Read Tontemboan 1 Korintus 10 Bible Online

1 Korintus 10 - Tontemboan bible

1 Korintus 10

¹ Poo-poow sé maéman, ita'néiku sumawel ai camu sapa e mamuali a sé apo-apo'ta an tutuw séra icumiit si Musa. An tutuw itu séra im baya pakaloindongen ing kambung wo séra im baya maya' lumewet in Ta'sic Réindang.

²Séra im baya nibaptis an untep ing kambung wo an untep in ta'sic, akar séra mamuali makiit si Musa.

³ Wo séra im baya icuman ing kakanen puté si aiwéé i Amang Kasuruan iciit ing kawasa-Na.

⁴ Wo séra im baya ka'i melep asi rano si meputéo si aiwéé i Amang Kasuruan iciit ing kawasa-Na. Si rano nielep éra itu, malemboi asi watu wangker asi Amang Kasuruan owo. Wo si watu itu tumuru' a si Kristus si mewali-wali wo iséra.

⁵ Taan mandé ka'i séra im pakasa makéré ing kama-kamang tanu siitu asi Amang Kasuruan, kinakelian ai séra ra'ica icasalé' i Amang Kasuruan. Ampa'paano in itu séra pinakapaté-paté akar e mayat éra ra'io metu'tul an tana' kapayasan.

⁶ Pakasa sé mamualio itu mawéé tuus ai cita wosama' ra'ica toro mengasalé' sé andumoro' in léwo', kaputé im paémaan éra,

⁷ wo ka'i wosama' kita ra'ica mamuali tou maapo' a sé opo-opo', kaputé im paémaan é piraan tou ai séra. En itu meputé si aipatic ang Kitap Le'nas tana'i, “Si bangsa itu lumukut eng kuman wo melep mewali-wali, wo makatulung maéngké maapo' marayo sé opo-opo'.”

⁸ Wo kita ka'i tioo mengaéma' in cabul kaputé im paémaan é piraan ai séra itu. Eng kasiwakan im pinengaéma' éra itu, an sangando rua ngapulu' telu ngariwu tou mengapaté.

⁹ Wo kita ka'i tioo mengangepé' a si Kristus, kaputé im pengaémaan é piraan ai séra, akar séra imaté kinarét i ula'.

¹⁰ Wo tioo kita mengi-ngimburung kaputé im pengaémaan é piraan ai sera itu, siituo séra pinaté i malaékat im papaté.

¹¹Pakasa sé mamuali ai séra itu, mééo tuus ai cita. Wo pakasa en itu aipatic e méé tata'néi ai cita. Ampa'paan kita intarépé' menonou an oras imatawio ing kaka'puan ing kayo'baan.

¹²Ampa'paano in itu, si séi e mawerot em paémanenna ketero, sia musti mareti-reti wosama' sia ra'ica taporak méma' ing kamesé-meséaan.

¹³Sé pangepé'an pinendam iow itu, pangepé'an sé manaramo pengasangkumen é tou. Wo si Amang Kasuruan kasake' le'tek an janji-Na, anaé kamu ra'ica iwaya-Na asé pangépé'an sé ra'ica kawooan iow mamuléng. Taan tutuw iow pinangepé'an, kamu wéan-Na oka lalan akar kamu makawoo sumaru im pangepé'an.

¹⁴Ampa'paan in ituo é poo-poow sé icaupusku, kamu tioo mengaapo' a sé opo-opo'.

¹⁵Ipakuaku andumoro' sé anio' ai camu ampa'paan kailekanku sapaoka kamu tou awéan kapinteran. Anaé, camu oka in esa e merot sé ipakuaku anio' wutul kuma'pa ra'ica.

¹⁶ An tutuw kita melep in anggor am perjamuan le'nas wo kumua i makapulu'sama' a si Amang Kasuruan, eng kaangéanna, kita imeesao wo si Kristus am papaté-Na. Wo an tutuw kita kuman i roti si aite'bi-te'bi', eng kaangéanna, kita meesao ang karapi in owak i Kristus.

¹⁷Ampa'paan e roti wayake' in esa wo kita im baya icumano asi roti esa itu wo kita sé kelian anio' imamualio esa owak.

¹⁸Tanu siitu ka'i sé tou Israel indior. An tutuw éra maali raragés am pawetaan i raragés, séra makéré im bagéan ing kuman i raragés itu. Wo séra sé icuman itu, imeesao ang karapi im pawetaan i raragés itu.

¹⁹Kaangéan iow réén sapa sé pakuaku itu? Eng kaangéanna tana'i: sé opo-opo' wo eng kakanen ayumper a sé opo-opo', rua-rua itu ra'ica wana torona.

²⁰ Icuaku in taniitu ampa'paan e raragés ayumper éra itu, asaloke' a sé roh léwo' ra'ica a si Amang Kasuruan. Wo ra'ica kiimku kamu meesa ang karapi é roh léwo'.

²¹Sa kamu imelepo in anggor asi paelepan am perjamuan i Casuruan, kamu ra'io toro ka'i melep asi paelepan in anggor torona é roh léwo'. Sa kamu icumano a méja im perjamuan i Casuruan, kamu ra'io toro ka'i kuman asi méja pengaapo'an torona é roh léwo'.

²² Sa kita kumiit kuman sé airagéso a sé roh léwo', niéma'tao si Casuruan mae'bow. Tioo mawerot icita en lébé keter wo si Casuruan.

²³ Poo-poow, awéan sé tou makua in tana'i, “Sapake' sé icasalé'ta ro'na émaanta.” En itu wutul, taan ra'ica pakasa sé icasalé'ta itu awéan en torona. “Ro'na émaanta sapake' sé icasalé'ta” taan ra'ica pakasa sé icasalé'ta itu ro'na méé ing kaketeran in até é tou.

²⁴Tioo awéan esaan ai camu mangéré kauntunganna in esa, taan esa wo si esa tou mangéré mangé kauntungan é tou walina.

²⁵Ro'na kanen iow sé sama'na sé ipawangkér é tou am pasar. Ra'ica sangali pangérén iow am bisa owo sé sama'na itu, pinakéo torona i raragés kuma'pa ra'ica. Kuman in sama'na tanu siitu en até weresi miow ra'ica sangali mendam i meséa'.

²⁶ Ampa'paan eng kayo'baan wo pakasa sé an untepna anu i Casuruan.

²⁷Sa sé tou ra'ica maéman mai menot icamu kuman, wo tinerima miow e nienot itu, kanenno mio' sapa sé ayumper éra ai camu. Nomoo paéré-érén am bisa owo sé kakanen itu. Kuman ing kakanen tanu siitu en até weresi miow ra'ica sangali mendam i meséa'.

²⁸Taan sa awéan tou kumua ai camu, “Eng kakanen itu ayumpero a sé opo-opo',” ra'ica toro kanen iow eng kakanen itu. Ampa'paan musti weroten iow in até weresi.

²⁹Em paangé-angénku até weresi i tou icumua ai camu, ra'ica até weresi miow in esa. Awéan wona' ai camu mamuéi in tana'i, “Kéitu réén eng kaloasanku musti aitantu in até weresi é tou walina?

³⁰Sa aku kuman ing kakanen sapa-sapake' wo kumua makapulu'sama' a si Casuruan andumoro' ing kakanen itu, tantu ra'io wana alasan sé tou walina rumoros yaku ampa'paan aku mééo makapulu'sama' a si Amang Kasuruan ampa'paan ing kakanen itu.”

³¹Anaé, sapa-sapake' en émaan iow, eng kanen iow kuma'pa en elepen iow, émaano mangé em pakasa in itu asaloke' i rumayo wo sumiri' si Amang Kasuruan.

³²Kamu musti menonou tanu siitu akar ra'ica émaan iow sé tou walina méma' ing kameséaan, sia tou Yahudi, tou ra'ica Yahudi, kuma'pa sé tou maéman a si Kristus an jamaat-jamaat i Amang Kasuruan.

³³Menonouo mio' kaputéku. Raméjinku marui in até é tou am baya-waya. Yaku ra'ica mangéré ing kalooranku in esa, taan aku mangéré ing kalooran é tou keli wosama' séra ro'na lowiren.