Read Tontemboan Kisah Para Rasul 22 Bible Online

Kisah Para Rasul 22 - Tontemboan bible

Kisah Para Rasul 22

¹“Éi tuang-tuang wo sé poo-poow, lingan iow, awéan en icuaku ai camu e méla in owakku!”

²Si Paulus maroma' a sé tou keli itu maké i nunuwu' é Ibrani. An tutuw lingan éra e nunuwu'na itu wo séra wutu-wutul menes. Icuana ka'i,

³ “Yaku tou Yahudi, itumou an Tarsus an tana' Kilikia, taan imawangko' an Yerusalem anio'. Si guruku makangaran Gamaliel. Yaku sinusuianna in sama' andumoro' in ukum Torat si aiwéé i Musa a sé apo-apo'ta. Pakasa en atoran i Amang Kasuruan itu pengaémaanku waya tanu ka'i im pengaémaan iow intarépé'.

⁴ Indior, paokoienku sé tou makiit in sususuien i Yesus akar imaté. Tangkaanku sé tuama wo sé wéwéné wo yuntepku am bui.

⁵Sé niéma'ku itu, kailekan i imam wangko' wo sé anggota i Mahkamah Agama, séra oka e méé kasairian ai camu sapaoka en itu wutul. Wo isérao itu ka'i e méé in surat kawasa a yaku em paalin a sé tou Yahudi an Damsyik. Anaé, ang karapi in surat kawasa itu, yaku ro'na tumangka' sé tou makiit in sususuien i Yesus sé an Damsyik. Kekawus in itu iwaliku mangé séra an Yerusalem en ukumen.

⁶Am bawayaanku matawio in Damsyik, wona' katoora i yéndo tumarépé'anke'mai sumendotai en sélap tuméla-télang an langit owo lumi'cir yaku.

⁷Wo aku makala'us icare'ba an tana' wo kalingaanku awéan suara makua in tana'i, ‘Saulus, Saulus, kéitu réén ko maoko-okoi Yaku?’

⁸Isowatku i mamuéi, ‘Si séi réén ko é Tuang?’ Wo en suara itu kumua, ‘Yakuo si Yesus, si tou Nazaret si paoko-okoienmu.’

⁹Asi témpo itu, sé tou imewali-wali wo yaku makaséré ka'i in sendot itu. Taan en suara i rumoma' a yaku, ra'ica kinalingaan éra.

¹⁰Wo icuaku, ‘O Apo' Yesus, sapa réén e musti émaanku?’ Isowat i Apo' Yesus a yaku, ‘Tumulungo wo mangém an Damsyik. A mangé mbitu icua-Ku oka ai co sapa en émaanmu.’

¹¹Kekawus in itu, yaku ra'io toro suméré ampa'paan in sendot tumélangai im berenku itu. Anaé, aku iwali é kara-karapiku sé mewali-wali wo yaku wo timboian éra eng kamaku mangé an Damsyik.

¹²An Damsyik, awéan si esa tou, makangaran Ananias. Sia le'tek makiit in ukum Torat. Wo pakasa sé tou Yahudi am bitu, makailek sa sia tou sama'.

¹³Sia mai rumuru a yaku wo kumua tana'i, ‘Saulus, poowku maémano, suméréo sumawel ko!’ An tutuw ituke', yaku ro'nao suméré sumawel wo tuméinteng sia.

¹⁴Wo icua i Ananias a yaku tana'i, ‘Ico, aitantuo i Amang Kasuruan si paapo'an é apo-apo'ta, wosama' ro'na kailekanmu eng kasalé'an-Na wo ka'i suméré si Yesus Si Wutul itu wo ka'i luminga in suara si lumembo am ba'ba'-Na.

¹⁵Ampa'paan ko musti mamuali sairi-Na wo icuamu oka a sé pakasa in tou sapa en sinéré wo en liningamu.

