Read Tontemboan Kisah Para Rasul 2 Bible Online

Kisah Para Rasul 2 - Tontemboan bible

Kisah Para Rasul 2

¹ An tutuw imayo an endo wangko' Pentakosta, pakasa sé tou maéman mali'us an esa walé an Yerusalem.

²Wo tumarépé'anke'mai kalingaan awéan suara mai an langit owo tanuoka in téngéna in deges repet wo kapendaman am pakasa in tampa si pakalukutan éra am balé itu.

³Wo kaséréan éra en lila-lila' tanuoka lila' in api isumerar wo tumeka' ai séra asi esa wo si esa.

⁴Wo séra im baya wuta i Roh Le'nas wo tumo'tolo maroma' i nunuwu'-nunuwu' walina tanu si aiwéé i Roh Le'nas ai séra en icua.

⁵Asi endo wangko' itu, keli sé tou Yahudi sé imanangkéi am pakasa ing kayo'baan, imaréngai an Yerusalem. Séra anio' le'tek makiit ing kasalé'an i Amang Kasuruan.

⁶Séra ka'i luminga in suara itu, anaé séra mai mali'us asi tampa itu. Séra mangaya'ka' ampa'paan palingan éra e nunuwu' éra si esa wo si esa, papakén é tou maéman itu.

⁷Séra im baya wo menguré-ngurésé in do'kos wo mangaya-ngaya'ka' malinga sé tou maéman itu, wo icua éra, “Kailekan ami, sapaoka sé tou maroma' itu tou Galilea.

⁸Tumambisa réén wona' akar palinganta séra ro'na maroma' mapaké i nunuwu' si pengapakén an doongta i esa wo si esa?

⁹Kita tou: Partia, Media, Elam, Mesopotamia, Yudea wo eng Kapadokia, Pontus wo Asia,

¹⁰Frigia wo Pamfilia, Mesir wo sé an sangku-sangkum in Libia si mentawian wo eng Kirene, sé tou imanangkéi a Roma,

¹¹sé tou Yahudi wo sé tou ra'ica Yahudi sé mengakiit in agama Yahudi. Wo awéan ka'i sé tou Kreta wo sé tou Arab. Icita im baya iluminga iséra maroma' imaké i nunuwu'ta in esa andumoro' ing kakaya'kaan wangko' sé niéma' i Amang Kasuruan.”

¹²Séra im baya manguré-ngurésé in do'kos wo mangaya-ngaya'ka' wo mengkung-kuanan, “Sapa réén eng kaangéan in anio'?”

¹³Taan sé walina asaloke' mengasindir, “Séra im baya linangu in anggor tombal.”

¹⁴Wo si Petrus tumulung mewali-wali wo sé sangapulu' esa ruru'du'an walina. Icuana ang karapi in taangko' a sé tou keli itu, “Éi tou Yahudi wo pakasa in tou sé maento' an Yerusalem! Wéannio' rékén sumama-sama' en icuaku ai camu sapa e mamuali am bia'i.

¹⁵Kami ra'ica imalangu tanu im paweroten iow. Intarépé' jam sembilané' i mamoondo, anaé ra'ica wutul sa kami melepo in anggor.

¹⁶Taan sapa em pinalingao miow intarépé', en itu aicuao i Amang Kasuruan a si nabi Yoel:

¹⁷ ‘Asi endo-endo kaka'puan, itumpa-Ku oka e Roh-Ku a sé pakasa in tou. Sé toyaang iow tuama wo wéwéné kumua oka i nunuwuun-Ku a sé tou. Sé mangalitou wo mangala'un makéré oka papaturu'an wo sé matu'a makéré oka pangipin.

¹⁸Asi endo-endo itu, itumpa-Ku oka e Roh-Ku a sé ata-Ku tuama wo wéwéné, wo séra kumua oka ka'i i nunuwu'-Ku.

¹⁹Émaan-Ku oka ka'i eng kakaya'kaan-kakaya'kaan a mangé en dangka' an langit, wo en tuu-tuus sé ra'io cakua an darem ing kayo'baan: awéan oka enda', api wo pulu-pulut in tembur.

²⁰Si yéndo mariréimbeng oka keli wo en serap maréindang oka tanu in enda'. Pakasa en itu mamuali owo an tutuw ra'ipé' imai en endo i Casuruan, si endo wangko' wo ra'io icakua itu.

²¹Wo si séi e mekiupus a si Casuruan, isia itu lowiren oka.’

²²Éi tou Israel, linganai sumama-sama' en cuaku anio'! Si Yesus tou Nazaret itu ayutuso mai i Amang Kasuruan. Wo kailekanta sapaoka si Amang Kasuruan maké Sia en tumuru' ing kawasa wo ing kakaya'kaan-kakaya'kaan wo tuu-tuus sé ra'io icakua sé mamuali an uner iow.

²³ Si Yesus anio' aisarakano i Amang Kasuruan ai camu kiit im basa-Na. Wo Sia aisalip wo pinatéo miow ang karapi in sumarakan Sia a sé tou sé ra'ica makiit in ukum.

²⁴ Taan Sia tinou sumawel i Amang Kasuruan wo iwekar-Na asi kawenduan im papaté ampa'paan em papaté ra'ica makawoo kumawasa Sia.

