Read Tontemboan Kisah Para Rasul 20 Bible Online

Kisah Para Rasul 20 - Tontemboan bible

Kisah Para Rasul 20

¹An tutuw é tou an Efesus meelurano wo towan i Paulus sé tou maéman am bitu wo wéanna kaketeran em paémanen. Wo sia mekiupus en tumela'u iséra wo mangé a Makedonia.

²A Makedonia, sia menuli-nuli a sé tou maéman wo méé kaketeran im paémanen ai séra. Wo sia mangé an Yunani.

³An Yunani sia mento' telu ngaserap. Wo sia tu'tulo en suméngkot maangé an Siria. Mesakéo woo sia ang kapal, kalingaanna sa sé tou Yahudi a mangé mbitu mawasa e maté sia. Ampa'paan in ituo sia ra'ica mamuali sumaké ang kapal taan maréngke' sumawel an Antiokhia kumiit in lalan katanaan lumangkoi a Makedonia.

⁴Awéan piraan tou en cumiit a si Paulus, séra itu si Sopater toyaang i Pirus tou im Berea, si Aristarkus wo si Sekundus tou Tesalonika, si Gayus tou in Derbe, si Timotius, sé rua tou an Asia owo, si Tikhikus wo si Trofimus.

⁵Séra e rumior mangé wo mento' icami an Troas.

⁶Kekawus in endo wangko' Roti Ra'ica Rinagian, kami tumela'u in Filipi wo suméngkot angé an Troas. Lima ngando eng kauréna em bawayaan ami wo kami meta'up wo iséra sé rumioro itu wo kami mento' pitu ngando eng kauréna.

⁷Asi endo kataré in duminggu itu, cami wo sé tou maéman walina mai mali'us mewali-wali e méma' im perjamuan. Am bitu si Paulus uré-uréan manuwu' a sé tou maéman akar ing katoora im bengi, ampa'paan asi mando mai sia suméngkot.

⁸Asi témpo itu, kami mali'us an esa tampa an dangka'. Am bitu kelian sosoloan sé niéngkétan.

⁹Wo awéan esa mangalitou makangaran Eutikhus, sia makalukut an régél in jandéla. Si mangalitou itu ra'io makalesen ing kili', ampa'paan si Paulus uré keli manuwu'. Sumiwak si mangalitou itu kakili'an wo sia asi salé' katelu owo sia lumepokio'. An tutuw éra mangkai isia, sia imatéo.

¹⁰Ampa'paan in ituo si Paulus tumumpa mio' an darem. Sia rumepa asi mangalitou itu wo kume'kep si mangalitou itu wo icuana a sé tou am bitu, “Tioo maindé-indé', sia menonoué.'”

¹¹Kumawus in itu si Paulus maréng angé sumawel an dangka'. Am bitu te'bi-te'biinna e roti wo séra kuman mewali-wali. Makakanai uré-uréané' ka'i sia maroma' wo iséra akar i mamoondo. Wo itela'una en Troas.

¹²Wo iwali é tou si mangalitou si tinou sumawel itu am baléna, wo séra im baya wutu-wutul maarui.

¹³Kumawus in itu, kami metané lalan wo si Paulus wo meta'up oka an Asos tanu im pawasana. Ampa'paan in ituo kami rumior angé sumaké ang kapal, taan si Paulus kumiit in lalan katanaan.

¹⁴An tutuw ami meta'up wo si Paulus an Asos, sia kumiit wo icami sumaké ang kapal. Kumawus in itu, kami suméngkot angé a Metilene.

¹⁵A Metilene, kami lumala'us suméngkot wo mando mai eng kapal ami makasaruo im pulou Khios. Ang kandoan kami icateka'o am pulou Samos wo an endo kumiitai itu kami icateka' ang kota Miletus.

¹⁶Si Paulus masalé' keli rior icateka' an Yerusalem, ampa'paan icasalé'na asi endo wangko' Pentakosta sia a mangéo mbitu. Ampa'paan in itu ra'ica kiimna en tumuli an Efesus wosama' en témpona ra'ica maka'pu an Asia.

¹⁷Anaé, an tutuw i Paulus a Miletus, sia rumu'du' tou mangé tumowa sé penatua é jamaat an Efesus wosama' mai a Miletus.

¹⁸An tutuw éra icateka' mai a Miletus, icua i Paulus ai séra, “Poo-poow, kailekano miow tambisa eng katouanku an tutuwku mewali-wali wo icamu tumo'tolai asi endo kataré aku icateka' an Asia anio'.

