Read Tontemboan Roma 15 Bible Online

Roma 15 - Tontemboan bible

Roma 15

¹Kita sé ketero em paémanen, musti talesen a sé tou sé ra'ipé' keter em paémanen. Tioo kita mangéré-ngéréke' ing kaaruianta in esa.

²Taan kita si esa wo si esa musti mengaarui in até é kakéléta in tou torona ing kalooranna, wosama' em paémanenna a si Amang Kasuruan makaketer.

³ Ampa'paan si Kristus ka'i ra'ica mangéré-ngéré ing kaaruian in owak-Na in esa. Ang Kitap Le'nas aipatic in tana'i, “Nunuwu' iparoros é tou an tutuw séra mengaroros si Amang Kasuruan, intarépé' itumenao a Yaku.”

⁴Pakasa en aipatic ang Kitap Le'nas indior en sumusui ai cita. Wo pakasa en sususuien an untepna aiwéé e méma' icita talesen wo méé ing kaketeran im paémanen, wosama' kita tatapke' i maarap a si Amang Kasuruan.

⁵Pekiupusenku woo a si Amang Kasuruan, si palemboian ing katalesenan wo ing kaketeran im paémanen, tumambérai ing kaeluran ai camu kiit ing kasalé'an i Kristus Yesus.

⁶Wo in taniitu, kamu ro'na meesa en até wo esa nunuwu' e rumayo wo sumiri' si Amang Kasuruan, Amang i Yesus Kristus Apo'ta.

⁷Ampa'paano in itu, mensung-sungkulano mangé kamu si esa wo si esa, meputé si Kristus ka'i isumungkulo icamu. Wo in taniitu si Amang Kasuruan iparayo-rayo wo pasiri-siriin.

⁸Ta'néiku ai camu sapaoka si Kristus imayo ang kayo'baan en sumelewir a sé tou Yahudi en tumuru' sapaoka uli-ulit émaan i Amang Kasuruan sé aijanji-Na a sé apo-apo'ta.

⁹ Wo si Kristus mai ang kayo'baan torona ka'i é tou ra'ica Yahudi, wosama' séra ro'na rumayo wo sumiri' si Amang Kasuruan ampa'paan ing kaupusan-Na ai séra. Ang Kitap Le'nas aipatic in tana'i, “Ampa'paano in itu rayoku oka si Amang Kasuruan an uner é tou ra'ica Yahudi, wo kantarku oka eng kakantaren rarayoan e rumayo i ngaran-Mu.”

¹⁰ Wo ka'i awéan en aipatic tana'i, “Éi tou ra'ica Yahudi, maaru-aruio mangé kamu mewali-wali wo sé tou Yahudi sé mamuali tou-Na.”

¹¹ Wo awéan ka'i en aipatic in tana'i, “Éi pakasa kamu sé tou ra'ica Yahudi, irayoo si Casuruan! Mandéo pakasa in suku rumayo Sia.”

¹² Wo ka'i si nabi Yesaya kumua in tana'i, “Maai oka si esa tou asi taranak i Isai owo. Wo Sia maai oka e merénta a sé pakasa in tou ra'ica Yahudi. Wo ai Siao pakasa sé tou méé oka im paarapen.”

¹³Pekiupusenku a si Amang Kasuruan si palemboian im paarapen, e méé mai ing kaaruian wo ing kaeluran si mawuta-wuta ampa'paan kamu maéman ai Sia, wosama' eng kaketeran i Roh Le'nas lumepe-lepet ai camu, am paarapen a si Amang Kasuruan.

¹⁴Poo-poowku an esa paémanen, uli-ulit percayanku sapaoka kamu iméma'o ing keli kalooran. Kamu ka'i kelio eng kakailekan andumoro' in sususuien i Amang Kasuruan, wo makawoo mensin-sina'uan si esa wo si esa.

¹⁵Mandé in taniitu, yaku ra'ica malawi' e matic piraan sina'u an surat anio' en ta'néi ai camu, ampa'paan si Amang Kasuruan tumambéro mai in tawoien anio' a yaku.

¹⁶Yaku mamuali ata maselewir a si Kristus Yesus e mengakua in Abar Kaaruien andumoro' i Yesus Kristus a sé tou ra'ica Yahudi. En tawoienku tanu in tawoien é imam si mengawéé i raragés, ampa'paan aku makawali sé tou ra'ica Yahudi a si Amang Kasuruan wosama' séra teriman-Na tanu raragés si casalé'-Na wo si line'naso i Roh Le'nas.

