Read Tontemboan Kisah Para Rasul 23 Bible Online

Kisah Para Rasul 23 - Tontemboan bible

Kisah Para Rasul 23

¹An tutuw i Paulus aisaru a sé anggota Mahkamah Agama, téintengenna séra wo kumua, “Éi poo-poow, akar asi endo anio' aku menonou ang karapi in até weresi an dior i Amang Kasuruan.”

²Kelinga in itu, si imam wangko' Ananias rumu'du' sé tou makatulung an duru i Paulus wosama' sumepé' im ba'ba'na.

³ Wo icua i Paulus a si Ananias, “Éi, tou punek! Suliin oka i Amang Kasuruan en sumepé' ico. Ico ilumukut am bitu en sumidang yaku iciit in ukum Torat, taan ico in esa ka'i sumundur in ukum Torat e merénta tou sumepé' yaku.”

⁴Kelinga in itu, icua é tou am bitu, “Brani keli ko maséro' si imam wangko' i Amang Kasuruan.”

⁵ Wo isowat i Paulus, “Poo-poow, ra'ica kailekanku sa sia itu imam wangko'. Mémang aipatic ang Kitap Le'nas tana'i, ‘Tioo kamu maroma' in léwo' andumoro' si kikiiten iow.’ ”

⁶ An tutuw kailekan i Paulus sapaoka sé anggota Mahkamah Agama itu awéan rua golongan, si esa Saduki wo si esa ka'i Farisi wo sia kumua in taangko', “Poo-poow, sé matu'aku tou Farisi wo aku ka'i tou Farisi. Yaku aisaru a Mahkamah anio' ampa'paan percayanku sa sé tou imatéo touen sumawel i Amang Kasuruan.”

⁷An tutuw sia kumua in taniitu, sé tou Farisi wo sé tou Saduki tumo'tolo meindo-indoan roma' akar sé tou keli mamualio rua ngareru'.

⁸ Séra meindo-indoan roma' ampa'paan tana'i, sé tou Saduki ra'ica mapercaya sa sé tou imatéo ro'na tumou sumawel. Wo ka'i ra'ica mapercaya sapaoka awéan roh wo malaékat. Taan, sé tou Farisi mapercaya sapaoka andumoro' in itu awéan waya.

⁹Ampa'paano in itu, en am bitu malicokoo. Wo piraan sé makailek wutul in Torat asé golongan Farisi mai an dior wo méla si Paulus. Icua éra, “Sa kumiit icami, si tou anio' ra'ica isuméa'! Séi si makailek awéan roh kuma'pa malaékat imai wo rumoma' ai sia?”

¹⁰Wo makarepeto meindo-indoan roma' sé tou Saduki wo sé tou Farisi akar si kikiiten é suraro Romawi maindé' oréoka pesémbongan éra i mokoi si Paulus. Anaé, peréntanna sé surarona tumumpa mio' an darem e mindo si Paulus an uner é tou keli itu wo maali sia a markas.

¹¹Asi woondona mai tutuw i mawengio, si Apo' Yesus mai tumulung an duru i Paulus wo kumua, “Ico ra'ica toro maindé'! Kete-ketereno en atému. Ico imééo kasairian andumoro' Yaku a sé tou Yerusalem anio' wo ka'i ko musti mangé méé kasairian tanu sia'i andumoro' Yaku a Roma.”

¹²Asi mamoondo mai sé tou Yahudi meesa wo sumumpa in owak sapaoka séra ra'ipé' kiim kuman wo melep, sa ra'ipé' imaté si Paulus.

¹³Eng kakeli é tou Yahudi sé meesa itu lébé epat ngapulu' tou.

¹⁴Wo séra mangé a sé kikiiten é imam wo sé matu'a é tou Yahudi wo kumua, “Kami isumumpao sapaoka kami ra'- ica kuman wo ra'ica melep sa si Paulus ra'ipé' pinaté.

¹⁵Intarépé' icasalé' ami tana'i, aweso taré sé tuang wo sé anggota Mahkamah Agama mangé rumu'du' si kikiiten é suraro Romawi wosama' isaruna sumawel si Paulus a sé tuang, tanuoka kéndo' periksan iow sumawel ang karapi in sama'. Taan, ra'ipé' icateka' si Paulus a sé tuang, icami tu'tulo maté isia.”

¹⁶Taan em pawasa-wasan éra itu lininga i toyaang i kapetuari wéwéné i Paulus. Pakasa em pinalingana, mangé icuana a si Paulus a markas.

