Read Tontemboan Kisah Para Rasul 9 Bible Online

Kisah Para Rasul 9 - Tontemboan bible

Kisah Para Rasul 9

¹ Asi témpo itu ka'i, si Saulus maaté-atépé' in léwo' e me'teng wo maté pakasa sé murit i Apo' Yesus. Sia mangé meta'up wo si imam wangko',

²e mangilek surat kawasa em paalin am balé-walé paapo'an é agama Yahudi an Damsyik wo sa ipeta'upna sé tuama kuma'pa wéwéné sé makiit in sususuien i Yesus, séra tangkaanna wo paalinna an Yerusalem.

³Am bawayaanna maangé an Damsyik tutuwna matawio mangé ing kota itu, tumarépé'anke'mai awéan sendot tumélangai an langit wo lumi'cir sia.

⁴Wo sia icarepa an tana' wo kalingaanna awéan suara si makua in tana'i, “Saulus, Saulus, kéitu réén ko mengoko-ngokoi Yaku?”

⁵Isowat i Saulus, “Si séi réén Ko é Tuang?” Icua-Na, “Yakuo si Yesus si pengoko-ngokoienmu itu.

⁶Taan intarépé' tumulungo ko wo muntepo an Damsyik. A mangé mbitu awéan oka eng kumua ai co, sapa si musti émaanmu.”

⁷Asi témpo itu, sé tou imewali-wali wo sia mangaya-ngaya'ka' oka. Ampa'paan lininga éra en suara itu taan ra'ica kaséréan éra si tou rumoma' in itu.

⁸Wo si Saulus tumulung wo muka' im berenna taan sia ra'io makaséré in sapa-sapa. Anaé, sia musti akinen éra e muntep an Damsyik.

⁹Telu ngando eng kauréna sia mawola wo ra'ica icuman wo imelep.

¹⁰An Damsyik awéan si esa tou si mercaya in sususuien i Yesus, sia makangaran Ananias. Si Casuruan mapaturu' ai sia wo numuwu', “Ananias!” Wo isowatna, “Én, yaku en anio' é Tuang!”

¹¹Icua i Casuruan, “Mangéo ko am balé i esa tou makangaran Yudas. Em baléna an Lalan Rondor. Pangéréno si esa tou makangaran Saulus si an Tarsus owo. Sia ang karoro'an i masombayang,

¹²wo pinapaturu'ano. Am pinapaturu'an itu, sia suméré si esa tuama makangaran Ananias mai ai sia wo maro oka ing kama am bawo in do'kosna wosama' sia ro'na suméré sumawel.”

¹³Isowat i Ananias, “O Tuang, pinalingakuo asé tou keli andumoro' sia. Keliano sé tou le'nas-Mu an Yerusalem sé niokoina.

¹⁴Wo intarépé' sia imayo am bia'i. Sia imakéréo surat kawasa asé kikiiten é imam an Yerusalem, en tumangka' sé tou maéman a si Apo' Yesus am bia'i.”

¹⁵Taan icua i Casuruan a si Ananias, “Mangéo ko! Sinisir-Kuo si tou itu e mamuali ata-Ku eng kumua in Abar Kaaruien andumoro' Yaku a sé bangsa walina, a sé kolano wo ka'i a sé tou Israel.

¹⁶Ituru'-Ku oka ai sia sapaoka sia meta'up oka ing keli kawenduan ampa'paan kumiit Yaku.”

¹⁷Kekawus ako in itu, si Ananias mangé am balé pakaento'an i Saulus wo muntep angé mbitu. An tutuw sia meta'up wo si Saulus wo sia maro ing kamana am bawo in do'kos i Saulus wo icuana, “Saulus poowku, si Apo' Yesus e rumu'du' yaku mai am bia'i wosama' ko ro'na suméré sumawel wo ka'i kawasan i Roh Le'nas. Siao en sinérému an uner in lalan tutuwmu mai am bia'i.”

¹⁸Asi témpo ituke', tanu awéan erap i sera' icumesotai am berenna wo sia ro'nao suméré sumawel. Wo si Saulus tumulung wo baptisen.

¹⁹Wo sia kuman akar maketer sumawel. Si Saulus makaento'pé' ka'i pira ngando an Damsyik mewali-wali wo sé tou makiit in sususuien i Yesus.

²⁰Asi témpo ituke', sia muntep am balé-walé paapo'an é agama Yahudi wo makua a sé tou sa si Yesus itu Toyaang i Amang Kasuruan.

²¹Wo pakasa é tou sé iluminga si Saulus mangaya-ngaya'ka' wo kumua, “Ra'ica réén sia si mengapaté sé tou maéman a si Yesus an Yerusalem? Ra'ica réén sia mai en tumangka' sé tou maéman a si Yesus wo paalin a sé kikiiten é imam?”

²²Taan em pakatawér i Saulus makaketerke' wo méma' sé tou Yahudi an Damsyik mangaya-ngaya'ka' oka ampa'paan sia méé tuus mapaké ing Kitap Le'nas sapaoka si Yesus wutu-wutul Mesias.

