Read Tontemboan Kisah Para Rasul 7 Bible Online

Kisah Para Rasul 7 - Tontemboan bible

Kisah Para Rasul 7

¹Kumawus in itu, si imam wangko' mamuéi a si Stefanus, “Wutul réén en aitudu éra ai co?”

² Wo isowat i Stefanus, “Éi poo-poow wo tuang-tuang, linganai en icuaku. Indior, si apo'ta Abraham an tutuw sia ra'ipé' maento' an Haran, sia maento' a Mesopotamia. Am bitu, si Amang Kasuruan si parayo-rayo wo pasiri-siriin mapaturu' in owak-Na ai sia,

³wo kumua, ‘Abraham, kumesoto asi tana' anio' wo tela'uo sé poo-poowmu. Wo mangéo asi esa tampa si ituru'-Ku oka ai co.’

⁴Wo itela'u i Abraham en tana' Mesopotamia si paento'an é tou Kasdim wo sia mangé mento' an Haran. Wo an tutuw si amangna imatéo, iru'du' i Amang Kasuruan sia tumela'u in Haran wo mangé asi tampa si pakaento'antao intarépé'.

⁵ Asi témpo itu, si Amang Kasuruan ra'ica iméé tana' a si Abraham mandé sangaranganke'. Taan aijanjio i Amang Kasuruan e méé in tana' anio' a si Abraham wo sé taranakna, mandé ka'i an tutuw itu sia ra'ipé' wana toyaang.

⁶ Wo icua i Amang Kasuruan in tana'i ai sia, ‘Sé taranakmu mento' oka an tana' é tou walina. Wo séra émaan oka é tou an tana' itu mamuali ata wo para'i-ra'ien éra, eng kauréna epat ngaatus ngata'un.

⁷Taan si bangsa si iméma' iséra mamuali ata, ukumen-Ku oka. Wo sé taranakmu kumesot oka asi tana' itu wo séra mai maapo' a Yaku an tampa anio'.’

⁸ Wo keteren i Amang Kasuruan en janji-Na wo si Abraham ang karapi i rumu'du' sia en sumunat pakasa sé tuama asé taranakna. Anaé, an tutuw sia makéré toyaang si Ishak wo sunatenna si toyaang itu asi endo kawalu. Wo an tutuw si Ishak makéré toyaang si makangaran Yakub, émaanna ka'i sia tanu siitu. Si Yakub ka'i méma' in taniitu a sé sangapulu' rua toyaangna. Sérao sé metuari anio' mamuali apo'ta.

⁹ Wo sé kaka' tuama i Yusuf sé apo-apo'ta anio', manganat ai sia. Ampa'paano in itu, iwangkér éra sia an tana' Mesir. Taan si Amang Kasuruan mewali-wali wo isia,

¹⁰wo mekar isia am pakasa ing kawenduanna. Ituru' i Amang Kasuruan eng kaupusan-Na a si Yusuf wo émaan-Na sia mapinter, akar sia icaupus keli i Firaun kolano i Mesir. Ampa'paano in itu, angkaien i Firaun sia e makakawasa am pakasa in tana' Mesir wo ka'i an istana i colano.

¹¹Wo mai eng kaareman an tana' Mesir wo an tana' Kanaan. Eng kaareman itu ra'io cakua, akar sé tou masusa keli. Wo sé apo-apo'ta ka'i kinaka'puano ing kakanen.

¹²Wo kalingaan i Yakub an tana' Mesir awéan gandum. Anaé, iru'du'na sé toyaangna tuama sé apo-apo'ta, mangé am bitu, siituo eng kataré séra mangé a Mesir.

¹³Wo an tutuw éra imangé karua a Mesir en tumeles gandum, si Yusuf kumua andumoro' in owakna a sé poo-poowna. Asi témpo itu kinailekano i Firaun andumoro' im pamalé i Yusuf.

¹⁴Wo iru'du' i Yusuf e mangé mai si Yakub amangna wo pakasa sé poo-poowna e mai mento' a Mesir. Eng kakeli éra pitu ngapulu' lima tou.

¹⁵Anaé, si Yakub mangé wo mento' an tana' Mesir akar imaté, wo sé apo-apo'ta ka'i imaté am bitu.

¹⁶E mayat éra ayéra an Sikhem wo mangé icubur an tampa si tinelesan i Abraham asé toyaang i Hemor an Sikhem maké in doit pérak.

¹⁷Si Amang Kasuruan sumangkumo jumanji a si Abraham sapaoka sé tou Israel icesot-Na oka an tana' Mesir. Makatawio en témpona Sia lumekep in janji itu, makaaweso ka'i eng kakeli éra an tana' Mesir.

¹⁸Asi témpo itu awéan esa kolano weru si maperénta an tana' Mesir, sia ra'ica makatuus si Yusuf.

