Read Tontemboan Kisah Para Rasul 1 Bible Online

Kisah Para Rasul 1 - Tontemboan bible

Kisah Para Rasul 1

¹ Tuang Teofilus, ang kitapku kataré, aipaticku andumoro' im pakasa sé niéma' wo sé aisusui i Yesus,

²akar asi endo Sia icaangkai angé an sorga. Ra'ipé' icaangkai angé si Yesus an sorga, Sia si pakakawasan i Roh Le'nas si mééo perénta sapa e musti émaan é ruru'du'an sé sinisir-Na.

³Kekawus-Na imaté wo tumou sumawel, Sia menguri-nguri mapaturu' in owak-Na ai séra epat ngapulu' ngando eng kauréna, wo méé kelian tuus en tumuru' sapaoka Sia uli-ulit tumou sumawel. Wo Sia makua andumoro' si Amang Kasuruan kumawasa tanu Kolano.

⁴ An tutuw i Yesus mewali-wali wo iséra, aitaar-Na, “Kamu ra'- ica toro tumela'u in Yerusalem. Mentoo am bitu akar Sia si aijanjio i Amang-Ku maai. Siao si sumangkumo pinalinga miow a Yaku.

⁵ Si Yohanes Mabaptis, mengabaptis sé tou maké in dano, taan ra'- io uré ka'i kamu baptisen oka i Roh Le'nas.”

⁶Asi makasa si Yesus wo sé ruru'du'an-Na mali'us. Wo wuéien é ruru'du'an itu ai Sia, “Tuang, asi oras anio' icasalé' réén émaan i Tuang eng kakolanoan Israel maloor sumawel tanu indior?”

⁷Isowat i Yesus ai séra, “Ra'ica sangali kailekan iow kawisa en témpo wo en orasna en itu mamuali, wayake' si Amang-Ku e makailek. Sia in esa e makakawasa en tumu'tul in témpona.

⁸ Taan an tutuw i Roh Le'nas tumumpa mai ai camu, kamu makéré oka kawasa. Wo kamu mamuali oka sairi andumoro' Yaku an Yerusalem, am pakasa in Yudea wo an Samaria wo akar an tempok ing kayo'baan.”

⁹ Kumawusai si Yesus kumua in taniitu, Sia icaangkaio mangé an sorga pakasérén éra wo Sia saputen ing kambung akar ra'io kaséréan éra.

¹⁰Ang karoro'an éra i makakanat angé an langit an tutuw i Yesus icaangkai, tumarépé'anke'mai awéan rua tou mekarai ing kulo' sé makatulung an duru éra.

¹¹Wo icua é rua tou itu ai séra, “Éi tou Galilea, kéitu réén kamu makatulung wo makakanaté' mangé an langit? Si Yesus anio' icaangkaio mangé an sorga tumela'uo icamu. Sia maai oka ka'i sumawel, meputé kamu suméré tumambisa Sia icaangkai angé an sorga.”

¹²Kumawusai in itu, sé ruru'du'an itu meroso an Tolaina in Zaitun wo maréng angé sumawel an Yerusalem. Eng katayangna in tolaina itu wayake' wona' in esa kilometer an Yerusalem.[1]

¹³ An tutuw éra icateka' mangé an Yerusalem, séra mangé an tampa linoséran éra wo sumosor angé an esa kamar an dangka'. Séra itu: Si Petrus wo si Yohanes, si Yakobus wo si Andreas, Si Pilipus wo si Tomas, si Bartolomeus wo si Matius, si Yakobus toyaang i Alfeus, si Simon tou Zelot, wo si Yudas toyaang i Yakobus.

¹⁴Séra im baya le'tek mengali'us wo meesa en até mengasombayang. Séra mengasombayang mewali-wali wo sé piraan wéwéné ang karapi i Maria inang i Yesus wo sé poo-poow i Yesus.

¹⁵Asi makasa, sé poo-poow esa paémanen a si Yesus imaumung mewali-wali. Eng kakeli éra wona' sangaatus rua ngapulu' tou. Wo si Petrus tumulung an uner éra wo kumua,

¹⁶“Poo-poow! Sapa sé aipatic ang Kitap Le'nas in andumoro' i Yudas, musti mamuali. Indior, si Roh Le'nas maké si Daud eng kumua in andumoro' i Yudas, si makawali mai sé tou en tumangka' si Yesus.

¹⁷Wo ka'i indior si Yudas itu esaan ai cita wo mengaselewir mewali-wali wo icita.”

¹⁸ Si Yudas ituo en tumerima in doit laasa eng kumianat si Yesus wo en doit itu pinakéna in tumeles tana'. An tana' ituo sia icarepa wo en tina'ina imakése' akar pakasa sé an untep in tina'ina icakesot.

¹⁹Pakasa é tou an Yerusalem makailek sapa e mamuali a si Yudas, akar en tana' itu ningaranan éra maké i nunuwu' éra in esa, ‘Akeldama’, eng kaangéanna ‘Tana' in Enda'.’

²⁰ Wo icua ka'i Petrus, “Aipatic ka'i ang kitap Mazmur, tana'i, ‘Mandéo en tampa pengaento'anna mamuali lulu in tou, wo ra'ica wana tou maento' am bitu.’ Wo aipatic ka'i tana'i, ‘Mandéo indon é tou walina en tawoienna.’

²¹Anaé, kita musti sumisir esa tou en sumawel si Yudas. Si tou itu musti sisiren asé tou sé tatap mai mali'u-li'us wo icita an tutuw si Apo' Yesus mewali-walipé' wo icita,

²² tumo'tolai an tutuw i Yesus nibaptis i Yohanes akar Sia icaangkai angé an sorga tumela'u icita. Si tou itu musti mengasairi mewali-wali wo icita sapaoka si Yesus itumou sumawel asi papaté.”

²³Kumawusai si Petrus imaroma' wo sé tou imali'us am bitu tumuul rua ngaran. Si kataré si Yusuf si pengatuulen é tou Barsabas wo patuulen ka'i é tou walina sia Yustus. Si karua si Matias.

²⁴Wo séra im baya sumombayang, “O Kasuruan, si Casuruanke' e makailek wutul pakasa in até é tou, ituru'o mai ai cami si séi asé rua tou anio' en sisiren-Mu.

²⁵Si tou ituo en sumawel maselewir wo tumerima oka in tawoien ruru'du'an si aitela'uo i Yudas. Si Yudas anio' imakéréo in tampa si patus terimana.”

²⁶Wo lotréien éra en tumantu si séi asé rua tou itu eng kasisiran. Wo si Matias eng kinasisiran. Anaé, séra mangkai si Matias mamuali ruru'du'an mewali-wali wo sé sangapulu' esa tou ruru'du'an itu.