Read Tontemboan Kisah Para Rasul 24 Bible Online

Kisah Para Rasul 24 - Tontemboan bible

Kisah Para Rasul 24

¹Lumangkoio lima ngando, mai si imam wangko' Ananias, sé matu'a é tou Yahudi, wo si esa pembéla makangaran Tertulus. Séra im baya sumaru asi gubernur Feliks wo kumua im ipatudu éra a si Paulus.

²Kekawus ako in itu ru'du' i gubernur sé touna en tumowa si Paulus. Wo si Tertulus tumo'tolo matudu si Paulus, icuana, “Tuang gubernur si pasiri-siriin ami. An tutuw si tuang makatimboi ing kakawasaan, eng katouan ami arui, wo ampa'paan ing kapandéian i tuang, en tampa an sangkum ami anio' ka'i maloor.

³Am bisa-wisa niangéan ami, kailekan ami sa pakasa en itu niéma' i tuang. Kami kumua makapulu'sama' a si tuang.

⁴Taan ra'ica icasalé' ami menia-nia' in témpo i tuang, anaé pangilekenku a si tuang si taupus wosama' linganai toyo' sapa en icua ami anio'.

⁵Tana'i é tuang, si tou anio' tatap mengaéma' in léwo' wo am bisa-wisa sia mengaéma' ing kalicokoan a sé tou Yahudi am pakasa ing kayo'baan. Sia mamuali kikiiten ing golongan Nasrani.

⁶Wo ka'i sia mepé' numajis im Balé Le'nas, ampa'paan in ituo tangkaan ami sia wo sidangeno woo ami kiit in ukum Torat.

⁷Taan si kikiiten é suraro Romawi makangaran Lisias mai mindo sia an uner ami ang karapi ra'ica sumoma.

⁸Wo iru'du'na sé tou matudu mai a si tuang. Anaé, sa si tuang in esa e meriksa si Paulus, kakailekan oka i tuang pakasa em ipatudu ami ai sia itu wutul.”

⁹Kekawus i Tertulus kumua in taniitu, énan ka'i é tou Yahudi walina sapaoka en aicuana itu wutul.

¹⁰Wo si gubernur itu suméin a si Paulus sapaoka sia ro'nao rumoma'. Wo icua i Paulus, “Tuang gubernur, kailekanku, si tuang ta'uno mengaurus im perkara i bangsa anio'. Ampa'paano in itu yaku arui en até méla in owak an dior i tuang.

¹¹Tana'i é tuang. Ra'ica ilumébé asi sangapulu' rua ngando ilumangkoi, yaku imangé maapo' an Yerusalem. Ro'na pamuéien i tuang a sé tou keli andumoro' in itu.

¹²An tutuwku am Balé Le'nas, am balé-walé paapo'an é agama Yahudi wo an tampa-tampa walina sé ang kota, kailekan é tou sa yaku ra'ica kawisa wo meindo-indoan roma' wo sé tou wo ra'ica mengaéma' ing kalicokoan.

¹³Patudun éra ka'i andumoro' in sapake' mangé a yaku. En a yower éra a si tuang tarépé' ra'ica wana tuus.

¹⁴Taan an dior i tuang, pangakunku sapaoka yaku maapo' a si Amang Kasuruan si paapo'an é apo-apo' ami ang karapi i makiit in sususuien i Yesus Kristus. En sususuien itu pengatuulen éra sususuien imasélé'kow. Percayanku ka'i waya sé aipatic an ukum Torat wo sé ang kitap é nabi.

¹⁵Yaku ka'i maarap a si Amang Kasuruan meputé wo iséra, sapaoka kawisa mangé pakasa in tou sé matéo touen oka sumawel, sama' sé tou wutul kuma'pa tou ra'ica wutul.

¹⁶Ampa'paano in itu, yaku tatap rumaméji menonou ang karapi in até weresi an dior i Amang Kasuruan wo ka'i an dior é tou.

¹⁷ Ampa'paan piraano ngata'un aku an tampa walina, yaku maréngai an Yerusalem e mai méé roit ipatawang a si bangsaku Yahudi sé menonou ang kalengéian wo ka'i méé raragésan a si Amang Kasuruan am Balé Le'nas.

¹⁸Ang karoro'anku maéma' waya in itu am Balé Le'nas wo mai sé piraan tou Yahudi an Asia owo, kekawus ako itu yaku iméma' ing kanaramen meresi in owak. Am bitu ra'ica keli en tou wo yaku ka'i ra'ica iméma' ing kalicokoan.

¹⁹En ulitna isérao woo e musti maai wo kumua a si tuang sapa em ipatudu éra a yaku, sa wutul awéan en aitudu éra a yaku.

²⁰Taan intarépé' mandéo sé tou am bia'i eng kumua sapa eng kameséaan kinéréan éra si niéma'ku an tutuw éra sumidang yaku an dior i Mahkamah Agama.

²¹ Kuma'pa wona' an tutuwku makatulung an dior éra wo icuaku in taangko' sapaoka, ‘Sé tou imatéo touen oka sumawel i Amang Kasuruan,’ akar aku aisaru éra a si tuang.”

²²Kekawus i Paulus kumua in taniitu, si gubernur Feliks si makailek wutul in sususuien i Yesus Kristus, en lumando woo im perkara itu. Icuana, “Em perkara miow, puséénku oka sa si Lisias si kikiiten é suraro Romawi icateka'o am bia.”

²³Wo iru'du' i gubernur Feliks si perwira é suraro itu itumang si Paulus, taan sia winéan toyo' kaloasan. Taniitu ka'i sé kara-karapina winéan kaloasan e ro'na mesuk isia wo méé ing kaperluanna.

²⁴Mawaya'o pirao ngando si Paulus tinang, wo mai si gubernur Feliks mewali-wali wo si penanaanna makangaran Drusila si tou Yahudi. Wo iru'du' i gubernur itu en tumowa si Paulus wo linganna asi Paulus andumoro' tumambisa wosama' sé tou ro'na maéman a si Yesus Kristus.

²⁵Wo icua i Paulus tumambisa sé tou menonou wutul an dior i Amang Kasuruan, tumambisa eng kumawasa in owak wosama' ra'ica méma' ing kamesé-meséaan wo ka'i andumoro' in endo sé tou akimen i Amang Kasuruan. Kelingana in itu, sia makala'us maindé' wo icuana, “Taniitupé'owo, wo mangéo ko. Kawisa mangé sa awéano témpo loor towanku oka sumawel ko.”

²⁶Ang karoro'an in itu, paara-arapenna si Paulus méé roit ai sia. Ampa'paan in ituo penowa-nowanna si Paulus e memaa-maar wo isia.

²⁷Lumangkoio rua ngata'un, si gubernur Feliks sawelan i Perkius Festus. Taan ampa'paan si gubernur Feliks meindo-indo in até a sé tou Yahudi wo iwayana si Paulus tangen i Perkius am bui.