Read Tontemboan Kisah Para Rasul 16 Bible Online

Kisah Para Rasul 16 - Tontemboan bible

Kisah Para Rasul 16

¹Si Paulus mangé ka'i an Derbe wo melala'us an Listra. A mangé mbitu, awéan esa tou makangaran Timotius, sia anio' tou makiit a si Yesus. Si inangna tou Yahudi si maémano a si Yesus wo si amangna tou Yunani.

²Sé tou maéman an Listra wo an Ikonium, makailek wutul si Timotius anio' tou sama'.

³Wo icasalé' i Paulus si Timotius kumiit mewali-wali wo sia am bawayaanna, ampa'paan in ituo iru'du' i Paulus tou en sumunat si Timotius. Ampa'paan kailekan é tou Yahudi an sangkum in angéan éra sa si amang i Timotius tou Yunani.

⁴Am bawayaan éra imali'ci-li'cir asi esa kota mangé ang kota walina, si Paulus wo si Silas makua in atoran-atoran sé niéma' é ruru'du'an wo sé penatua an Yerusalem, wosama' sé jamaat ro'na kumiit in atoran itu.

⁵An tutuw é jamaat luminga in atoran itu, em paémanen éra a si Yesus makaketero. Wo susur in endo, sé tou maéman a si Yesus mengawe-ngawes eng kakeli.

⁶Si Paulus wo sé karapina asaloke' ilumangkoi am Frigia wo ang Galatia, ampa'paan pinéro i Roh Le'nas séra eng kumua in Abar Kaaruien andumoro' i Yesus Kristus an sangkum in Asia.

⁷An tutuw éra icateka'o am pesupuan i Misia wo em Bitinia, séra mepé' muntep im Bitinia, taan pinéro i Roh i Yesus séra e maangé am bitu.

⁸Anaé, séra asaloke' ilumangkoi i Misia wo icateka' mangé an Troas.

⁹Mawengi mai, si Paulus pinapaturu'an i Amang Kasuruan. Asi pinapaturu'an itu sérénna, awéan esa tou an sangkum i Makedonia makatulung wo mekiupus ai sia, “Mayoo am bia'i wo tawangenai kami!”

¹⁰Kekawusai i Paulus suméré im pinapaturu'an itu, kala'usen ami i musé' wo tumu'tul e maangé a Makedonia, ampa'paan am pinapaturu'an itu kami tinowao i Amang Kasuruan eng kumua in Abar Kaaruien andumoro i Yesus Kristus a sé tou a mangé mbitu.

¹¹Kami tumela'u in Troas wo melala'us suméngkot angé am pulou Samotrake, wo asi woondona mai, icateka'o kami a Neapolis an sangkum i Makedonia.

¹²A Neapolis kami maya' mangé an Filipi. Eng kota itu, kota penting a Makedonia, panangkéian é tou Roma. Wo kami mento' am bitu wayake' im pira ngando eng kauréna.

¹³Asi endo Sabat, kami kumesot am papalen wangko' ing kota. Kami kumiit an tembir in doyongan wo mangéré in tampa pengasombayangan é tou Yahudi, ampa'paan paweroten ami en tampa itu am bitu. An tutuw ami icateka' mangé an tampa pengasombayangan itu, kami meta'up wo sé wéwéné sé mali'us am bitu, kami lumukut wo mapaar andumoro' i Apo' Yesus ai séra.

¹⁴Esaan angé ai séra, sé iluminga icami mapaar, awéan esa wéwéné makangaran Lidia. Sia ang kota Tiatira owo, sia mawangkér ing kaéng pares. Si Lidia anio' tou ra'ica Yahudi taan sia mengaapo' a si Amang Kasuruan. Wo an tutuw i Paulus mapaar andumoro' si Yesus, en aténa winuka' i Amang Kasuruan akar tinerimana sapa em ipakua i Paulus.

¹⁵Kekawus i Lidia wo sé am pamaléna nibaptis, icuana in tana'i ai cami, “Sa percayan iow aku anio' wutu-wutul maémano a si Casuruan, mayo lumosér am baléku.” Pelepé-lepéienna, akar kiniitan ami eng kasalé'anna en lumosér am baléna.

¹⁶Asi makasa, an tutuw ami maangé an tampa pengasombayangan itu, kami meta'up wo si esa ata wéwéné pakakawasan i roh i roh léwo'. Sia ro'na tumulap ing katouan é tou. Ang karapi im pakatulapna itu, sé tuangna mengakéré keli roit ampa'paan sia ata éra.

¹⁷Si wéwéné itu mengii-ngiit ka'i an somoi i Paulus wo icami, ang karapi i mengangko-ngangko', “Sé tou anioo sé ata i Amang Kasuruan Si Rumangka-rangka'. Séra makua in lalan kalowiran ai camu.”

¹⁸En itu niéma' i wéwéné itu akar im piraan ngando, akar si Paulus ra'io ka'i makalesen. Ampa'paano in itu si Paulus maréng in somoi wo kumua a si roh léwo' si rumasuk si wéwéné itu, “Ang karapi i ngaran i Yesus Kristus peréntanku, kumesot ko ai sia!” Asi témpo ituke' si roh léwo' itu makala'us kumesot asi wéwéné itu.

