Read Tontemboan Roma 7 Bible Online

Roma 7 - Tontemboan bible

Roma 7

¹Poo-poowku! Kamu im baya makaileko in ukum. Anaé, tantu kailekan iow sapaoka en ukum itu kumawasa a si esa tou ang kauré i tou itu menonoué'.

²En andéanna si esa wéwéné kinawéngo, sia pakawa'kesen in ukum asi penanaanna, ang kauré i penanaanna menonoué'. Sa si penanaanna imatéo, sia aicawekaro asi ukum si ma'kes sia wo si penanaanna itu.

³Anaé, ang kauré i penanaanna menonoué', sia nianggap mabersina sa sia kawéngen i tuama walina. Taan sa si penanaanna imatéo, sia aicawekaro asi ukum itu. Anaé, sa sia kawéngen i tuama walina, sia ra'io nianggap mabersina.

⁴Taniitu ka'i kamu, é poo-poowku. Indior kamu kinawasa in ukum Torat. Taan intarépé' kamu tanu imatéo mewali-wali wo in owak i Kristus akar kamu aicawekaro an ukum Torat. Wo kamu mamualio anu i Kristus si tinou sumawel an uner é tou imaté wosama' eng katouanta awéan torona a si Amang Kasuruan.

⁵Ampa'paan, indior kita menonoué' makiit ing kasalé'anta sé léwo'. An tutuw itu kita pakakawasané' ing kasalé'an léwo' itu, wo kailekanta en itu suméa' ampa'paan aipatic an ukum Torat, taan eng kasalé-salé'an itu tatap matawoi an owakta akar kita méma' ing kamesé-meséaan si makawali cita am papaté.

⁶Taan intarépé' kita aiwekaro asi atoran in ukum Torat, ampa'paan kita imatéo mewali-wali wo si Kristus akar kita ra'io pakakawasan in ukum si cumawasa icita indior. Ampa'paan ituo kita intarépé' sumelewir a si Amang Kasuruan ang karapi ing katouan weru si aituru' i Roh Le'nas, ra'ica ang karapi ing katouan uré kiit in aipatic an ukum Torat.

⁷ Sa taniitu, sapa e ro'na icuata? Ra'ica réén loor en atoran an ukum Torat itu? Tantu loor! Wo ampa'paan taré in ukum Torat ituo, kinailekankuo en andumoro' ing kamesé-meséaan. Wo ra'ica kailekanku e mengasalé' in anu é tou itu suméa', sa an ukum Torat ra'ica icumua, “Tioo mengasalé' in anu é tou.”

⁸Taan an tutuw kinailekankuo en atoran itu, eng kamesé-meséaan awéan témpo en tumou ing kasalé-salé'an léwo' sé membalinaan an owakku. Ampa'paan sa ra'ica wana en ukum Torat en tumuru' ing kamesé-meséaanku, eng kamesé-meséaan itu ra'ica wana kawasa an owakku.

⁹Indior, an tutuwku ra'ipé' makailek in ukum Torat, pawerotenku aku menonou ang karapi in loor. Taan an tutuw kinailekankuo en ukum Torat, eng kamesé-meséaan tumo'tolo menonou an owakku,

¹⁰wo eng kasiwakana aku maté. En ulitna, en ukum Torat musti makawali ang katouan, taan eng kasiwakana makawalike' taré am papaté.

¹¹ Ampa'paan en ukum Torat itu pinaké ing kamesé-meséaan e muwak yaku wo makawali yaku am papaté.

¹²En ukum Torat itu le'nas, anaé pakasa en atoran an ukum Torat itu le'nas, wutul wo loor.

¹³Sa taniitu, en atoran loor itu réén e makawali yaku am papaté? Tantu ra'ica! Taan eng kamesé-meséaano e makawali mai im papaté itu. Wo sé loor itu pinaké ing kamesé-meséaan e makawali yaku am papaté, wosama' kaséré-séréan eng kawasa ing kamesé-meséaan itu léwo' keli. Anaé, ampa'paano in atoran-atoran itu, uli-ulit tumuru'o sapaoka sé kamesé-meséaan itu léwo' keli.

¹⁴Kailekanta sapaoka en ukum Torat itu asi Roh i Amang Kasuruan owo, taan aku anio' tou makiité' ing kasalé'an in owakku in esa. Yaku mamualio ata ing kamesé-meséaan.

¹⁵ Ampa'paan yaku in esa ra'ica makailek sapa em pengaémaanku. Sé icasalé'ku woo émaan, en itu ra'ica pengaémaanku; taan sé icasuutku woo émaan, siitu taré sé pengaémaanku.

¹⁶Wo in taniitu, sa émaanku sé ra'ica icasalé'ku, eng kaangéanna pangakunku en ukum Torat itu loor.

¹⁷Anaé, ra'io ka'i yaku e méma' ing kaléwo'an itu, taan eng kamesé-meséaan si an untep in owakku e méma' in itu.

¹⁸Kailekanku ra'ica wana sé loor an owakku, iciit ing katouanku in tou. An owakku awéan eng kasalé'an e méma' sé loor, taan en itu ra'ica kawooanku iméma'.

¹⁹Ra'ica pengaémaanku sé loor sé icasalé'ku émaan; taan aku mengaéma'ke' sé léwo', sé ra'ica kiimku émaan.

²⁰Anaé, sa aku mengaéma' sé ra'ica icasalé'ku, eng kaangéanna ra'ica yaku e mengaéma' in itu, taan eng kamesé-meséaano sé kumawasa an owakku akar émaanku sé léwo'.

²¹Anaé, tana'io e mamuali a yaku: Yaku masalé' méma' sé loor, taan si kasalé'-salé'anke' mengaéma' sé léwo' e mai an owakku.

²²An untep in atéku, icasalé'ku keli méma' in ukum i Amang Kasuruan,

²³taan an owakku awéané' kawasa walina mapetokol wo ing kasalé'anku eng kumiit in ukum i Amang Kasuruan itu. Ang kasomoiana aku rinantéo ing kawasa ing kamesé-meséaan si an untep in owakku.

²⁴Oré wéta' aku anio'! Si séi e ro'na lumowir yaku ang kawasa ing kamesé-meséaan anio' si makawali yaku am papaté?

²⁵Makapulu'sama' a si Amang Kasuruan ampa'paan Siao en lumowir yaku ampa'paano i Yesus Kristus Apo'ta. Anaé tana'i, en atéku masalé' kumiit in ukum i Amang Kasuruan, taan en owakku pakakawasané' ing kamesé-meséaan.