Read Tontemboan Roma 1 Bible Online

Roma 1 - Tontemboan bible

Roma 1

¹En surat anio' a yaku owo, Paulus. Yaku anio' ata i Kristus Yesus si tinowao mamuali ruru'du'an-Na wo si sinisiro eng kumua in Abar Kaaruien i Amang Kasuruan.

²En Abar Kaaruien itu aijanjio i Amang Kasuruan indior wo aipatico é nabi-Na ang kitap-kitap Le'nas.

³En Abar Kaaruien itu andumoro' i Toyaang-Na, si Apo'ta Yesus Kristus. Sa sérén eng katouan tanu in tou, Sia itu taranak i colano Daud,

⁴taan sa sérén eng kale'nasan ing katouan-Na, Sia itu Toyaang i Amang Kasuruan. En tuusna an tutuw si Amang Kasuruan maké ing kawasa-Na itumou sumawel Sia an uner é tou imaté. Siao si Yesus Kristus Apo'ta.

⁵Wo ampa'paano i Yesus Kristus ituo, si Amang Kasuruan imééo mai ing kamang a yaku mamuali ruru'du'an e makin waya sé tou ang kayo'baan wosama' séra maéman wo le'tek a si Yesus Kristus. Émaanku waya en itu, wosama' e ngaran i Yesus Kristus iparayo-rayo wo pasiri-siriin.

⁶Kamu ka'i cauntep asé im pakasa é tou itu sé tinowao i Amang Kasuruan mamuali tou i Yesus Kristus.

⁷Ampa'paan in ituo, ipaticku en surat anio' ai camu im baya sé maento' a Roma sé icaupus i Amang Kasuruan, sé tinowa-Nao e mamuali tou le'nas. Pekiupusenku woo a si Amang Kasuruan, Amangta wo a si Apo' Yesus Kristus en tumambérai ing kamang wo ing kaeluran ai camu.

⁸Kataré-taré aku kumua i makapulu'sama' a si Amang Kasuruanku ang karapi i ngaran i Yesus Kristus, ampa'paan kamu uli-ulit maéman akar keli en tou am bisa-wisa ang kayo'baan makaileko in andumoro' im paémanen iow.

⁹Kamu ipenomba-nombayangku wo si Amang Kasuruano en sairi sapaoka aku uli-ulit mengasombayang torona miow. Siao si Amang Kasuruan si pengaselewiranku ang karapi in lekep en até an tutuwku mengakua in Abar Kaaruien andumoro' i Toyaang-Na.

¹⁰Uréo aku masalé' maangé ai camu, ampa'paan in ituo aku mekiupus a si Amang Kasuruan, sa woo wéan-Na mai kaloasan aku intarépé' e maangé ai camu.

¹¹Ampa'paan icasalé'ku keli meta'up wo icamu wo méé ing kamang si pasusui i Roh i Amang Kasuruan a yaku, wosama' em paémanen iow makakete-keter.

¹²Em peangé-angénku sa aku an uner iow am bitu, kita ro'na membém-béan ing kaketeran im paémanen a si Amang Kasuruan.

¹³ Poo-poow esa paémanen, icasalé'ku wosama' kailekan iow sapaoka aku mawasa-wasao woo masalé' maangé meta'up wo icamu, taan akar intarépé' awéané' en sumépe'd. Icasalé'ku, wosama' en tawoienku an uner iow ka'i awéan wuéna, tanu en tawoienku an uner é tou ra'ica Yahudi an tampa walina awéano wuéna.

¹⁴Ampa'paan pawerotenku sapaoka imamualio tawoienku e mangé kumua in Abar Kaaruien andumoro' i Yesus Kristus a sé pakasa in tou: A sé tou Yunani kuma'pa a sé tou walina, a sé tou isumicola kuma'pa a sé ra'ica isumicola.

¹⁵Ampa'paano in itu keli eng kasalé'anku mangé kumua in Abar Kaaruien itu ai camu sé maento' a Roma.

¹⁶ Yaku ra'ica malawi' mengakua in Abar Kaaruien andumoro' i Yesus Kristus itu, ampa'paan en Abar itu awéan kaketeran i Amang Kasuruan en lumowir im pakasa sé tou maéman; kataré-taré sé tou Yahudi wo ka'i sé tou walina.

¹⁷ Ampa'paan asi Abar Kaaruien itu, si Amang Kasuruan tumuru'o tumambisa sé tou nianggap-Na wutul. En lalanna musti maéman a si Kristus, ra'ica wana walina. En itu tanu in aipatic ang Kitap Le'nas in tana'i, “Si tou nianggap wutul i Amang Kasuruan ampa'paano im paémanenna, sia menonou oka!”