¹⁹Ampa'paan e roh léwo' icumesoto ai sia, kailekano é tuang i wéwéné itu sapaoka séra ra'io ka'i makéré roit. Wo tangkaan éra si Paulus wo si Silas, wésoon éra am pasar wo isaru a sé makakawasa ing kota itu.

²⁰Iwali éra si Paulus wo si Silas a sé makakawasa ing kota itu wo icua éra, “Sé tou anio' tou Yahudi, wo séra mai méma' ing kalicokoan ang kotata.

²¹Séra masusui ing kanaramen si ra'ica patus teriman kuma'pa kiitenta ampa'paan kita tou Roma.”

²²Kelinga in itu, sé tou keli am bitu ka'i kumiit sumundur si Paulus wo si Silas. Wo iru'du' é makakawasa ing kota itu eng kumésé' ing karai éra in dua wo pangkuren éra ing kayu.

²³Kekawus éra i memangku-mangkur si Paulus wo si Silas wo peréntan i makakawasa itu wosama' séra yuntep am bui. Peréntanna ka'i si capala im bui en tuméir sumama-sama' séra in dua.

²⁴Wo makala'us yuntep i capala im bui itu séra in dua an untep ing kamar im bui si rumare-rarem, wo eng kécéi éra ayuntep am bo'so im balak.

²⁵Wona' ang katoora im bengi, si Paulus wo Silas sumombayang wo kumantar ing kakantaren rarayoan a si Amang Kasuruan wo palingan ka'i é tou walina am bui.

²⁶Tumarépé'anke'mai en tana' mangéro' repet akar en tinuliran im bui mekiito maéro'. Asi témpo itu ka'i pakasa em papalen imawuka' wo ka'i pakasa en ranté aiwa'kes a sé tou am bui mawuka'.

²⁷Asi témpo itu si capala im bui mapolo, sérénna em papalen im bui imawuka'o waya. Pawerotenna sé tou am bui itumincaso waya, anaé, kémbutenna en sa'bel e maté in owak.

²⁸Taan si Paulus mangko', icuana a si capala im bui itu, “Éi amang! Tioo maté in owak! Kami im baya am bia'ié'.”

²⁹Kelinga in itu, si capala im bui rumu'du' tou maali palaab. Wo sia tuméron angé an untep im bui, ang karapi i mege'ge-ge'ger sia kumundu an dior i Paulus wo si Silas.

³⁰Kumawus in itu wali i capala im bui séra in dua wo kumua, “Tuang-tuang, sapa réén e musti émaanku wosama' aku ro'na malowir?”

³¹Isowat éra, “Maémano mangé a si Apo' Yesus Kristus wosama' ko malowir oka, taniitu ka'i pakasa sé am balému malowir.”

³²Kumawus in itu, si Paulus wo si Silas kumua in Taar i Amang Kasuruan ai sia wo a sé pakasa sé tou am baléna.

³³Asi katoora im bengi ituke', iwali i capala im bui séra e mangé meresi im péla' éra. Asi témpo itu ka'i, si capala im bui wo pakasa sé am baléna méé in owak éra im baptisen.

³⁴Kekawus in itu, séra in dua iwali i capala im bui mangé am baléna wo séra wéanna kanen. Sia wo sé am baléna arui keli ampa'paan séra im baya maémano a si Amang Kasuruan.

³⁵Wo mamoondo mai, iru'du' é makakawasa ing kota sé pengawal éra mangé a si capala im bui wo tumaar, “Iwekaro mio' sé rua tou itu!”

³⁶Wo si capala im bui kumua in taar itu a si Paulus icuana, “Sé makakawasa ing kota rumu'du' mekar icamu in dua. Anaé, intarépé', kamu ro'nao kumesot am bia'i wo mangéo ang karapi in sama'!”

³⁷Taan icua i Paulus a sé tou itu, “Kami ra'ipé' sinidang airu'du'o éra pemangku-mangkuren an dior é tou keli, séra ra'ica toro méma' in taniitu ai cami ampa'paan kami ka'i tou Roma. Kumawus in itu yuntep éra ka'i kami am bui wo intarépé' cesot éra kami ang karapi i memene-menes? Ra'ica toro taniitu! Iwayao mio' séra in esa e maai wo maali icami eng kumesot.”

³⁸Kumawus in itu, sé pengawal éra kumua a sé makakawasa ing kota pakasa si aicua i Paulus. Kelinga éra si Paulus wo si Silas tou Roma, maindé'o sé makakawasa ing kota itu.

³⁹Wo séra mai mekiampung a si Paulus wo si Silas. Wo iwali éra sé rua ruru'du'- an itu icesot am bui, wosama' séra tumela'u ing kota itu.

⁴⁰Kekesot éra am bui itu, si Paulus wo si Silas mangé am balé i Lidia. Am bitu séra meta'up wo sé tou maéman wo wéan éra kaincayaan sé poo-poow itu. Kumawus in itu, séra in dua kumesot ang kota itu.