¹⁷Anaé, ro'na aku rumayo in owak andumoro' in tawoienku torona i Amang Kasuruan ampa'paan aku meesao wo si Kristus Yesus.

¹⁸Taan aku ra'ica rumayo andumoro' in owakku, en rayoku asaloke' andumoro' sé niéma' i Kristus, akar ro'na iwaliku sé tou ra'ica Yahudi male'tek a si Amang Kasuruan ang karapi i nunuwu'ku wo im pengaémaanku,

¹⁹wo en tuu-tuus kakaya'kaan sé niéma'ku maké ing kawasa i Roh Le'nas. En Abar Kaaruien andumoro' i Yesus Kristus itu aicuakuo waya a sé tou, tumo'tolai an Yerusalem akar an Ilirikum.

²⁰Icasalé'ku keli mangé kumua in Abar Kaaruien itu an tampa-tampa sé ra'ipé' kawisa luminga i ngaran-Na. Ampa'paan ra'ica icasalé'ku mangun in jamaat an tampa awéano jamaat sé winangun é tou walina, wosama' aku ra'ica tanu sé tou si tumoor im bangunan am bawo im pandasi sé winanguno é tou walina.

²¹ Ang Kitap Le'nas aipatic in tana'i, “Sé tou ra'ipé' kawisa mako tumerima in abar andumoro' Sia, suméré oka Sia. Wo sé tou ra'ipé' kawisa mako luminga in abar andumoro' Sia, makailek oka andumoro' Sia.”

²² Ampa'paan aku maangé an tampa-tampa itu eng kumua in Abar Kaaruien andumoro' i Yesus Kristus, anaé aku ra'ipé' ica- angé ai camu.

²³Taan intarépé' en tawoienku an tampa-tampa itu linekepkuo, wo pirao ngata'un lumangkoi anio' aku masalé' keli maangé ai camu.

²⁴Anaé, em paarapenku ro'na woo tumuli wo meta'up ang karapi miow a Roma an tutuw aku maangé an Spanyol, akar en atéku uli-ulit arui mewali-wali wo icamu a mangé mbitu. Kekawus in itu, kamu ka'i paarapenku ro'na tumawang yaku an tutuw aku lumala'us im bawayaanku maangé an Spanyol.

²⁵ Taan, intarépé' aku ang karoro'an i maangé an Yerusalem e maali in sumbangan a sé tou le'nas a mangé mbitu.

²⁶Ampa'paan sé jamaat a Makedonia wo an Akhaya lumi'uso roit em béé a sé tou lengéi an uner é tou le'nas an Yerusalem.

²⁷ Séra méma' in taniitu ang karapi in arui en até. Wo séra patus tumawang sé poo-poow lengéi an Yerusalem itu, ampa'paan séra sé tou ra'ica Yahudi makéréo kamang luminga in Abar Kaaruien andumoro' i Yesus Kristus asé tou Yahudi owo an Yerusalem. Anaé, sé tou ra'- ica Yahudi patus sumuli' ing kaloo-looran é tou Yahudi ang karapi iméé sapa em paperlun éra.

²⁸Wo sa en doit itu aisarakankuo waya ai séra, kumawus in itu aku maangém an Spanyol taan tumuli owo ang kota miow.

²⁹Kailekanku, sa aku mangé meta'up ang karapi miow, tantu paalianku oka mangé ai camu keli kamang i Kristus.

³⁰Poo-poowku an esa paémanen, ampa'paan kita maémano a si Apo'ta Yesus Kristus, siituo e mangémai e Roh Le'nas matawoi an atéta akar kita ro'na meupu-upusan si esa wo si esa. Anaé, pekiupusenku ai camu wosama' kamu uli-ulit rumaméji mewali-wali wo yaku en sumombayang a si Amang Kasuruan toronaku.

³¹Isombayango mangé a si Amang Kasuruan wosama' téiran-Na aku am pawasan léwo' é tou ra'ica le'tek an tutuwku an Yudea. Wo ka'i sombayang angé wosama' en sumbangan aitambér é tou em paalinku mangé an Yerusalem, teriman é tou le'nas a mangé mbitu ang karapi in arui en até.

³²Wo sa mémang icasalé' i Amang Kasuruan, ro'nao aku maangé ai camu ang karapi in arui en até, wo aku makéré ing kaketeran im paémanen an uner iow.

³³Pekiupusenku woo a si Amang Kasuruan si palemboian ing kaeluran, mewali-wali oka wo icamu im baya. Ulit.