Read Tontemboan Kisah Para Rasul 21 Bible Online

Kisah Para Rasul 21 - Tontemboan bible

Kisah Para Rasul 21

¹Kekawus ami metalicur wo sé penatua é jamaat an Efesus owo, kami makala'us sumaké ang kapal mangé am pulou Kos. Mando mai, kami icateka' am pulou Rodos, am bitu oka eng kapal ami mangé am Patara.

²Am Patara kami makéré kapal walina si maangé am Fenisia. Anaé, kami sumaké ang kapal itu en lumala'us im bawayaan.

³Wo kaséréan ami em pulou Siprus ang ka'biri, taan kami ra'ica itumuli am bitu. Eng kapal sinakéan ami melala'uske' mangé an Tirus an Siria, ampa'paan em barang-barang ang kapal musti itumpa am bitu.

⁴Am bitu, kami mangé masiar a sé tou maéman wo mento' ang karapi éra esa duminggu eng kauréna. Wo icua i Roh Le'nas ai séra e mokéi a si Paulus wosama' sia ra'ica toro mangé an Yerusalem.

⁵Taan ampa'paan maka'puo en témpo ami mento' am bitu, kami lumala'uso im bawayaan ami. Pakasa en tou maéman wo sé penanaan wo sé toyaang éra, makawali icami akar ang kesot ing kota. An tutuw ami icateka'o mangé an tembir in ta'sic, kami im baya kumundu wo sumombayang.

⁶Kekawus in itu, kami mangileko permisi ai séra en lumala'us im bawayaan wo kami sumaké ang kapal. Wo pakasa séra maréng angé am balé.

⁷Tela'u ami en Tirus wo sumaké kapal e mangé am Ptolemais. Kami tumumpa am bitu wo tumuli a sé poo-poow sé maémano wo méé in siri' ai séra wo mento' sangando am bitu mewali-wali wo iséra.

⁸ Mando mai, itela'u ami em Ptolemais wo suméngkot angé ka'i ang Kaisarea. Am bitu kami mento' am balé i Filipus si mengakua in Abar Kaaruien andumoro' i Yesus Kristus. Si Filipus itu esaan asé pitu tou sé kinasisiran an Yerusalem en sumelewir a sé balu lengéi.

⁹Sia makatoyaang epat mangala'un. Sé toyaangna itu tinambéranai kamang i Amang Kasuruan e mengakua i nunuwu'-Na.

¹⁰ An tutuw kami pirao ngando makaento' am bitu wo mai si esa nabi an Yudea owo, sia makangaran Agabus.

¹¹Sia mai ai cami wo indonna en tali si pakawe'ber am pinggang i Paulus. Wa'kesenna eng kama wo eng kécéina wo kumua, “Aicua i Roh Le'nas tana'i, ‘Si tou makaanu in tali anio', sia wa'kesen oka é tou Yahudi an Yerusalem wo isarakan éra oka a sé tou ra'ica Yahudi.’ ”

¹²Kelinga ami in itu, kami wo pakasa sé tou maéman ang Kaisarea mekiupus a si Paulus wosama' sia nomoo mangé an Yerusalem

¹³Taan sinowatke' i Paulus, “Kéitu réén kamu maamé' taniitu? Kamu iméma'o in atéku mawendu. Sapake' e mamuali an Yerusalem, yaku tu'tulo, ra'ica im ba'kesenke' taan ka'i tu'tulo i maté ampa'paan i Apo' Yesus.”

¹⁴Anaé, ampa'paan si Paulus ra'ica kiim luminga sapa en aicua ami, ampa'paan in ituo waya-wayaano taré e mamuali wo icua ami, “Mandéo eng kasalé'anke' i Casuruan e mamuali.”

¹⁵An tutuw pirao ngando kami makaento' ang Kaisarea, kami tumu'tulo im barang ami wo mangé an Yerusalem.

¹⁶Wo awéan piraan tou maéman ang Kaisarea kumiit ka'i wo icami. Iwali éra kami mangé am balé i esa tou makangaran Manason wosama' kami mento' am bitu. Si Manason itu am pulou Siprus owo, wo uréo maéman a si Yesus.

¹⁷An tutuw ami icateka' an Yerusalem, pakasa en tou maéman sumungkul icami ang karapi in arui en até.

¹⁸Mando mai, si Paulus mangé mewali-wali wo icami meta'up wo si Yakobus. Pakasa sé penatua am bituo ka'i.

¹⁹Si Paulus méé in siri' ai séra. Wo isisilna waya ai séra e niéma' i Amang Kasuruan a sé tou ra'ica Yahudi, tutuwna i mangé kumua in Abar Kaaruien andumoro' i Yesus Kristus an tampa éra.

²⁰Kelinga in itu, séra rumayo wo sumiri' si Amang Kasuruan. Wo icua éra a si Paulus, “Éi poow! Musti kailekanmu sapaoka mariwuo eng kakeli é tou Yahudi maémano wo re'dem makiit in ukum Torat.

²¹Taan pinalinga érao ka'i andumoro' sé ipasusuimu a sé pakasa é tou Yahudi sé maento' an uner é bangsa walina, sapaoka séra nomoo makiit in ukum Torat. Wo aicuamu kiné, sapaoka sé toyaang nomoo sunaten wo ka'i nomoo menonou makiit ing kanaramenta.

