Read Tontemboan Kisah Para Rasul 14 Bible Online

Kisah Para Rasul 14 - Tontemboan bible

Kisah Para Rasul 14

¹An tutuw i Paulus wo si Barnabas an Ikonium, séra muntep am balé paapo'an é agama Yahudi, tanu ing kanaramen paémaan éra an tampa walina. Am bitu séra kumua in Abar Kaaruien andumoro' i Yesus Kristus ang karapi in sumama-sama' akar keli sé tou Yahudi wo sé tou ra'ica Yahudi maéman a si Yesus.

²Taan awéan tou Yahudi sé ra'ica kiim mercaya in aicua i Paulus wo si Barnabas, séra memaso-maso' in léwo' sé tou ra'ica Yahudi wosama' icasuut éra sé poo-poow esa paémanen itu.

³Anaé, si Paulus wo si Barnabas mento' uré toyo' am bitu. Wo ang karapi in da'ica wana kaindé'an pengua-ngua éra en abar andumoro' in upus aitambér i Casuruan. Séra in dua winéan-Na kawasa e méma' in tuu-tuus sé ra'io icakua wo kakaya'kaan-kakaya'kaan.

⁴Taan sé tou keli ang kota itu mamuali rua ngareru'. Awéan sé marapit a sé tou Yahudi ra'ica maéman, wo awéan ka'i sé marapit a sé rua ruru'du'an itu.

⁵Eng kasiwakanna, sé tou Yahudi wo sé tou ra'ica Yahudi mewali-wali wo sé kikiiten éra meesa. Séra rumaméji e mokoi wo mangkil im batu a si Paulus wo si Barnabas.

⁶Taan kailekano éra in dua em pawasa-wasan léwo' itu. Ampa'paano in itu séra sumingkir angé ang kota-kota an Likaonia. Eng kota-kota itu, Listra wo en Derbe wo an tampa-tampa walina an sangkum itu.

⁷Wo am bitu ka'i séra kumua in Abar Kaaruien andumoro' i Yesus Kristus.

⁸Ang kota Listra, awéan esa tuama si asalo meluku-lukut ampa'paan eng kécéina késo' ketounake' mai wo ra'ipé' sumangkum ako maya'.

⁹Si tou itu makalinga si Paulus maroma'. Wo téintengen i Paulus si tou itu, kailekanna si tou itu maéman a si Yesus anaé ro'na masama'.

¹⁰Wo si Paulus rumoma' in taangko' ai sia, “Tumulungo!” Wo sia makala'us lumo'tic tumulung wo tumo'tolo menguru-nguri mawaya'.

¹¹An tutuw sérén é tou keli sapa e niéma' i Paulus, séra makala'us mangko' maké i nunuwu' é Likaonia, “Sé opo-opo' itumumpao mai an unerta meputé tou!”

¹²Wo tumo'tolo séra mengatuul si Barnabas itu Zeus, wo si Paulus pengatuulen éra Hermes ampa'paan sia si mengaroma'.

¹³Ang kesot ing kota, awéan esa kuil i opo' éra makangaran Zeus. Asi témpo itu si imam éra wo sé tou keli maali-ali sé sapi bongko wo im bunga-bungang mangé am papalen wangko' ing kota. Séra mawasa méma' raragésan a sé ruru'du'an itu.

¹⁴Taan Kelinga i Barnabas wo si Paulus sapa en émaan é tou keli itu, wo késéén éra eng karai éra wo sumolisip angé an uner é tou keli itu ang karapi i maangko',

¹⁵“Éi camu im baya, kéitu réén kamu méma' in tana'i? Kami anio' tou kaputé miow. Kami am bia'i eng kumua in Abar Kaaruien andumoro' i Yesus Kristus ai camu, wosama' kamu ro'na tumela'u sé opo-opo' sé ra'ica wana torona wo kamu maémano mangé a si Amang Kasuruan si menonou. Siao si méma' in langit wo ing kayo'baan, ta'sic wo im pakasa sé an untepna.

¹⁶Indior aiwaya i Amang Kasuruan pakasa sé bangsa menonou makiit in lalan éra i esa wo i esa.

¹⁷Taan si Amang Kasuruan kasake' tumambérai in upus-Na a sé pakasa sé tou ang karapi in tumumpa mai in uran an langit wo winéan-Na oras i maupu' ai cita. Winéan-Na ka'i mai kakanen wo kaaruian an atéta.”

¹⁸Mandé ka'i si Paulus wo si Barnabas irumoma'o tanu siitu, misike' ra'ica katangan éra sé tou keli itu e méé raragés ai séra.

¹⁹Wo asi témpo itu mayo sé tou Yahudi a mangé en Antiokhia wo an Ikonium owo. Séra memaso-maso' in léwo' a sé tou keli itu akar si Paulus wangkilen éra im batu wo wésoon éra icesot ang kota, ampa'paan paweroten éra sia imatéo.

²⁰Taan, an tutuw é tou maéman am bitu matulung wo lumi'cir sia, makala'us sia tumulung wo muntep sumawel an Listra. Asi woondona mai, sia mangé an Derbe mewali-wali wo si Barnabas.

²¹An Derbe, si Paulus wo si Barnabas ka'i kumua in Abar Kaaruien andumoro' i Yesus Kristus, wo keli tou maémano a si Yesus. Kekawus in itu séra in dua maréng sumawel an Listra, wo melala'- us an Ikonium wo ka'i an Antiokhia an sangkum im Pisidia.

²²An tampa-tampa itu, si Paulus wo si Barnabas kumeter in até é tou maéman wo sumina'u iséra wosama' le'tek am paémanen. Wo icua i Paulus wo si Barnabas, “Sa kita masalé' mamuali tou i Amang Kasuruan si Kumawasa tanu Kolano, kita musti meta'up ing keli kawenduan.”

²³Wo séra in dua sumisir sé penatua torona é jamaat itu. Séra sumombayang wo muasa en sumarakan sé penatua itu a si Casuruan si paémanen éra.

²⁴Kekawus i Paulus wo si Barnabas lumi'cir am pakasa im Pisidia, séra mangé an sangkum im Pamfilia.

²⁵Am Pamfilia, séra kumua in Abar Kaaruien andumoro' i Yesus Kristus am Perga wo séra meros an Atalia.

²⁶A mangé em bitu oka séra suméngkot angé an Antiokhia. Indior séra ayutus é jamaat itu eng kumua in Abar Kaaruien itu. Sé jamaat ituo ka'i en sumombayang sumarakan iséra in dua a si Amang Kasuruan wosama' Sia tumambérai in upus-Na ai séra en tumo'tol in tawoien. Intarépé' séra mangé am bitu ampa'paan linekepo éra en tawoien.

²⁷Icatéka' mangé an Antiokhia, towan éra sé jamaat e maumung. Wo sisil éra in dua pakasa sé niéma' i Amang Kasuruan ai séra. Sisil éra ka'i tambisa si Casuruan muka' in lalan akar sé tou ra'ica Yahudi ro'na maéman a si Yesus.

²⁸Am bitu séra mento' uré toyo' wo sé poo-poow esa paémanen.