Read Tontemboan Roma 11 Bible Online

Roma 11 - Tontemboan bible

Roma 11

¹ Wuéienku, aicélongo réén i Amang Kasuruan sé tou Israel? Tantu ra'ica! Yaku in esa tou Israel, taranak i Abraham, an suku i Benyamin.

²Sé tou sinisir-Nao tumo'tolke' mai indior ra'ica aicélong i Amang Kasuruan. Tantu kailekano miow sapa en aipatic ang Kitap Le'nas, an tutuw i nabi Elia kumelak a si Amang Kasuruan andumoro' é tou Israel,

³ icuana, “O Kasuruan, sé nabi-Mu pinatéo éra. Wo em pawetaan i raragés torona-Mu tinerio éra. Yaku oka in esa e menonou, wo séra masalé' maté yaku.”

⁴ Wo sapa en aisowat i Amang Kasuruan a si Elia? “Awéané' pitu ngariwu tou Israel sé aitela'u-Kuo torona Yaku. Séra ra'ica kawisa maapo' a si Baal.”

⁵Taniitu ka'i intarépé': Awéané' piraan tou Israel en le'tek, sé sinisiro i Amang Kasuruan e mamuali tou-Na ampa'paan in upus aitambér-Na.

⁶Sinisir-Na séra ampa'paan in upus si aitambér-Nao, ra'ica ampa'paan im pengaémaan éra. Sa séra sinisir-Na ampa'paan im pengaémaan éra, eng kaangéanna, Sia sumisir séra en sumuli' im pengaémaan éra ra'ica ampa'paan in upus aitambér-Na.

⁷Anaé, tana'i e mamuali: Sé tou Israel mangéré lalan mamuali tou wutul an dior i Amang Kasuruan, taan kinakelian ai séra ra'- ica makéré sapa em paéré-érén éra. Wo sé tou Israel sé nianggap wutul wayake' im pira, sérao sé sinisiro i Amang Kasuruan. Taan sé tou Israel walina, niéma' keté ro'kos,

⁸ tanu si aipatic ang Kitap Le'nas in tana'i, “Émaan i Amang Kasuruan séra tanuoka sé tou makakili', awéan weren taan ra'ica maséré, awéan lunteng taan ra'ica malinga akar asi endo anio'.”

⁹ Wo icua i Daud, “Iwayao mio' eng kasalé-salé'an éra itu mamuali ta'kong ai séra, wo mamuali lo'beng lepokan éra. Siituo en susuli' ai séra.

¹⁰Wo iwayao mio' em beren éra mariréimbeng akar séra ra'io toro suméré, wo iwayao mio' séra mawo'ko akar ing kauré-uré.”

¹¹Anaé, intarépé' keli sé tou Israel icasangkil ampa'paan séra ra'ica maéman. Wuéienku sumawel: Sa sé tou Israel icasangkilo tanu siitu, icélong réén i Amang Kasuruan séra akar ing kauré- uré? Ra'ica taniitu, séra teriman oka. Taan ampa'paan ing kaséaan éra, akar si Amang Kasuruan méé mai in lalan kalowiran a sé bangsa walina. Émaan-Na taniitu ai séra wosama' sé tou Israel manganat ai séra.

¹²Anaé, ampa'paano ing kameséaan é tou Israel, eng kasiwakana sé bangsa walina makéré ing kamang asi Amang Kasuruan owo. Lébé-lébépé' ka'i sa sé bangsa Israel itu meelurano sumawel wo Sia, sé bangsa walina tantu makéré oka ing kamang ilumébé-lébé mai ai Sia.

¹³Taan intarépé' icuaku ai camu é bangsa ra'ica Yahudi: Yaku ayutusai mamuali ruru'du'an i Apo' Yesus eng kumua in Abar Kaaruien a sé tou ra'ica Yahudi. Wo anggapenku en tawoien itu patus irayo.

¹⁴Arapenku, ang karapi in tawoienku itu sé tou Israel sé esa taranak wo yaku manganat ai camu tou ra'ica Yahudi. Ang karapi in tumaniitu, arapenku aku ro'na lumowir piraan tou asé tou Israel.

¹⁵An tutuw éra aicélong i Amang Kasuruan, eng kasiwakana sé tou walina ang kayo'baan anio' makéré témpo meeluran sumawel wo Sia. Anaé, an tutuw é tou Israel tinerima-Nao, en itu esa kakaya'kaan wangko' tanuoka sé tou imatéo tumou sumawel.

¹⁶En andéanna tana'i, sa esa ngapokol roti kataré aiwééo a si Amang Kasuruan, pakasa e roti itu ka'i mamualio anu-Na. Wo sa en a'mut in tuura mamuali anu i Amang Kasuruan, em panga-pangana ka'i mamualio anu-Na.

¹⁷Anaé, em piraan pangana asi tuura in zaitun sé pinokolo, am bitu tampéngan im pangana asi tuura in zaitun walina, si ayandé icamu sé tou ra'ica Israel. Wo em panga-pangana walina itu aitampéng wosama' kumiit makéré kakanen asi a'mut in tuura in zaitun aseli si kumeli-keli seringa.

¹⁸Ampa'paano in itu tioo maepes im beren asé panga-pangana aseli sé pinokolo itu. Musti ta'néien iow, sapaoka kamu itu asaloke' pangana. Wo ra'ica pangana e méé kanen an a'mut, taan a'muto e méé kanen am pangana.