¹⁹Ang karapi ing kako'kosan in até aku sumelewir si Casuruan wo makakeli-keli aku maamé' wo keli mamendam im pangepé'an ampa'paan sé tou Yahudi maaté-até in léwo' e maté yaku.

²⁰Taan aku kasake' tumawang icamu wosama' em paémanen iow mengawe-ngawes. Pakasa aicuakuo wo aisusuikuo ai camu an dior é tou keli wo ka'i am balé-walé.

²¹Pengua-nguaku a sé tou Yahudi wo a sé tou ra'ica Yahudi wosama' séra mape'dis wo kumiit a si Amang Kasuruan wo séra musti maéman a si Apo' Yesus.

²²Intarépé' aku maangém an Yerusalem ampa'paan airu'du' i Roh Le'nas. Ra'ica kailekanku sapa e mamuali a yaku a mangé mbitu.

²³Taan am bisa-wisa kota si niangéankuo, e Roh Le'nas icumuao a yaku sa an Yerusalem aku meta'up ing kawenduan wo yuntep ka'i am bui.

²⁴ Taan ra'io pandungenku eng katouanku, asalo ro'na lekepenku en tawoien si aiwéé i Apo' Yesus a yaku eng kumua in Abar Kaaruien andumoro' in upus aitambér i Amang Kasuruan a sé cita in tou.

²⁵Intarépé' icuaku ai camu sapaoka icamu ra'io meta'up wo yaku. An tutuwku i mewali-wali wo icamu, aicuakuo tambisa e mamuali tou i Amang Kasuruan.

²⁶Ampa'paan in ituo, asi endo anio' icuaku ai camu, sa kawisa mangé an esaan angé ai camu awéan e maté taan ra'ipé' maéman a si Yesus, en itu ra'ica kameséaanku.

²⁷Ampa'paan kasake' pengua-nguaku ai camu pakasa sé andumoro' im basa i Amang Kasuruan ai camu.

²⁸Ampa'paan in ituo, musti téiran iow sumama-sama' en owak iow in esa wo sé jamaat si aiwéé i Roh Le'nas en téiran iow. Téiran iow sé jamaat i Amang Kasuruan tanu si gembala matéir sé domba-Na. Sé jamaat itu mamuali anu i Amang Kasuruan ampa'paan linowir-Na séra in enda'-Na in esa.

²⁹Kailekanku sa kamu itela'uku, sé tou i makaperi meputé wo sé serigala luméwo-léwo' muntep oka an uner iow. Raméjin éra tumeri sé jamaat si pakatéiran iow itu.

³⁰Lébé-lébé an uner iow in esa maai oka sé tou eng kumua in sususuien sé ra'ica wutul. Émaan éra in taniitu wosama' sé tou sé maémano a si Yesus ra'io ka'i maéman wo kumiit oka iséra.

³¹Ampa'paan in ituo, mareti-retio mangé kamu. Musti pena'né-na'néi iow sapaoka ang kauré in telu ngata'un aku mewali-wali wo icamu, endo wo em bengi kamu pengasina'uenku si esa wo si esa akar en danona im berenku menii-niis.

³²Intarépé', isarakanku kamu a si Amang Kasuruan wosama' kamu téiran-Na. Wo musti ka'i pena'né-na'néien iow en Abar Kaaruien andumoro' in upus tatambér-Na ai camu. En abar itu e méé ing kaketeran am paémanen iow wo ka'i si méé oka ing kamang si aijanji-Nao iwéé a sé pakasa sé tou si niéma'-Nao le'nas.

³³Yaku ra'ica kawisa masalé' i mas, pérak kuma'pa karai asi séike' mangé.

³⁴Kailekano miow ka'i sa aku matawoi ang karapi ing kamaku in esa, akar ro'na kawooanku, pakasa eng kaperluan in owakku wo sé kara-karapiku sé mengakiit yaku.

³⁵Pakasa sé niéma'kuo itu, mééo esa tuus ai camu sapaoka ang karapi in tumawoi le'tek tanu siitu, ro'na sémbonganta sé tou lembi. Wo musti ta'néienta si aicua i Apo' Yesus in tana'i, ‘Lébé arui mengawéé wotaré mengaterima.’ ”

³⁶Kumawus ako kumua in taniitu, si Paulus kumundu wo sumombayang mewali-wali wo iséra im baya.

³⁷Wo séra im baya maamé', ke'kepen éra sia wo penyio-nyioman éra.

³⁸En até éra susa keli, lébé-lébé ka'i an tutuw sia icumua sapaoka séra ra'io meta'up wo isia. Kumawus in itu, sia iwali éra mangé ang kapal.