¹⁸Si Amang Kasuruan an sorga itumuru' ing kae'bowan-Na a sé pakasa in tou sé ra'ica maindé' ai Sia wo sé tou mengaéma' ing kaléwo-léwo'an. Ampa'paan, sé kaléwo-léwo'an ituo en sumépe'd sé tou e makailek in sususuien wutul andumoro' i Amang Kasuruan.

¹⁹Wo sapa e ro'na kailekan é tou andumoro' i Amang Kasuruan, kakailekan éra wutul an untep in até, ampa'paan en itu aituru'o i Amang Kasuruan ai séra.

²⁰Mandé si Amang Kasuruan ra'ica kaséréan taan Sia ro'na kailekan é tou asé niéma'-Nao, tanu mai eng kaketeran-Na akar ing kauré-uré wo eng kale'nasan ing kakawasaan-Na tumo'tolke' mai eng kayo'baan anio' niéma'. Anaé, mandé esake' tou ra'ica wana e ro'na kumua sapaoka sia ra'ica makatuus si Amang Kasuruan.

²¹ Kailekan é tou sapaoka si Amang Kasuruan itu awéan, taan séra ra'ica marayo wo masiri' Sia tanu Amang Kasuruan wo ka'i ra'ica mengawéé i makapulu'sama' ai Sia. Taan taré séra asalo imemero-merot sé ra'ica wana en torona wo en até éra em bodok imariréimbengo.

²²Paweroten éra sapaoka séra wuta ing kapinteran, taan en ulitna séra itu imabodoko.

²³ Séra ra'ica maapo' a si Amang Kasuruan si parayo-rayo wo pasiri-siriin si menonou akar ing kauré-uré, taan séra maapo'ke' a sé patong kaputé é mahluk sé ro'na maté, tanumai; sé tou, sé binatang matéléw, binatang makakécéi epat wo sé binatang maloyon.

²⁴Ampa'paano in itu séra iwaya i Amang Kasuruan kinawasa ing kasalé'an in até éra in esa mengaéma' in samek si esa wo si esa, akar séra mapalawi'o in owak éra in esa.

²⁵Séra ra'ica maéman in sususuien wutul andumoro' i Amang Kasuruan, taan mapercaya sé ra'ica wutul. Séra ra'io marayo wo maapo' a si Amang Kasuruan si méma' in tana' wo en langit, taan maapo'ke' a sé niéma' i Amang Kasuruan. En ulitna si Amang Kasuruano iméma' im baya-waya wo Siake' em patus iparayo-rayo akar ing kauré- uré. Ulit.

²⁶Ampa'paano séra mengaéma' in taniitu, akar séra iwaya i Amang Kasuruan kumiit ing kasalé'an in owak éra sé kalawiin keli. Sé wéwéné ra'io kiim tumekel mewali-wali ang karapi é tuama tanu ing kanaramen, taan masalé-salé'ke' tumekel mewali-wali ang karapi é kakélé éra wéwéné.

²⁷Taniitu ka'i sé tuama, ra'io kiim tumekel mewali-wali ang karapi é wéwéné tanu ing kanaramen, taan kinawasao ing kasalé'an in owak mengabersina, akar masalé' tumekel mewali-wali ang karapi é kakélé éra tuama. Ampa'paan in ituo séra makéré ukuman si patus isuli' ai séra tanu wuéna ing kaléwo-léwo'an éra.

²⁸Wo paweroten éra ka'i, ra'io sangali makatuus si Amang Kasuruan, ampa'paan in ituo iwaya i Amang Kasuruan em pakawerot éra icasélé'kow, akar séra mengaéma' sé ra'ica patus émaan éra.

²⁹En até éra wuta ing kabengisan wo wuta ing kaléwo'an. Séra wuta ing kalongi'an wo ing kawurukan, wuta im panganaten, masalé' mengapaté tou, masalé' meindo-indoan roma', tampenguwak wo ra'ica makiit ing kasalé'an i Amang Kasuruan.

³⁰Séra masalé' memaa-maar in léwo' andumoro' sé tou walina, masalé' mengawuruk i ngaran é tou walina, séra masuut si Amang Kasuruan, ra'ica mengaadat a sé tou walina, tirayo wo maangkai in owak in esa. Séra pandé mawasa-wasa in léwo', masundur sé matu'a,

³¹bodok, ra'ica le'tek, ra'ica taupus wo ra'ica maturu' ing kaupusan a sé tou walina.

³²Kailekan éra, sa kumiit in ukum i Amang Kasuruan sé tou mengaéma' in tanu siitu patus ukumen patén. Taan séra mengaéma'ke' taré andumoro' in itu wo ka'i paénan érake' taré sé tou walina sé maéma' in tanu siitu.