²⁵ Indior si Daud sumangkumo kumua in andumoro' i Yesus tana'i, ‘Kaséréanku si Casuruan tatap an diorku. Sia ang kakanku, ampa'paano in itu aku ra'ica wana kaindé'an.

²⁶Ampa'paano in itu en atéku arui, em ba'ba'ku marayo-rayo Sia, wo ka'i en owakku maara-arap ai Sia.

²⁷Ampa'paan ra'ica iwaya i Casuruan aku mento' melala'us ang kakawasaan im papaté, wo ra'ica iwaya i Casuruan en owak i Tou-Na Le'nas mawuruk an untep ing kubur.

²⁸Si Casuruan itumuru'o in lalan a yaku wosama' ro'na kéréanku eng katouan akar ing kauré-uré. Émaan i Casuruan aku wutu-wutul arui an dior-Na.’

²⁹Poo-poow, icuaku ai camu ang karapi im butul andumoro' si Daud, si apo'ta. Si aicuana itu, ra'ica andumoro' in owakna in esa ampa'paan sia in esa imatéo wo aicuburo, wo eng kuburna awéané' akar intarépé' asi kota anio'.

³⁰ Taan si Daud anio' nabi wo kailekanna sa si Amang Kasuruan ijumanjio ai sia ang karapi in sumpa sapaoka esa asé taranakna mamuali oka kolano.

³¹Ampa'paano in itu airiornao icumua sapa e mamuali oka sa. An tutuw itu aicuanao andumoro' si Mesias touen oka sumawel. Sia ra'ica iwaya i Amang Kasuruan kawasan im papaté wo en owak-Na ra'ica mawuruk.

³²Si Yesus anioo si tinou sumawel i Amang Kasuruan. Wo icamio im baya e mamuali sairi andumoro' in itu.

³³Intarépé', si Yesus niangkaio mangé i Amang Kasuruan ang kakan-Na an tampa pasiri-siriin wo tumerimao i Roh Le'nas si aijanji-Nao indior. E Roh Le'nas itu, iwéé-Nao ka'i ai cami, si sinéré wo liningao miow am bia'i.

³⁴ Si Daud in esa ra'ica icaangkai angé an sorga, taan taré sia icumuake' tana'i, ‘Si Amang Kasuruan icumua a si Tuangku:

³⁵Lumukuto mai asi tampa pasiri-siriin ang kakan-Ku, akar sé kaséké'-Mu iweta'-Ku an darem ing kécéi-Mu.’

³⁶Ampa'paano in itu pakasa sé tou Israel musti wutu-wutul makailek sapaoka si Yesus si aipaku miow ang kayu salip itu, Siao si niangkai i Amang Kasuruan mamuali Kasuruan wo Kristus.”

³⁷An tutuw éra luminga waya in itu, en até éra mendam i manesel wo séra mamuéi a si Petrus wo sé ruru'du'an walina, “Poo-poow, sapa réén e musti émaan ami?”

³⁸Isowat i Petrus ai séra, “Mape'diso wo terimano em baptisan a ngaran i Yesus Kristus wosama' eng kamesé-meséaan iow ampungan oka. Wo in taniitu teriman oka miow en tatambér-Na, siituo si Roh Le'nas.

³⁹Ampa'paan sé aijanjio i Amang Kasuruan itu torona pakasa in tou sé tinowa-Na, icauntep icamu wo sé taranak iow wo ka'i pakasa en tou sé maento' an tampa-tampa tayang.”

⁴⁰Keliané' ka'i en aicua i Petrus ai séra. Sia masairi ka'i wo méé kaketeran an até éra, icuana, “Iwééo mio' en owak iow lowiren i Casuruan, tioo kumiit sé tou intarépé' sé mengéma-ngéma' in léwo'.”

⁴¹Kumawus in itu, sé tou itumerima i nunuwuun i Petrus, séra méé in owak em baptisen. Asi témpo ituke', sé tou maéman a si Yesus makaawes eng kakeli mamuali telu ngariwu tou.

⁴²Séra mengali'us mewali-wali wo le'tek mengalinga sé ruru'du'an mengasusui in andumoro' i Yesus. Wo séra tatap mengaéma' im perjamuan wo mengasombayang.

⁴³Asi témpo itu, sé ruru'du'an itu iméma' kelian tuus kakaya'kaan wo tuu-tuus sé ra'io icakua en tumuru' ing kakawasaan i Casuruan, akar pakasa en tou maindé' wo sumiri' si Amang Kasuruan.

⁴⁴ Pakasa en tou sé maémano itu tatap meesa wo pakasa en anu i esa wo si esa, anu ka'i éra im baya.

⁴⁵Wo tatap awéan ai séra e mengawangkér ing kasiyaanna. Wo en doit kinéréan, ipengawéténg éra a sé tou kiit ing kaperluan éra i esa wo si esa.

⁴⁶Wo susur in endo séra le'tek mewali-wali wo meesa en até mengali'us ang am Balé Le'nas. Séra mengaéma' im perjamuan mewali-wali ang karapi in arui wo lekep en até si pagilir am balé-walé.

⁴⁷Séra marayo si Amang Kasuruan wo ka'i casalé' é tou keli. Wo susur in endo pengawe-ngawesan i Casuruan eng kakeli é tou maéman itu ang karapi é tou sé pakalowirené'.