¹⁹Si colano itu mengauwak wo mengoko-ngokoi sé apo-apo'ta. Leséénna sé apo-apo'ta en tumiya' sé toyaang sé makatoué' mai wosama' sé toyaang itu maté.

²⁰Asi témpo ituo si Musa tumou wo sia pasung keli an dior i Amang Kasuruan. Telu ngaserap eng kauréna sia pinewawa am balé i amangna.

²¹Wo itiya' éra sia, taan niindoke' i toyaang wéwéné i colano Mesir wo pewawanna tanu toyaangna in esa.

²²Si Musa sinusuian im baya-waya andumoro' i Mesir, akar sia mamuali tou pinter keli maroma' wo pakasa ro'na émaanna.

²³An tutuw en umur i Musa epat ngapulu' ngata'un, mai eng kasalé'an in aténa e mangé suméré sé poo-poowna tou Israel.

²⁴Asi témpo itu si Musa suméré awéan esa tou Israel si paoko-okoien i tou Mesir wo tawangenna i méla. Wo si tou itu pinaté i Musa.

²⁵Pawerotenna sapaoka kaangéan oka é poo-poowna tou Israel sa sia pinaké i Amang Kasuruan e mekar iséra ang kasusaan an tana' Mesir. Taan ra'ica réén kaangéan éra.

²⁶Mando mai, si Musa suméré awéan rua tou Israel mapetokol. Wo raméjinna méma' séra meeluran sumawel, icuana, ‘Éi! Kéitu réén kamu in dua mapetokol? Ra'ica réén mepoow kamu in dua?’

²⁷Taan si tou si mukul si carapina itu rumuké si Musa, icuana, ‘Si séi réén e mangkai ico mamuali kikiiten ami wo makim icami?

²⁸Kéitu réén ko mawasa maté yaku tanu ko imaté si tou Mesir itu kaawii?’

²⁹ Kelinga i nunuwu' itu, si Musa tumincas wo mangé mento' an tana' é tou Midian. A mangé mbitu sia kumawéng wo makéré rua toyaang tuama.

³⁰Kekawus in epat ngapulu' ngata'un si Musa maento' am bitu, wo mai si esa malaékat e mapaturu' in owak ai sia an tana' kapayasan ang kuntung Sinai. Si malaékat itu mapaturu' an uner in api si icumesotai an dukut tutunéan.

³¹Si Musa mangaya'ka' andumoro' im pinapaturu'an itu wo an tutuwna rumuru mangé en suméré, tumarépé'anke'mai linganna en suara i Casuruan icumua in tana'i,

³²‘Yakuo si Amang Kasuruan si pengaapo'an é apo-apo'mu Abraham, Ishak wo si Yakub.’ An tutuw i luminga in suara itu, si Musa gume'ger in indé' wo ra'io brani suméré.

³³Wo icua i Amang Kasuruan ai sia tana'i, ‘Wukaano mio' en selopmu, ampa'paan em pakatulunganmu itu tana' le'nas.

³⁴Sinéré-Kuo sé tou-Ku pinara'i-ra'i an tana' Mesir, wo pinalinga-Kuo em ipangi-ngimbulu éra, wo Yaku tumumpa e mai mekar iséra. Anaé, intarépé' ru'du'-Ku ko maréng angé sumawel an tana' Mesir.’

³⁵Si Musa anioo si ra'ica icasalé' é tou Israel, tutuw éra kumua ai sia, ‘Si séi réén e mangkai ico mamuali kikiiten ami wo makim icami?’ Taan si Musao ka'i si ayutus i Amang Kasuruan maké si malaékat-Na e mamuali kikiiten é tou Israel wo makawali iséra kumesot an tana' Mesir. Si malaékat itu mapaturu' ai sia an uner in api si icumesotai an dukut tutunéan.

³⁶ Iwali i Musa sé tou Israel kumesot an tana' Mesir, wo méma' ing kakaya'kaan wo tuu-tuus sé ra'io icakua an tana' Mesir, an Ta'sic Réindang wo an tana' kapayasan epat ngapulu' ngata'un eng kauréna.

³⁷ Wo si Musa anio' ka'i si icumua a sé tou Israel tana'i, ‘Angkaien oka i Amang Kasuruan esa nabi tanu yaku torona miow, an uner é poo-poow iow.’

³⁸ Si Musa anio' si mewali-wali wo sé apo-apo'ta tou Israel an tana' kapayasan. An tutuw ang kuntung Sinai, awéan malaékat mai mepaar wo isia en icua a sé apo-apo'ta, siituo en taar i Amang Kasuruan si tinerimana si méma' icita menonou.

³⁹Taan sé apo-apo'ta ra'ica kiim luminga ai sia wotaré aicélong érake' sia. Wo an untep in até éra, séra masalé' maréng sumawel an tana' Mesir.

