sé makua, “Ra'ica, Sia si mengasélé'kow sé tou keli.”

¹³Taan ra'ica wana esa tou ka'i em brani kumua andumoro' Sia an dior é tou keli, ampa'paan caindé' éra sé kikiiten é agama Yahudi.

¹⁴Wo ang karoro'an i mapésta, si Yesus muntep ang kintal im Balé Le'nas wo tumo'tolo Sia sumusui.

¹⁵Sé kikiiten é agama Yahudi mangaya-ngaya'ka' luminga in sususuien i Yesus wo icua éra, “Tambisa si Tou anio' taniitu eng kakeli eng kakailekan andumoro' ing Kitap Le'nas? Si Tou anio' ra'ica sumicola tanu icita.”

¹⁶Isowat i Yesus ai séra, “Sé ipasusui-Ku anio', ra'ica sususuien a Yaku owo in esa, taan en anio' sususuien asi Amang Kasuruan owo si mutusai Yaku.

¹⁷Sa si tou masalé' maéma' ing kasalé'an i Amang Kasuruan, kakailekanna oka en sususuien-Ku anio' asi Amang Kasuruan owo kuma'pa mai a Yaku owo in esa.

¹⁸Si tou makua mapakéke' im bewerotna in esa, sia maéré-éréke' ing kasiri'an in owakna in esa. Taan si tou si mengaéré ing kasiri'an torona Sia si mutusai si tou itu, tantu sia makua im butul wo ra'ica mengatowo.

¹⁹Ra'ica réén aiwééo i Musa en ukum Torat ai camu? Taan ra'ica wana mandé esake' asé icamu sé mengaéma' in ukum Torat itu. Kéitu réén kamu rumaméji e maté Yaku?”

²⁰Isowat é tou keli itu a si Yesus, “Ico rinasuko i sétang akar imanganga'. Ra'ica wana tou en rumaméji e maté Ico!”

²¹Isowat i Yesus ai séra, “Wayake' in esa en tawoien si niéma'-Ku asi endo Sabat, wo kamu im baya mangaya-ngaya'ka'.

²²Taan icamu in esa ka'i mengatawoi asi endo Sabat, ampa'paan kamu masunat sé tou kumiit in atoran sunat si aiwéé i nabi Musa. (Taan em butulna en sunat itu ra'ica atoran i Musa, taan mai ang kanaramen é apo-apo'ta Abraham, Ishak wo si Yakub.)[9]

²³ Anaé, sa kamu sumunat in tou asi endo Sabat wosama' kamu le'tek asi ukum i Musa, kéitu réén Aku icae'bow iow asalo isumama' in owak i esa tou asi endo Sabat?

²⁴Tioo maakim in tou kumiit sapa sé pakasérénke' ang kesot wo sé lininga miow, taan akimeno ang karapi in da'ica marapit.”

²⁵Wo awéan piraan tou an Yerusalem sé cumua, “Ra'ica réén Sia anio' si paéré-érén é kikiitenta im patén?

²⁶Taan séréno, Sia ra'ica wana eng kaindé'anai mapaar an dior é tou keli wo ra'ica wana sapa-sapa en icua mai é kikiiten itu ai Sia. Wona' réén kailekano éra sa Sia itu wutu-wutul Kristus, Kolano Lumolowir?

²⁷Taan sa si Kristus maai, ulit ra'ica wana en tou e makailek am bisa owo Sia mai. Taan kailekanta si Tou anio' a Nazaret owo, anaé ra'ica wona' wutul sa si Tou itu Kristus.”

²⁸An tutuw i Yesus ang karoro'ané' masusui am Balé Le'nas, Sia taangko' i makua, “Wutul kamu makatuus Yaku wo kailekan iow Aku am bisa owo mai. Taan Aku mai ra'ica ampa'paan ing kasalé'an-Ku in esa. Yaku mai ampa'paan si Amang Kasuruan e mutusai Yaku. Sia itu wutul, taan Sia ra'ica katuusan iow.

²⁹Taan katuusan-Ku Sia, ampa'paan Aku mai ai Sia owo wo Siao e mutusai Yaku.”

³⁰An tutuw i Yesus kumua in taniitu, raméjin éra in tumangka' Sia. Taan ra'ica wana mandé esake' tou e méma' in sapa-sapa ai Sia ampa'paan ra'ipé' mai en témpo si aitantuo i Amang Kasuruan.

³¹Taan an uner é tou keli itu kelio sé mato'tolo maéman a si Yesus, wo ipakua éra, “Sia anio' wutu-wutul Kristus, Kolano Lumolowir, ampa'paan ra'ica wana tou e ro'na méma' tuus kakaya'kaan en lébé keli mai wo sé niéma' i Tou anio'.”