¹⁶Wo intarépé', nomoo menguré-ngurépé'! Tumulungo wo iwééo mangé en owakmu baptisen wo mangilek angé a si Casuruan wosama' ampungan-Na eng kamesé-meséaanmu.’

¹⁷Kumawus in itu, aku maréng angé sumawel an Yerusalem wo sumombayang am Balé Le'nas. Ang karoro'anku i masombayang, e rohku kinawasa i Roh Le'nas.

¹⁸Kaséréanku si Apo' Yesus, makua a yaku tana'i, ‘Mario-rioro itela'u en Yerusalem anio', ampa'paan séra ra'ica masalé' tumerima in sapa en aisairimu andumoro' Yaku.’

¹⁹Wo isowatku, ‘O Kasuruan, kailekan éra sapaoka yakuo si indior mengunte-nguntep am balé-walé paapo'an é agama Yahudi en tumangka' sé tou maéman a si Apo' Yesus en yuntep am bui wo pasamboken.

²⁰ Taniitu ka'i an tutuw éra imaté si Stefanus si sairi i Casuruan itu, yaku am bitu wo niénanku ka'i e niéma' éra itu. Wo yakuo ka'i en tuméir ing karai éra tutuw éra i maté sia.’

²¹Taan icua i Casuruan a yaku, ‘Mangém, iru'du'-Ku oka ko mangé tumayang asi tampa anio' wo mangé a sé bangsa ra'ica Yahudi.’ ”

²²An tutuw lingan é tou Yahudi sa si Amang Kasuruan irumu'du'o si Paulus mangé a sé tou ra'ica Yahudi, sé tou itu tumo'tolo maangko', “Si tou anio' ra'ica patus menonou. Paténo sia!”

²³Séra mengangko-ngangko' akar i memangki-mangkil in juba éra. Wo séra ka'i mawuras angé in awu ampa'paan séra mae'bowo keli.

²⁴Ampa'paano in itu peréntan i kikiiten é suraro Romawi e makawali si Paulus a markas. Am bitu, si Paulus pineriksa wo pasamboken wosama' ro'na kakailekan ampa'paan in sapa sé tou keli itu mengangko-ngangko' a si Paulus.

²⁵Taan an tutuw éra i ma'kes wo sumambok sia, icuana a si perwira si matawoi am bitu, “Sa kumiit in atoran é pemerénta Romawi, ro'na réén sumambok si esa tou Romawi sa si tou itu ra'ipé' pineriksa?”

²⁶Kelinga in itu, si perwira si karoro'an i matawoi itu makala'- us mangé kumua a si kikiiten é suraro Romawi, icuana, “Tuang, si tou itu réén, tou Romawi. Sapa réén en émaanmu ai sia?”

²⁷Wo si kikiiten é suraro itu mangé a si Paulus wo mamuéi, “Icuamu mai. Wutul réén ko tou Romawi?” Isowat i Paulus, “Wutul é tuang.”

²⁸Wo icua i kikiiten itu, “Yaku mamuali tou Romawi, sosor keli en aiwérku!” Isowat i Paulus, “Taan aku awéan hak itu, ampa'paan ketouke' mai mamualio tou Romawi.”

²⁹Kelinga in aicua i Paulus sapaoka sia tou Romawi, anaé sé tou mesambo-sambok woo si Paulus makala'us sumoro' ai sia. Wo si kikiiten é suraro itu ka'i maindé' ampa'paan kinailekannao si Paulus si airu'du'na wa'kesen itu tou Roma.

³⁰Si kikiiten é suraro Romawi itu masalé' makailek waya ampa'paano in sapa sé tou Yahudi tumudu si Paulus. Ampa'paano in itu, asi woondona mai, ru'du'na icesot si Paulus am bui. Wo iru'du'na wosama' sé kikiiten é imam wo sé anggota Mahkamah Agama walina e mali'us. Iwalina si Paulus kumesot a markas wo mangé isaru ai séra.