⁴⁰ Icua éra ka'i a si Harun in tana'i, ‘Si Musa imakawalio icita kumesot an tana' Mesir. Taan intarépé' ra'io kailekanta sapa e mamuali ai sia. Ampa'paano in itu, émaano mio' em patong é opo-opo' em pengaapo'anta wosama' ro'na makawali cita.’

⁴¹Asi témpo ituke', émaan éra esa patong tanuoka ana' i sapi. Wo séra mokol esa binatang e ragés a si patong itu. Kelekep ako in itu séra méma' ing kasalé-salé'an wangko' in andumoro' sé niéma' éra in esa itu.

⁴² Ampa'paan in ituo, séra itela'u i Amang Kasuruan wo iwaya-Na séra maapo' a sé sumesendot an langit, tanu in aipatic ang kitap é nabi: ‘Éi tou Israel! An tutuw iow maento' an tana' kapayasan epat ngapulu' ngata'un eng kauré, kamu ra'ica sumangkum ako méé raragésan kuma'pa raragésan walina a Yaku.

⁴³Wo kamu asaloke' imaali in ténda, an untepna si patong i opo' Molokh wo patong sumesendot i opo' Refan. Sé pato-patong itu niéma' miow wo paapo'an iow ka'i. Ampa'paan ituo, itiya'-Ku oka kamu an tampa tayang ulit an tana' Babel.’

⁴⁴ Sé apo-apo'ta tatap maali-ali in ténda paapo'an am bisa-wisake' an tutuw éra an tana' kapayasan. En ténda paapo'an itu niéma' i Musa iciit si aituru' i Amang Kasuruan.

⁴⁵Kekawus in itu, en ténda itu paalin é apo-apo'ta an tana' Israel anio' an tutuw séra aiwali i Yosua mandét in tana' itu asé bangsa-bangsa walina sé ayusér i Amang Kasuruan an dior éra. Wo en ténda itu pemaké-makéné' akar an jaman i Daud.

⁴⁶ Si Daud imakéréo in upus si aitambér i Amang Kasuruan. Sia mekiupus ka'i wosama' énan i Amang Kasuruan e méma' esa tampa torona i Amang Kasuruan si pengaapo'an i Yakub.

⁴⁷ Taan en tampa itu ra'ica imamuali niéma' i Daud, e méma' in tampa itu wayake' si toyaangna si makangaran Salomo.

⁴⁸Taan si Amang Kasuruan Si Rumangka-rangka' ra'ica maento' am balé-walé sé niéma' é tou, tanu si aicua i esa nabi:

⁴⁹ ‘En langit itu pengalukutan-Ku wo si cayo'baan anio' pengaléakan ing kécéi-Ku. Si walé tambisa réén en émaan iow torona-Ku? Wo tampa tambisa réén si mamuali oka paenaan-Ku?

⁵⁰Ra'ica réén kama-Ku in esa e méma' waya in itu?’

⁵¹ Kamu anio' keté ro'kos, tanu sé tou kumetéo in até ra'ica makiit si Amang Kasuruan wo ra'ica kiim mengalinga Sia. Kamu tatap mengasundur si Roh Le'nas tanu sé apo-apo' miow.

⁵²Icuao mai, si séi sé nabi ra'ica niokoi é apo-apo' miow? Taan taré pinaté érake' sé nabi sé riorai mengakua andumoro' si Tou Wutul mai, wo intarépé' Sia kinianato wo pinatéo miow.

⁵³Kamu itumerimao in ukum Torat si aicua é malaékat, taan en itu ra'ica pengaémaan iow.”

⁵⁴An tutuw pakasa en itu lingan é anggota Mahkamah Agama, en até éra sumakit keli. Wo séra mae'bow ai sia ang karapi makare'ket oka em baang.

⁵⁵Taan si Stefanus si kinawasao i Roh Le'nas, kumanat angé an langit wo kaséréanna eng kawangko' i Amang Kasuruan wo si Yesus makatulung ang kakan-Na.

⁵⁶Wo icua i Stefanus, “Uli-ulit, kinaséréanku en langit imawuka' wo si Toyaang i Tou makatulung ang kakan i Amang Kasuruan.”

⁵⁷Kelinga in itu, wo séra mengangko-ngangko' wo makatutuw in lunteng. Kumawus in itu serangen éra sia.

⁵⁸Wo wésoon éra sia kumesot ang kota wo wangkilen éra im batu. Sé tou mamuali sairi am bitu, séra muka' in juba éra wo iweta' éra an dior ing kécéi i esa mangalitou si makangaran Saulus.

⁵⁹Ang karoro'an éra i mawangkil si Stefanus, sia sumombayang, “O Apo' Yesus, terimano mangé e rohku.”

⁶⁰Sia kumundu wo maangko', “O Apo' Yesus, tioo ukumen séra ampa'paan i méma' ing kamesé-meséaan anio'!” Kekawusna kumua in taniitu, sia maté.