³²Kalingaan é tou Farisi, keli tou mengkeng-kewitan andumoro' si Yesus. Ampa'paan in ituo, iru'du' é kikiiten é imam wo sé tou Farisi sé matéir am Balé Le'nas en tumangka' si Yesus.

³³Wo si Yesus makuapé' a sé tou keli, “Ra'io uré ka'i en témpo-Ku mewali-wali wo icamu, kumawus in itu Aku maréngo mangé ai Sia si mutusai Yaku.

³⁴Pangérén iow oka Aku, taan Aku ra'io peta'up iow. Wo en tampa angéan-Ku, kamu ra'ica icaangé am bitu.”

³⁵Ampa'paano in itu, sé kikiiten é tou Yahudi mengkung-kuanan, “Am bisa réén en angéan-Na akar kita ra'io ka'i meta'up wo Sia? Awéan réén em basa-Na i maangé a sé tou Yahudi sé imanangkéi an sangkum é tou Yunani? Masalé' réén Sia sumusui a sé tou Yunani?

³⁶Sapa em basa-Na icumua in anio': Pangérén iow oka Aku, taan Aku ra'io peta'up iow wo kamu ra'ica icaangé am bitu?”

³⁷ Asi endo kaakaran si endo penting keli asi pésta in endo wangko' Terung Lalaina itu, tumulungo mai si Yesus wo kumua in taangko' a sé tou keli, “Si séike' si maré'om, aweso taré sia mai a Yaku wo wéan-Ku oka elepen.

³⁸ Si séike' si maéman a Yaku, tanu si aipatic ang Kitap Le'nas, an untep in aténa maroyong oka tanu salu-salu in dano e méma' isia menonou akar ing kauré-uré.”

³⁹An tutuw i Yesus kumua andumoro' in dano itu, eng kaangéanna e Roh i Amang Kasuruan teriman oka é tou maéman. Taan e Roh itu ra'ipé' aiwéé a sé tou maéman, ampa'paan em papaté ra'ipé' pinendam i Yesus wo ra'ipé' niangkai angé an tampa-Na si parayo-rayo wo pasiri-siriin an sorga.

⁴⁰Keli en tou makalinga i nunuwu' i Yesus, wo an uner éra awéan e makua, “Sia anio' wutu-wutul nabi si paento-entoonta.”

⁴¹Wo sé walina makua, “Sia anio' Mesias, Kolano Lumolowir.” Taan sé walina makua, “Ra'ica! Si Mesias ra'ica imai ang Galilea owo.

⁴² Ra'ica réén ang Kitap Le'nas aipatic, si Mesias itu taranak i Daud wo imai asi roong Betlehem paento'an i Daud owo?”

⁴³Wo sé tou itu tumo'tolo meindo-indoan roma' in andumoro' i Yesus.

⁴⁴Piraan tou ai séra masalé' tumangka' Sia, taan ra'ica wana mandé esaan tou ka'i e ro'na méma' in sapa-sapa ai Sia.

⁴⁵Wo sé mengatéir im Balé Le'nas mangé ka'i sumawel a sé kikiiten é imam wo a sé tou Farisi sé rumu'du'o iséra en tumangka si Yesus. Wo sé kikiiten é imam wo sé tou Farisi kumua ai séra, “Kéitu réén Sia ra'ica iwali miow maai am bia'i?”

⁴⁶Wo isowat é mengatéir im Balé Le'nas itu, “Ra'ipé' wana tou en sinéré ami mai menganuwu' kaputé Sia!”

⁴⁷Wo isowat é tou Farisi ai séra, “O! Aisélé'kow-Nao ka'i réén kamu?

⁴⁸Awéan réén esaan asé kikiiten é agama Yahudi kuma'pa tou Farisi si mercaya ai Sia?

⁴⁹Taan sé tou keli itu mercayao Sia, ampa'paan ra'ica kailekan éra en ukum Torat. Iwayao mio' séra itu kutuken i Amang Kasuruan!”

⁵⁰ An uner é tou Farisi am bitu si Nikodemus. Indior sia itu sumangkumo mai a si Yesus. Icuana ai séra in tana'i,

⁵¹“Sa kumiit in ukum Torat, ro'na réén kita mukum si esa tou an tutuw ra'ipé' liningata sia rumoma' wo ra'ipé' kailekanta sapa sé niéma'na?”

⁵²Isowat éra ai sia, “Tou Galilea réén ka'i ko? Ti'tireno mangé sé ang Kitap Le'nas wo kakailekanmu oka, ra'ica wana nabi si mai ang Galilea owo.” [

⁵³][10]Kekawus in itu, séra im baya maréng am balé éra i esa wo si esa.