Read Tontemboan Roma 9 Bible Online

Roma 9 - Tontemboan bible

Roma 9

¹Sapa en icuaku anio' wutul, ampa'paan aku meesao ang karapi i Kristus. Yaku ra'ica matowo. En até weresiku si pakaakinen i Roh Le'nas méé kasairian,

²sapaoka en atéku susa keli wo tatap mawendu ampa'paan sé tou Israel tou ra'ica maéman a si Yesus.

³Séra itu poo-poowku kaputé wo yaku. Yaku in esa tu'tulo ing kutuken i Amang Kasuruan wo ipetané asi Kristus sa en itu ro'na méma' sé tou Israel itu malowir an ukuman ing kamesé-meséaan.

⁴Séra itu sinisiro i Amang Kasuruan wo niangkaio mamuali toyaang-Na in esa wo tumerimao ka'i i rarayo wo in sisiri'-Na. Séra jinanjian i Amang Kasuruan ing kamangen, wo winéan-Nao ukum Torat. Wo aicuao i Amang Kasuruan ai séra tumambisa maapo' ai Sia, wo ka'i séra winéan-Nao in janji-janji.

⁵Séra itu taranak é apo-apo' é tou Israel. Si Kristus ka'i taranak éra, sa iciit in owak. Siao si Amang Kasuruan si makakawasa am baya-waya, wo iparayo-rayo akar ing kauré-uré. Ulit!

⁶Mandé ka'i in taniitu, ra'ica icuaku sapaoka si Amang Kasuruan ra'ica lumekep in janji-janji-Na a sé tou Israel. Ampa'paan ra'ica pakasa sé taranak Israel sisiren i Amang Kasuruan mamuali tou-Na.

⁷ Wo ka'i ra'ica pakasa sé taranak i Abraham itu toya-toyaang i Amang Kasuruan. Ampa'paan aicua i Amang Kasuruan a si Abraham, “Sé patuulen taranakmu wayake' sé taranak i Ishak.”

⁸Eng kaangéanna, ra'ica pakasa sé taranak i Abraham mamuali toya-toyaang i Amang Kasuruan. Taan sé toyaang itumou ampa'paan in janji i Amang Kasuruan sérao sé patuulen toya-toyaang-Na.

⁹ Ampa'paan en janji i Amang Kasuruan a si Abraham tana'i, “Asi ta'un maai asi oras tanu sia'i, Yaku maai oka sumawel, wo si Sara makéré oka esa toyaang tuama.”

¹⁰Taniitu ka'i e niéma' i Amang Kasuruan a sé toyaang i Ribka. Si Ribka makéré rua toyaang kambar, asi penanaanna makangaran Ishak, apo'ta.

¹¹Wo ra'ipé' itumou sé rua toyaang itu, si Amang Kasuruan tumantuo im pawasa-wasa-Na. En itu ra'ica ampa'paan im pengaémaan é rua toyaang itu, ampa'paan an tutuw sé rua toyaang itu ra'ipé' maéma' sé loor wo sé léwo',

¹² aicuao i Amang Kasuruan a si Ribka, “Si toyaang matu'a e mamuali oka ata i toyaang wo'bas.”

¹³ Tanu in aipatic ang Kitap Le'nas tana'i: “Si Yakub icaupus-Ku, taan si Esau icasuut-Ku.”

¹⁴Sa taniitu, sapa e ro'na icuata? Marapitke' réén si Amang Kasuruan? Tantu si Amang Kasuruan ra'ica marapit!

¹⁵ Tanu en aicua-Na a si Musa, tana'i: “Ituru'-Ku oka eng kaupusan a si séi en icasalé'-Ku turu'an in itu. Wo ituru'-Ku oka eng kalooran a si séi en icasalé'-Ku turu'an in itu.”

¹⁶Anaé, si Amang Kasuruan sumisir tou ra'ica kumiit ing kasalé'an é tou, kuma'pa im pengaémaan é tou, taan Sia in esao en tumantu sapaoka Sia masalé' méé ing kaupusan-Na.

¹⁷ Ampa'paan ang Kitap Le'nas aipatic in andumoro' sé aicua i Amang Kasuruan a si Firaun kolano i Mesir, tana'i, “Angkaien-Ku ko mamuali kolano, wosama' ituru'-Ku eng kawasa-Ku ai co, wosama' ka'i e ngaran-Ku katuusan waya é tou ang kayo'baan.”

¹⁸Anaé, si Amang Kasuruan itumuru' ing kaupusan a si séike' sé icasalé'-Na, wo Sia ka'i méma' sé tou mamuali keté ro'kos a si séike' sé icasalé'-Na.

