Read Tontemboan Kisah Para Rasul 3 Bible Online

Kisah Para Rasul 3 - Tontemboan bible

Kisah Para Rasul 3

¹Asi sangando tutuw in jam tiga im bawaando, en témpona ipengasombayang é tou Yahudi, si Petrus wo si Yohanes mangé am Balé Le'nas.

²Am bitu awéan papalen wangko', si pengatuulen ‘Papalen Loor’. Am papalen wangko' itu, awéan si esa tuama eng ketounake' mai késo'. Susur in endo si tuama itu pengawuléngen é tou weta' am bitu wosama' sia ro'na mangile-ngilek a sé tou sé mauntep ang kintal im Balé Le'nas.

³Asi témpo itu sérénna si Petrus wo si Yohanes mauntepo im Balé Le'nas wo sia mangilek roit ai séra.

⁴Si Petrus wo si Yohanes suméré sia wo icua i Petrus, “Séréno mai kami!”

⁵Wo si tou itu tuméinteng ai séra wo maara-arap e ro'na makéré sapa-sapake' ai séra.

⁶Taan icua i Petrus ai sia, “Yaku ra'ica wana mas wo pérak. Taan sapa si a yaku, siitu em bééku ai co: Ang karapi i ngaran i Yesus Kristus si tou Nazaret itu, tumulung wo maya'o!”

⁷Wo timboian i Petrus eng kama kakan i tou itu wo atasanna sia tumulung. Asi témpo ituke', em bungkélé'na makala'us masama'.

⁸Wo si tou itu lumo'tic wo tumulung wo menguri-nguri mawaya'. Sia kumiit wo iséra muntep am Balé Le'nas, mawaya' malo'ti-lo'tic wo ka'i marayo-rayo si Amang Kasuruan.

⁹Pakasa sé tou am bitu suméré sia mawaya' ang karapi i marayo-rayo si Amang Kasuruan.

¹⁰Kailekan éra sia si manaram mengalukut wo mangile-ngilek an dior im Papalen Loor am Balé Le'nas itu. Ampa'paan in ituo séra mangaya-ngaya'ka' wo menguré-ngurésé in do'kos andumoro' sapa e imamuali ai sia.

¹¹Si tou késo' si masama'o itu mengii-ngiit oka a si Petrus wo si Yohanes. Wo an tutuw éra in telu cateka' mangé an lésar si pengatuulen ‘Lésar i Salomo’ wo mai sé tou keli sé mangaya-ngaya'ka' itu mali'us ai séra.

¹²Keséré i Petrus sé tou keli itu wo icuana ai séra, “É tou Israel, kéitu réén kamu mangaya-ngaya'ka' andumoro' ing kamamualian itu? Wo kéitu réén kamu menéinte-néinteng in taniitu ai cami? Paweroten iow réén si tou anio' ro'na maya' ampa'paan ing kawasa ami in esa kuma'pa ampa'paan ing kale'tekkan ami a si Amang Kasuruan?

¹³ Si Amang Kasuruan si pengaapo'an é apo-apo'ta Abraham, Ishak wo si Yakub, Siao e méma' si Yesus ata-Na itu iparayo-rayo wo pasiri-siriin. Si Yesus ituo si aisarakan iow wo aicélong iow an dior i Pilatus em patén, mandé ka'i si Pilatus e musé'o e mekar woo Sia.

¹⁴ Taan aicélongo miow Sia si Le'nas wo si mengaéma' im butul. Wo pinangilek iowke' si mengapaté tou si wekar.

¹⁵Sia si Le'nas itu palemboian ing katouanta pinatéo miow taan Sia tinou sumawel i Amang Kasuruan an uner é tou imaté. Kamio e mamuali sairi sapaoka Sia tumou sumawel.

¹⁶Katuusano miow si tou anio' si indior uréo késo'. Si tou sinéré miow anio' maémano a si Yesus, ampa'paan in ituo sia imasama' an dior iow im baya. En itu imamuali ampa'paan sia maéman a si Yesus.

¹⁷Poo-poow, kailekanku kamu wo pakasa sé kikiiten iow e maté si Yesus ampa'paan ra'ica kailekan iow sapa e niéma' miow.

¹⁸Ang karapi i mulur taniitu imamualio en aicua i Amang Kasuruan indior imaké sé nabi, sapaoka si Mesias si ayutus-Na musti mendam ing keli kawenduan.

¹⁹Ampa'paano in itu, itela'uo mio' eng kaléwo-léwo'an sé pengaémaan iow wo mape'diso mangé wosama' eng kamesé-meséaan iow ampungan i Amang Kasuruan.

²⁰Wo in taniitu émaan-Na oka eng katouan iow arui wo yutus-Na si Yesus ai camu si indior aitantu-Nao mamuali Mesias iow.

²¹Sia itu musti mento' an sorga akar mai en témpona si Amang Kasuruan méma' im pakasa mamuali weru. Pakasa en itu aicua-Nao indioré' owo, imaké sé nabi sé sinisir-Na.

²² Si Musa sumangkumo icumua in tana'i, ‘Angkaien oka i Amang Kasuruan esa Nabi ai camu owo, si esaan angé asé poo-poowta tou Israel tanu Sia imangkai yaku mamuali nabi. Lingano waya sapake' en icua-Na ai camu.

²³Si séi ra'ica luminga si Nabi itu, sia itané oka an uner é tou i Amang Kasuruan wo patén.’

²⁴Ra'ica si Musake' en icumua andumoro' Sia, pakasa é nabi tumo'tolai asi Samuel akar a sé nabi walina kekawus i Samuel, séra icumuao i nunuwu' i Amang Kasuruan andumoro' in jaman anio'.

²⁵ Airior érao ing kumua a sé apo-apo' miow en janji i Amang Kasuruan en andumoro' i Mesias. Wo kamu im baya makéré oka bagéan an janji itu. Indior aicua-Nao a si Abraham in tana'i, ‘Asi taranakmu oka, pakasa sé bangsa ang kayo'baan kamangen oka.’

²⁶Ampa'paan in ituo, si Amang Kasuruan isumisiro si Ata-Na wo yutus-Na kataré-taré ai camu wosama' Sia kumamang icamu, en lalanna tawangen-Na kamu si esa wo si esa en tumela'u ing kaléwo-léwo'an.”