²³ Lumangkoio im piraan ngando, sé tou Yahudi meroma' mawasa in léwo' e maté si Saulus.

²⁴Endo wo em bengi pakatéiran éra waya em papalen wangko' ang kota wosama' ro'na maté sia. Taan kailekanna em pawasan léwo' éra itu.

²⁵Ampa'paan asi sanga wengi, si Saulus aiwali é muritna wo itumpa éra maké in esa karanjang wangker ciit asi ri'dir mésel ing kota.

²⁶Icateka' mangé an Yerusalem, sia mepé' meesa wo sé tou mapercaya in sususuien i Yesus. Taan séra im baya maindé' ai sia ampa'paan ra'ipé' percayan éra sa sia wutu-wutul mapercayao in sususuien i Yesus.

²⁷Taan awéan esa tou makangaran Barnabas, terimana si Saulus wo iwalina mangé a sé ruru'du'an i Yesus. Isisilna ai séra tambisa si Saulus suméré si Yesus an uner im bawayaan wo tambisa si Casuruan mapaar wo sia wo ka'i tambisa sia ra'ica maindé' masusui a sé tou keli an Damsyik andumoro' i Yesus.

²⁸Si Saulus mento' mewali-wali wo iséra an Yerusalem. Am bitu sia masusui in andumoro' i Apo' Yesus karapi in da'ica wana kaindé'an.

²⁹Si Saulus ka'i maroma' wo meindo-indoan roma' wo sé tou Yahudi sé mapaké i nunuwu' é Yunani. Wo séra mangéré lalan e maté isia.

³⁰An tutuw kailekan é poo-poow esa paémanen a si Yesus andumoro' im pawasa-wasan é tou itu, wo iwali éra si Saulus akar ang Kaisarea, wo tumawang sia e mangé an Tarsus.

³¹Wo pakasa sé jamaat an Yudea, ang Galilea wo an Samaria menonou meelu-eluran. Wo em paémanen éra maketer wo séra menonou masiri' si Amang Kasuruan, wo séra ka'i makaawes eng kakeli ampa'paan tinawang wo paiboren i Roh Le'nas.

³²Asi témpo itu, si Petrus mangé ang kelian tampa. Wo asi makasa sia tumuli a sé tou le'nas sé maento' an Lida.

³³Am bitu sia meta'up wo si esa tuama, makangaran Eneas. Si Eneas anio' waluo ngata'un asalo oka imakatekel ampa'paan makésoo.

³⁴Wo icua i Petrus ai sia, “Eneas, si Yesus Kristus isumama'o ico. Tumooro wo tu'tuleno em pakatekelanmu!” Asi témpo ituke', si Eneas makala'us tumoor.

³⁵An tutuw pakasa en tou an Lida wo an Saron suméré si Eneas imasama'o, séra makala'us maéman a si Apo' Yesus.

³⁶An Yope, awéan si esa wéwéné makangaran Tabita, a nunuwu' é Yunani sia patuulen Dorkas.[3] Sia mengéma-ngéma' andumoro' sé loor wo pengatawangenna sé tou lengéi.

³⁷Asi témpo itu, sia sinakitan wo maté. Kekawus e mayatna linelé' wo iweta' éra ang kamar an dangka'.

³⁸Sé tou makiit in sususuien i Yesus an Yope luminga sa si Petrus an Lida, si roong itu mentawian wo in Yope. Ampa'paano in itu ru'du' éra rua tuama mangé tumowa si Petrus wo kumua tana'i, “Tuang, pekiupusen ami sa woo ro'na si tuang mario-riorai an Yope.”

³⁹Kelinga in itu, si Petrus makala'us tumu'tul wo mangé ang karapi éra. Icateka' mangé am bitu, iwali éra sia ang kamar an dangka'. Wo pakasa sé wéwéné balu tumulung rumuru mangé a si Petrus. Wo ang karapi i mengamé-ngamé' ituru' éra ai sia pakasa eng karai wo en juba si niéma'na tutuw i menonou.

⁴⁰Taan iru'du' i Petrus pakasa séra kumesot. Kumawus in itu sia kumundu wo sumombayang, wo sérénna e mayat wo icuana, “Tabita, tumooro!” Wo si Tabita muka' im beren. Keséréna si Petrus, sia tumoor wo lumukut.

⁴¹Timboian i Petrus eng kamana wo atasanna in tumulung. Wo towan i Petrus sé tou le'nas itu wo sé wéwéné balu, ituru'na ai séra sa si Tabita tinouna sumawel.

⁴²Eng kamamualian itu icaserar am pakasa in Yope, akar keli en tou sé maéman a si Apo' Yesus.

⁴³Kekawus in itu si Petrus imento'pé' pira ngando an Yope, am balé i Simon. Si Simon anio' en tawoienna mengaweresi ing kulit é binatang pengaémaan barang-barang.