¹⁹Intarépé' tantu awéan tou e mamuéi a yaku, “Sa si Amang Kasuruan en tumantu si séi em béan-Na ing kaupusan wo si séi si keté ro'kos, kéitu réén Sia méépé' kaséaan a sé tou keté ro'kos? Ampa'paan ra'ica wana tou e ro'na kumélong ing kasalé'an-Na!”

²⁰ Taan kita ra'ica toro kumua in taniitu, kita anio' touke'. Wo kita in tou ra'ica wana hak eng kumua a si Amang Kasuruan sapaoka Sia meséa'. Ro'na réén eng kuré' kumua a si mengaéma' ing kuré, “Kéitu réén aku niéma'mu tana'i?”

²¹Si tou maéma' ing kuré' awéan hak e méma' ing kuré' kumiit ing kasalé'anna. Asi tana' pulut itu ro'na émaanna rua kuré', si esa papakén an acara penting wo si esa papakén susur in endo.

²²Taniituo ka'i sapa sé niéma' i Amang Kasuruan. Sia awéan hak en tumuru' ing kae'bowan-Na wo tumuru' ing kakawasaan-Na. Taan Sia tumuru' ing katalesenan-Na a sé tou sé tu'tulo im patén ampa'paan méma' Sia mae'bow.

²³Sia talesen ai séra wosama' Sia ro'na tumuru' ing kawangko' i rarayo wo in sisiri'-Na a sé tou icaupus-Na, sé aitu'tul-Nao indioré' owo a sé tou en tumerima in itu.

²⁴Wo icitao sé tou tinowa-Nao en tumerima i rarayo wo in sisiri' itu, anaé ra'ica sé tou Yahudike' taan ka'i sé tou ra'ica Yahudi.

²⁵ Tanu en aicua i Amang Kasuruan ang kitap i nabi Hosea andumoro' sé tou ra'ica Yahudi tana'i, “Sé tou indior ra'ica tou-Ku, tuulen-Ku oka ‘tou-Ku’. Wo sé tou indior ra'ica icaupus-Ku, tuulen-Ku oka ‘tou icaupus-Ku.’ ”

²⁶ Wo ka'i aipatic in tana'i, “An tampa kinuanan a sé tou ‘kamu ra'ica tou-Ku’, am bitu séra tuulen oka ‘toya-toyaang i Amang Kasuruan si menonou.’ ”

²⁷ Taan si nabi Yesaya icumua in taangko' andumoro' é tou Israel tana'i, “Mandé ka'i sé taranak é tou Israel kelian tanu ing kakeli i rangi'ngis an tembir in ta'sic, taan waya im pira en lowiren an ukuman ing kamesé-meséaan.

²⁸Ampa'paan sapa sé aicuao i Amang Kasuruan tantu émaan-Na oka wo ra'io ipauré-uré. Ukumen-Na waya in da'ica marapit sé ang kayo'baan anio'.”

²⁹ Wo si nabi Yesaya icumua ka'i andumoro' é tou Israel, “Sa si Amang Kasuruan si Makakawasa ra'ica tumela'u piraan tou asé taranakta, tantu icita im baya makaka'pu-ka'pu pinaté tanu sé tou ang kota Sodom wo eng Gomora.”

³⁰Anaé, ro'na icuata in tana'i: Sé tou walina sé ra'ica Yahudi ra'ica rumaméji nianggap wutul i Amang Kasuruan, taan séra nianggap-Na wutul ampa'paan séra maéman a si Yesus.

³¹Taan sé tou Israel rumaméji makiit in ukum Torat wosama' séra nianggap wutul i Amang Kasuruan. Taan en ukum itu ra'ica kaémaan éra, anaé séra ra'ica nianggap wutul i Amang Kasuruan.

³²Kéitu séra ra'ica nianggap wutul i Amang Kasuruan? Ampa'paan séra rumaméji nianggap wutul i Amang Kasuruan ang karapi i makiit in ukum Torat, taan ra'ica ampa'paan maéman a si Amang Kasuruan. Anaé, séra icasangkil asi watu pengasangkilan wo icalepok.[1]

³³ Wéanio' rékén sumama-sama', tanu in aipatic ang Kitap Le'nas tana'i, “Aiweta'-Kuo ang kuntung Sion esa watu e méma' sé tou icasangkil, si esa watu wangker si méma' oka sé tou icalepok. Taan si séi e maéman a si Casuruan, ra'ica ipapalawi'.”