¹⁷Kelinga in itu wo towan i Paulus si esa perwira wo kumua ai sia, “Tuang, pekiupusenku iwali mangé si mangalitou anio' a si kikiiten i tuang, ampa'paan awéan en icuana a si kikiiten i tuang.”

¹⁸Wo iwali mangé i esa perwira itu si mangalitou itu a si kikiiten é suraro Romawi wo icuana, “Tuang, si Paulus si tinangta itu mekiupus a yaku wosama' makawali si mangalitou anio' a si tuang, ampa'paan awéan en icua i mangalitou anio' a si tuang.”

¹⁹Wo timboien i kikiiten é suraro Romawi itu eng kama i toyaang itu wo makala'us wésoonna sia wosama' séra in dua sumoro' toyo' wo wuéienna, “Sapa réén en icuamu a yaku?”

²⁰Wo isowatna, “Sé tou Yahudi imeesao en dékén e mangilek a si tuang wosama' woondo si Paulus ro'na mangé isarumu sumawel a Mahkamah Agama. Émaan éra taniitu tanuoka kéndo' sia mangé periksan éra sumawel in sama'.

²¹Taan tioo lingan i tuang en icua éra. Ampa'paan awéan lébé epat ngapulu' tou sé tu'tulo tuma'up si Paulus an uner in lalan e maté sia. Séra isumumpao in owak sapaoka séra ra'ica kuman wo melep sa ra'ica imaté si Paulus. Intarépé' séra tu'tulo maté isia wo asaloka oka mengento-ngento' in énan i tuang.”

²²Kelinga in itu, wo si mangalitou itu iru'du' i kikiiten é suraro Romawi maréng wo icuana, “Tioo ipakua-kuamu a si séike' mangé sa aicuamuo waya en anio' a yaku.”

²³Kekawus in itu, si kikiiten é suraro Romawi itu tumowa rua perwira wo kumua, “Tu'tulio' rua ngaatus suraro, pitu ngapulu' suraro sé mapaké kawayo wo rua ngaatus suraro sé mapaké wengkow. Jam sembilan asi wengi anio'ke', mangéo ang Kaisarea.

²⁴Tu'tulo mio' ka'i piraan kawayo en sakéan i Paulus. Wo iwalio mangé sia ang karapi in sama' a si gubernur Feliks.”

²⁵Ipaticna ka'i surat em béé a si gubernur Feliks. En aipatic an surat itu tana'i,

²⁶“Siri'ku, Klaudius Lisias. Tuang gubernur Feliks si pasiri-siriinku.

²⁷Si tou aiwali mai anio', makangaran Paulus. Sia tinangka' é tou Yahudi wo misio patén éra. Taan an tutuw itu, yaku wo sé suraroku mai mindo isia wosama' icawekar wo ro'na malowir. Ampa'paan liningaku sa sia itu tou Roma.

²⁸An tutuw itu icasalé'ku keli e makailek ampa'paan in sapa sé tou Yahudi masalé' maté isia. Anaé, paalinku sia a sé Mahkamah Agama éra.

²⁹Taan kinailekanku sapaoka sia tinudu andumoro' in atoran an ukum Torat. Taan ra'ica wana tuus en tumuru' sa sia patus makéré ukuman patén kuma'pa yuntep am bui.

³⁰Wo awéan tou en icumua a yaku sapaoka sé tou Yahudi meesa mawasa-wasa i maté isia. Siituo, makala'us ru'du'ku sé suraroku makawali mangé isia a si tuang. Wo ru'du'ku ka'i sé tou matudu isia wosama' séra maali im perkara itu a si tuang.”

³¹Kumawus in itu, mangé éra indon si Paulus tanu in aiperénta i kikiiten é suraro Romawi itu ai séra. Asi wengi ituke', iwali éra mangé si Paulus a si Antipatris.

³²Mando mai, sé perwira itu makala'us méé kaloasan a sé suraro maké kawayo ang karapi i Paulus en lumala'us im bawayaan éra maangé a si Feliks. Taan sé perwira é suraro itu, maréng sumawel a markas.

³³Icateka' mangé ang Kaisarea, sé suraro mapaké kawayo méé in surat a si gubernur Feliks, wo isarakan éra ka'i si Paulus ai sia.

³⁴Pakabacanna mako en surat wo wuéienna a si Paulus, “Ico am propénsi sapa owo?” Isowat i Paulus, “Yaku ang Kilikia owo.”

³⁵Icua i gubernur ai sia, “Periksanku oka em perkaramu, sa sé tou sé tumudu ico icateka'o mai am bia'i.” Kekawus in itu, iru'du'na si Paulus tangen an istana i Herodes.