Read Tontemboan Roma 10 Bible Online

Roma 10 - Tontemboan bible

Roma 10

¹Poo-poow an esa paémanen, icasalé'ku keli sé poo-poowku tou Israel lowiren, wo uli-ulit aku masombayang a si Amang Kasuruan torona éra.

²Sinérékuo in esa sapaoka séra uli-ulit rumaméji mengaarui in até i Amang Kasuruan, taan ra'ica kailekan éra tumambisa em butulna.

³Ampa'paan ra'ica kailekan éra tumambisa em butul wosama' anggapen wutul i Amang Kasuruan, akar séra rumaméji kumiit in lalan éra in esa ang karapi i mengaéma' in ukum Torat, ampa'paan in itu séra ra'ica le'tek kumiit in lalan aituru' i Amang Kasuruan.

⁴Wo en ukum Torat linekepo i Kristus. Anaé, sa sé tou maéman ai Sia, séra nianggap wutul i Amang Kasuruan.

⁵ Indior aipatico i Musa in andumoro' é tou sé nianggap wutul ampa'paan mengakiit in ukum Torat tana'i: “Sé tou le'tek mengaéma' in ukum Torat, séra menonou oka akar ing kauré-uré ampa'paan in ukum Torat itu.”

⁶ Taan awéan ka'i en aipatic andumoro' sé tou nianggap wutul i Amang Kasuruan ampa'paano im paémanen. Tana'i en aipatic, “Tioo kamu makua an até miow, ‘Si séi en sumosor angé an sorga?’ ” (Eng kaangéanna, e makawali mai si Kristus tumumpa ang kayo'baan eng kumua tumambisa wosama' malowir).

⁷Wo “Tioo kamu makua an até miow, ‘Si séi en tumumpa mio' an tampa é tou imatéo?’ ” (Eng kaangéanna, e makawali si Kristus sumosorai eng kumua tumambisa wosama' malowir).

⁸Taan eng kaangéanna tana'i, “En Taar i Amang Kasuruan itu tawi keli ai camu; Am ba'ba' miow wo an untep in até miow.” En Taar itu si Abar Kaaruien andumoro' im paémanen sé ipakua-kua ami.

⁹Tana'i: sa kamu mangaku ang karapi im ba'ba' miow sapaoka si Yesus itu Kasuruan, wo maéman an untep in até miow sapaoka si Yesus tinou sumawel i Amang Kasuruan an uner é tou imatéo, kamu lowiren oka.

¹⁰Ampa'paan sa kita maéman an untep in até, kita nianggap wutul i Amang Kasuruan. Wo sa kita mangaku ang karapi im ba'ba', kita lowiren.

¹¹ Ang Kitap Le'nas aipatic in tana'i, “Si séike' e maéman ai Sia, ra'ica kawisa ipapalawi'.”

¹²E nunuwu' i Amang Kasuruan itu torona im pakasa é tou, ampa'paan sé tou Yahudi wo sé tou walina puté waya. Si Casuruan wayake' in esa, Sia itu Kasuruan é pakasa sé tou. Wo pakasa en tou sé mekiupus ai Sia kamangen-Na oka ang karapi i lumébé-lébé.

¹³ Ang Kitap Le'nas aipatic in tana'i, “Pakasa en tou sé mekiupus a si Casuruan, lowiren-Na oka.”

¹⁴Taan tambisa sé tou ro'na mekiupus ai Sia, sa séra ra'ipé' maéman ai Sia? Wo tambisa sé tou ro'na maéman ai Sia, sa séra ra'ipé' kawisa luminga in andumoro' Sia? Wo tambisa sé tou ro'na luminga in andumoro' Sia, sa ra'ica wana tou e mangé kumua ai séra in andumoro' Sia?

¹⁵ Wo tumambisa sé tou mangé kumua in andumoro' Sia, sa ra'ica wana en yutus? Tanu en aipatic ang Kitap Le'nas, “Arui keli sa awéan tou e maai kumua in Abar Kaaruien andumoro' i Yesus Kristus!”

¹⁶ Taan ra'ica pakasa en tou tumerima in Abar Kaaruien itu, tanu in aicua i nabi Yesaya, “Kasuruan, si séi e mercaya in abar si pakua ami?”

¹⁷Anaé, sé tou ro'na maéman, ampa'paan séra luminga in abar. Wo en abar itu ro'na lingan éra ampa'paan awéan tou e mangé kumua in abar andumoro i Kristus itu ai séra.

¹⁸ Taan wuéienku: Ra'ipé' réén sumangkum ako sé tou Israel luminga in Abar Kaaruien andumoro' i Yesus Kristus? Tantu séra sumangkumo luminga. Ampa'paan ang Kitap Le'nas aipatic in tana'i, “En suara é tou mengakua in abar, imakaro am pakasa ing kayo'baan, wo e nunuwu' éra imakaro a sé im pakasa é tou.”

¹⁹ Wuéienkupé' ka'i: Ra'ipé' réén kailekan é tou Israel en abar itu? Én, kailekan érao, ampa'paan kataré-taré si Musa kumua i nunuwu' i Amang Kasuruan ai séra tana'i, “Émaan-Ku oka kamu manganat a sé tou sé ra'ica tou-Ku, wo émaan-Ku oka kamu mae'bow, ampa'paan Aku méé ing kamang a sé tou sé paanggapen iow bodok.”

²⁰ Wo si Yesaya ka'i brani icumua i nunuwu' i Amang Kasuruan andumoro' é tou ra'ica Israel tana'i: “Yaku meta'upo wo sé tou sé ra'ica kawisa mangéré Yaku. Wo aipapaturu'-Kuo en owak-Ku ai séra sé ra'ica kawisa e memué-muéi in andumoro' Yaku.”

²¹ Taan andumoro' é tou Israel, si Yesaya kumua i nunuwu' i Amang Kasuruan tana'i, “Sumangando ayulur-Kuo eng kama-Ku en tumerima iséra, taan séra ra'ica le'tek wo icumélongke'.”