Read Tontemboan 1 Korintus 1 Bible Online

1 Korintus 1 - Tontemboan bible

1 Korintus 1

¹En surat anio' a yaku owo Paulus, si tinowao mamuali ruru'du'- an i Yesus Kristus kumiit ing kasalé'an i Amang Kasuruan. Wo en surat anio' aipaticku wo si Sostenes, poowta an esa paémanen.

² En surat anio' aipaticku ai camu jamaat i Amang Kasuruan ang Korintus sé line'naso i Amang Kasuruan ampa'paan imeesao ang karapi i Kristus Yesus, wo ka'i tinowao i Amang Kasuruan e mamuali tou le'nas mewali-wali wo sé pakasa in tou maéman am pakasa in tampa, sé maapo' a si Yesus Kristus, si Apo'ta im baya.

³Pekiupusenku a si Amang Kasuruan Amangta wo a si Apo' Yesus Kristus en tumambérai in upus-Na wo méma' ing katowan iow elur.

⁴Yaku mengua-ngua i makapulu'sama' a si Amang Kasuruan ampa'paan Sia tumambéro mai ing kamang ai camu sé meesao wo si Kristus Yesus.

⁵Ampa'paan kamu mamualio anu i Kristus, akar kamu imasiya'o am baya-waya tanu mai sé anio': makawoo maroma' i nunuwu' loor wo kelian eng kailekan andumoro' im paémanen a si Kristus.

⁶En itu mamuali tuus sapaoka kamu masiya'o am paémanen ampa'paan niéma'o mai i Amang Kasuruan en abar andumoro' i Kristus uli-ulit an atéo miow.

⁷Wo in taniitu sé kamang aitambéro mai i Roh Le'nas ai camu ra'ica maina' mandé esake' ang karoro'an iow maento-ento' si Apo'ta Yesus Kristus maai sumawel.

⁸Sia oka ka'i e méma' mai im paémanen iow kasake' keter akar ing kaka'puan ing kayo'baan, akar kamu kéréan-Na ra'ica wana kaséaan asi endo si Apo'ta Yesus Kristus maai sumawel.

⁹Si Amang Kasuruan le'tek. Tinowa-Nao kamu e meesa ang karapi i Toyaang-Na, si Yesus Kristus Apo'ta.

¹⁰Poo-poowku! Pekiupusenku ang karapi i ngaran i Apo'ta Yesus Kristus, wosama' kamu im baya esa nunuwu'. Tioo awéan papetanéan an uner iow, aweso taré kamu meesa en até wo esa em bewerot.

¹¹Poo-poowku, yaku kumua tanu siitu ampa'paan awéan sé tou am pamalé i Kloe cumua mai a yaku sapaoka an uner iow awéan sé meindo-indoan roma'.

¹² Em peangé-angénku tana'i: Awéan tou an uner iow sé makua, “Yaku makiit si Paulus”, awéan ka'i sé makua, “Yaku makiit si Apolos”, sé walina ka'i makua, “Yaku anio' makiit si Petrus”[1] wo sé walina ka'i makua, “Yaku makiit si Kristus.”

¹³Wuéienku ai camu, ro'na réén si Kristus pengawéténgen? Tantu ra'ica? Wo ka'i andumoro'ku, yaku réén en aisalip en lumowir icamu? Ra'ica? Wo an tutuw iow nibaptis, maké réén i ngaranku? Tantu ra'ica?

¹⁴ Yaku kumua i makapulu'sama' a si Amang Kasuruan, ampa'paan an uner iow ra'ica wana tou sé nibaptisku, aluar i Krispus wo si Gayus.

¹⁵Wo in taniitu ra'ica wana tou an uner iow e ro'na kumua sapaoka sia nibaptisku maké i ngaranku e mamuali mengakiit yaku.

¹⁶Intarépé' kinata'néiankuo sapaoka pakasa en tou am pamalé i Stefanus yaku e maptis. Aluar iséra ra'- io kata'néianku sa awéané' tou walina e nibaptisku.

¹⁷Ampa'paan aku ra'ica airu'du' i Kristus e mengabaptis taan airu'du'ke' ing kumua in Abar Kaaruien. Wo en Abar Kaaruien ipakuaku itu, ra'ica mapaké ing kapinteranku maroma'. Niéma'ku tanu siitu wosama' eng kawasa im papaté i Kristus ang kayu salip ra'ica mara'i-ra'i.

¹⁸En abar andumoro' i Kristus imaté ang kayu salip itu nianggap ra'ica wana torona é tou sé maangé am papaté. Taan kita sé makéré ing kalowiran i Amang Kasuruan, en abar andumoro' im papaté i Kristus itu, siituo en tumuru' si Amang Kasuruan makakawasa.

¹⁹ Ampa'paan ang Kitap Le'nas aipatic in tana'i, “Si tou awéan kapinteran, itala-Ku oka eng kapinteranna itu. Wo si tou pandéi, itala-Ku oka eng kapandéianna itu.”

²⁰ Sa taniitu, sapa en torona é tou awéan kapinteran? Wo sapa en toronana sé tou makailek wutul in Torat? Wo sapa en torona sé tou pandéi ang kayo'baan anio' sé masalé' masundur i nunuwu' é tou walina? En ulitna aituru'o i Amang Kasuruan sapaoka eng kapinteran é tou pandéi itu ra'ica wana torona.

²¹Ampa'paan mandé tambisa eng kapinteran é tou ang kayo'baan, ra'ica makawoo makatuus si Amang Kasuruan sa asalo maké ing kapinteran in esa. Taan ampa'paan ing kapinteran i Amang Kasuruan, pinusé'-Nao en lumowir sé tou maéman ai Sia kumiit in abar ipakua-kua ami. En abar itu, paanggapen é tou ra'ica maéman a si Yesus, abar ra'ica wana torona.

²²Sé tou Yahudi mangilek tuus kakaya'kaan owo wo séra mercaya. Sé tou Yunani maké ing kapinteran in esa e mercaya.

²³Taan kami anio' asalo makua in abar andumoro' i Kristus si maté ang kayu salip. En abar andumoro' i Kristus itu, asaloke' mamuali watu pasangkilan a sé tou Yahudi, akar séra ra'ica maéman a si Kristus. Wo sé tou ra'ica Yahudi, paweroten éra en abar itu abar ra'ica wana torona.

²⁴Taan sé tou tinowao i Amang Kasuruan, tou Yahudi kuma'pa ra'ica Yahudi, séra ro'na makailek andumoro' ing kawasa i Amang Kasuruan wo eng kapinteran-Na, asi abar i Kristus itu.

²⁵Mandé sé niéma' i Amang Kasuruan itu paanggapen é tou ra'ica wana torona, taan sé niéma' i Amang Kasuruan itu en lébépé' pinter asé sapa sé paanggapen é tou itu. Wo mandé sé niéma' i Amang Kasuruan itu paweroten é tou ra'ica wana kawasa, taan sé niéma' i Amang Kasuruan itu en lébépé' wangko' eng kawasana wo sé ro'na émaan é tou.

²⁶Poo-poowku sé maéman. Ra'io réén kata'néian iow tambisa eng katouan iow indior an tutuw i Amang Kasuruan tumowa camu eng kumiit si Kristus? Sa iciit im pakawerot in tou, wayake' im pira sé tou awéan kapinteran ai camu, wayake' im pira sé tou awéan kakawasaan wo wayake' im pira ka'i sé tou asé pamalé pasiri-siriin owo.

²⁷Si Amang Kasuruan tumutu' sumisir tou sé paweroten ing kayo'baan tou bodok, e mapalawi' sé tou paweroten ing kayo'baan tou awéan kapinteran. Wo sinisir-Na ka'i sé tou paweroten ing kayo'baan tou ra'ica wana kakawasaan e mapalawi' sé tou sé paweroten ing kayo'baan tou makaanu ing kakawasaan.

²⁸Si Amang Kasuruan ka'i sumisir tou sé paweroten ing kayo'baan tou wawa', sé ra'ica pasiriin wo sé ra'ica wana torona. Sinisir-Na séra e méma' sé tou paweroten ing kayo'baan tou pasiri-siriin, émaan-Na uli-ulit ra'ica wana torona.

²⁹Wo in taniitu ra'ica wana mandé esake' tou e ro'na rumayo in owakna an dior i Amang Kasuruan.

³⁰Si Amang Kasuruan in esa e méma' camu meesa ang karapi i Kristus Yesus. Wo si Kristus Yesuso e méma' cita mapinter, wo ampa'paano Sia ka'i kita nianggap wutul i Amang Kasuruan. Niéma ka'i Yesus kita mamuali tou le'nas wo ka'i tinu'bus-Na kita ang kamesé-meséaanta.

³¹ Anaé, ampa'paan pakasa sé niéma'o i Amang Kasuruan ai cita, kakailekantao sapa eng kaangéan si aicua ang Kitap Le'nas tana'i, “Si tou matirayo in owakna, musti tumirayo sapa sé niéma' i Casuruan ai sia.”