²²Anaé, intarépé' tambisa réén? Ampa'paan séra tantu luminga oka sapaoka ko imayo am bia'i.

²³ Ampa'paano in itu, émaano mangé sapa si icua ami anio': An uner ami am bia'i, awéan epat tou sé jumanjio a si Casuruan.

²⁴Walimu mangé séra wo émaano mangé eng kanaramen meresi in owak,[6] ico mewali-wali wo iséra. Wérano en ongkos i mapala'ngas im buuk éra. Wo in taniitu, pakasa en tou ro'na makailek sapaoka pakasa en abar sé pinalinga éra andumoro' ico, ra'ica wutul, ampa'paan ico in esa kumiit in ukum Torat.

²⁵ Taan andumoro' é tou ra'ica Yahudi sé maémano, séra kinirimano ami surat andumoro' sé pinusé' amio. Em pinusé' ami itu tana'i: séra ra'ica toro kuman ing kakanen sé ayumpero a sé opo-opo', ra'ica toro kuman in enda' kuma'pa kuman sé binatang imaté ampa'paan kinisel, wo ra'ica toro mengabersina.”

²⁶Anaé, woondona mai, iwali i Paulus sé epat tou itu mewali-wali wo isia. Kiitenna eng kanaramen e meresi in owak, sia wo iséra. Wo sia muntep am Balé Le'nas eng kumua sa kawisa kumawus eng kanaramen meresi in owak itu. Wo sa kumawuso en témpona, séra im baya méé oka raragésan a si Casuruan.

²⁷An tutuw mekawu-kawuso em pitu ngando, wo sé tou Yahudi sé an Asia owo mai suméré si Paulus si an untep im Balé Le'nas. Pasoon éra i nunuwu' léwo' sé tou am bitu wo tumangka' isia.

²⁸Séra mangko', “Éi tou Israel, tawangen kami! Siao si mangé am bisa-wisa e masusui pakasa sé tou ang karapi in sususuien sé makélong sé touta Israel wo en ukum Torat wo em Balé Le'nas anio'! Wo intarépé' sia makawali mai sé tou ra'ica Yahudi am Balé Le'nas anio' wo méma' in tampa le'nas anio' manajis!”

²⁹ Séra kumua in taniitu ampa'paan séra sumangkumo suméré si Trofimus si tou Efesus mewali-wali wo si Paulus an Yerusalem. Wo paweroten éra si Trofimus aiwali mai i Paulus e muntep am Balé Le'nas.

³⁰Pakasa en tou an Yerusalem malicokoo wo séra mai mali'- us am bitu. Wo tangkaan éra sia wo wésoon éra icesot am Balé Le'nas. An tutuw ituke' pakasa em papalen wangker am Balé Le'nas itu makala'us pinalenan.

³¹Ang karoro'an éra i rumaméji e maté sia, awéan e mangé mower a si kikiiten é suraro Romawi sapaoka pakasa en Yerusalem malicokoo.

³²Ampa'paan in ituo, iwalina sé surarona wo sé perwira mangé an tampa si malicokoo itu. An tutuw sérén é tou si kikiiten itu wo sé surarona maayo wo séra mento' matepi si Paulus.

³³Icateka' am bitu, si kikiiten itu rumuru mangé a si Paulus wo tangkaanna sia. Wo iru'du' i kikiiten itu si Paulus wa'kesen maké rua ranté. Wo pemué-muéienna si séi si Paulus wo sapa e niéma'na.

³⁴Taan an uner é tou keli itu awéan e maangko' ai sia tana'i wo awéan ka'i e maangko' taniitu. Wo ampa'paan i malicokoo taniitu, akar ra'ica kailekanna sapa e imamuali. Ampa'paan in ituo ru'du'na si Paulus iwali mangé a markas.

³⁵An tutuw éra icateka' mangé an daran, sé tou keli itu mendun-dukéan. Ampa'paan ituo, angkaien é suraro sia yuntep a markas.

³⁶Sé tou keli itu mewali-wali makiit in somoi wo maangko' “Paténo sia!”

³⁷An tutuw i Paulus iwali éra woo a markas, sia mamuéi a si kikiiten é suraro Romawi itu, “Ro'na aku mepaar wo si tuang?” Isowat i kikiiten itu, “Makailek réén manuwu' i nunuwu' é Yunani ko?

³⁸Anaé, ra'ica réén tou Mesir ko, si weru-weru anio' méma' ing kalicokoan wo si makawali mangé epat ngariwu tou sé mengalicoko makalulutaw tumincas an tana' kapayasan?”

³⁹Isowat i Paulus, “Ra'ica é tuang. Yaku tou Yahudi, an Tarsus owo, kota si kailekano keli ang Kilikia. Pangilekenku wosama' aku ro'na rumoma' a sé tou keli itu.”

⁴⁰Wo wéanna kaloasan a si Paulus e rumoma'. Si Paulus mangé tumulung an daran wo suméin ing kama a sé tou keli itu. An tutuw é tou imeneso, sia tumo'tolo rumoma' ai séra maké i nunuwu' é Ibrani, icuana: