Read Tontemboan Roma 13 Bible Online

Roma 13 - Tontemboan bible

Roma 13

¹Pakasa en tou musti le'tek a sé pemerénta. Ampa'paan ra'ica wana pemerénta sé ra'ica winéan hak i Amang Kasuruan e merénta. Wo pakasa sé pemerénta aitantu i Amang Kasuruan.

²Ampa'paano in itu sé tou mengasundur sé pemerénta, pakélong éra sapa sé aitantu i Amang Kasuruan. Wo sé tou tanu siitu makéré oka ukuman.

³Anaé, si tou mengaéma' in loor, sia ra'ica sangali maindé' a sé pemerénta, taan si tou mengaéma' in léwo', tantu sia maindé' a sé pemerénta. Ampa'paano in itu sa kamu masalé' wosama' ra'ica maindé' a sé pemerénta, mengaéma'o mangé in loor wosama' kamu irayo éra.

⁴Ampa'paan sé pemerénta itu mengaselewir a si Amang Kasuruan si matawoi torona ing kalooran iow. Taan sa kamu mengaéma' in léwo', kamu musti maindé' ai séra, ampa'paan séra itu wutu-wutul awéan kaloasan e mukum sé tou. Sé pemerénta itu mengaselewir a si Amang Kasuruan en sumuli' ing kae'bowan-Na a sé tou sé mengaéma' ing kaléwo-léwo'an.

⁵Ampa'paan in ituo kita musti le'tek a sé pemerénta, ra'ica asalo ampa'paan kita maindé' in ukumen, taan ka'i ampa'paan ing kasalé'an in até weresita.

⁶ Siituo e mangémai akar kamu mengawér im pajak a sé pemerénta. Ampa'paan séra itu maselewir a si Amang Kasuruan sé mengaéma' in tawoien si aiwéé-Na ai séra.

⁷Ampa'paan in ituo wérano sapa si patus wéran iow a sé pakasa in tou. Wérano mangé em pajak a sé pemerénta sa kamu musti mér im pajak, wo wérano mangé en cukai sa kamu musti mér in cukai. Wo pengalingan angé sé tou sé patus pengalingan iow, wo pengasiriin angé sé tou sé patus pengasiriin iow.

⁸Tioo kamu mautang sapake' mangé a sé tou, taan aweso taré en utang iow itu utang i meupu-upusan a si esa wo sé walina. Ampa'paan si séike' e mengaupus sé kakélé tou, sia iméma'o im perénta-perénta an ukum Torat.

⁹ An ukum Torat aipatic in tana'i: “Tioo mengabersina, tioo mengapaté tou, tioo mengarombit, wo ka'i tioo mengasalé' in anu é tou walina.” Sé perénta-perénta itu wo ka'i sé perénta-perénta walina pineesao a si perénta anio', “Mengaupus angé sé kakélé tou tanu kamu mengaupus in owak iow in esa.”

¹⁰Si tou mengaupus sé kakélé tou, ra'ica mengaéma' in léwo' a sé kakélé tou. Anaé, si tou mengaupus sé kakéléna tou, niéma'nao em perénta-perénta an ukum Torat.

¹¹Anaé, musti émaan iow sapa sé aicuakuo ai camu, ampa'paan kailekan iow sapaoka en orasna ra'io uré. Kamu ayandéku kaputé é tou makatekelé', ampa'paan in ituo tumooro. Ampa'paan eng kalowiran makatawio ai cita intarépé', sa en oras itu ipeputé an tutuw kita werupé' maéman.

¹²Em bengi tawio lumangkoi wo ra'io uré mandoo. Ampa'paano in itu mayoo tela'u waya sé léwo' tanu im pengaémaan é tou menonou ang kariréimbengan, wo timboiano em pakakas ipaperang ang kasendotan.

¹³Mayoo kita menonou in loor, tanu sé tou menonou ang kasendotan. Tioo mengéma-ngéma' ing kasalé-salé'an ing kuman wo mengele-ngelep sé ra'io masoma wo malangu-langu, tioo mengéma-ngéma' andumoro' in sina wo makiit ing kasalé'an sé ra'ica loor, tioo meindo-indoan roma' wo mangana-nganat.

¹⁴Taan aweso taré kita menonou meputé im peri sé aituru' i Apo' Yesus Kristus. Wo ra'io toro makiit im peri é tou sé maéma' ing kamesé-meséaan e marui ing kasalé'an in owakna in esa.