¹⁹An uner iow awéan wona' e makua: “Em panga-pangana itu pinokol, wosama' aku ro'na itampéng asi tuura itu.”

²⁰En itu wutul. Séra aitiya' ampa'paan séra ra'ica maéman, wo kamu tinerima ampa'paan kamu maémano. Anaé, kamu tioo matirayo, aweso taré kamu maindé'o mangé a si Amang Kasuruan.

²¹Ampa'paan sa ra'ica icaupus-Na sé panga-pangana aseli, Sia ka'i ra'ica mengaupus icamu.

²²Anaé, intarépé' kaséréano sapaoka si Amang Kasuruan itu uli-ulit sama' wo sa Sia mengaukum uter keli. En ukuman-Na uter a sé tou mengaéma' ing kamesé-meséaan, taan Sia loor ai camu sa kamu uli-ulit menonou mamangén ang kasamaan in até-Na. Sa kamu ra'ica menonou tanu siitu, kamu itiya'-Na oka tanu im panga-pangana sé pinokol itu.

²³Wo sé tou Israel ka'i, sa séra ra'- io keté ro'kos taan maémano, séra ka'i aitampéng oka sumawel. Ampa'paan si Amang Kasuruan awéan kawasa en tumampéng sumawel iséra.

²⁴Kamu sé ra'ica tou Israel, kamu tanu im pangana sé pinokol a si tuura in zaitun sé ra'ica aseli. Anaé, sa kamu ro'na itampéng a si tuura in zaitun aseli sé ra'ica mensomaan wo im peri miow, lébé-lébépé' ka'i sé tou Israel, sé ayandé im panga-pangana asi tuura in zaitun aseli itu! Tantu séra taporak keli itampéng i Amang Kasuruan an tuura in zaitun éra in esa.

²⁵Poo-poow esa paémanen, icuaku ai camu sé icaenepé' wosama' kamu ra'ica matirayo. Si anioo em pawasan i Amang Kasuruan sé icaenepé' itu: Kelian sé tou Israel imamualio keté ro'kos taan séra mamuali taniitu ra'ica akar ing kauré-uré, taan akarke' i malekep eng kakelina é tou ra'ica Israel sé maéman a si Kristus sé aitantuo i Amang Kasuruan.

²⁶ Wo sa imalekepo eng kakelina é tou ra'ica Israel sé maéman a si Kristus, pakasa sé tou Israel lowiren oka i Amang Kasuruan. Ang Kitap Le'nas aipatic in tana'i, “Maai oka si esa Tou en lumowir an Sion owo. Ampungan-Na oka eng kaléwo-léwo'an é taranak i Yakub.” [2]

²⁷ “En janji-Ku ai séra indior, lekepen-Ku oka an tutuw Aku méé ing kaampungan ang kamesé-meséaan éra.”

²⁸Intarépé' sé tou Israel ra'ica masalé' tumerima in Abar Kaaruien andumoro' si Yesus Kristus, ampa'paano in itu séra imamualio kaséké' i Amang Kasuruan. Taan ampa'paan séra ra'ica tumerima in Abar Kaaruien itu, akar kamu sé tou ra'ica Yahudi makéré ing kauntungan. Mandé ka'i taniitu, sé tou Israel tatapké icaupus i Amang Kasuruan ampa'paan séra itu tou sinisir-Na tumo'tolai indior, wo ka'i ampa'paan in janji-Na a sé apo-apo' éra indior.

²⁹Ampa'paan sa si Amang Kasuruan itumowa tou e mamuali tou-Na wo tambéran-Na in upus, ra'ica kawisa wo roban-Na sé pinusé'-Nao itu.

³⁰Indior, kamu sé tou ra'ica Israel ra'ica le'tek a si Amang Kasuruan. Taan intarépé' kamu itumerimao ing kaupusan-Na ampa'paano sé tou Israel ra'ica le'tek ai Sia.

³¹Taniitu ka'i sé tou Israel. Intarépé' séra ra'ica le'tek a si Amang Kasuruan, ang karoro'an in itu ituru'-Na eng kaupusan-Na ai camu tou ra'ica Israel. Taan asi endo mengangai, sé tou Israel itu ka'i tumerima oka ing kaupusan-Na.

³²Anaé, sé tou Israel kuma'pa ra'ica Israel, séra im baya aiwayao i Amang Kasuruan mamuali ra'ica le'tek, wosama' Sia tumuru' ing kaupusan-Na ai séra im baya.

³³ Ulit ra'io icakua eng kasiyaan, eng kapinteran wo eng kakailekan i Amang Kasuruan. Ra'ica wana mandé esake' en tou e ro'na makailek sé pinusé'-Na, wo ra'ica wana ka'i mandé esake' tou e ro'na makailek im pakatawoi-Na.

³⁴ Ang kitap Le'nas aipatic in tana'i: “Si séi e makailek im pakawerot i Casuruan? Si séi e makawoo sumina'u Sia?”

³⁵ “Si séi si sumangkumo méé in sapa-sapake' a si Casuruan, akar si Casuruan musti sumuli' ai sia?”

³⁶ Ampa'paan si Amang Kasuruano e méma' im baya-waya, wo pakasa en itu Siake' en tumu'tul. Pakasa en itu niéma'-Na wosama' Sia irayo. Anaé, irayoo wo siriino mangé Sia akar ing kauré-uré! Ulit.