Read Tontemboan 1 Korintus 2 Bible Online

1 Korintus 2 - Tontemboan bible

1 Korintus 2

¹Poo-poowku, indior an tutuwku imai ai camu, ipakuaku andumoro' sé pawasa-wasan i Amang Kasuruan si ra'ipé' kailekan é tou walina. Asi témpo itu, sé pakuaku itu ra'ica mapaké nunuwu' rangka' kuma'pa nunuwu' ing kapinteran in tou.

²Ampa'paan eng kauré aku mewali-wali wo icamu, pinusé'kuo ra'ica kiimku kumua andumoro' sé walina ai camu, aluar andumoro'ke' i Yesus Kristus si maté ang kayu salip.

³ Wo an tutuwku maento' ang karapi miow, en owakku uli-ulit lembi wo maindé' keli akar en owakku gume'ger.

⁴An tutuw aku maroma' wo makua in Abar Kaaruien ai camu, yaku ra'ica mapaké nunuwu' ing kapinteran in tou im percayan iow, taan aku mapercaya a si kawasa i Roh Le'nas.

⁵Yaku méma' in taniitu, wosama' em paémanen iow ra'ica mamangén asi kapinteran in tou taan asi kawasa i Amang Kasuruan.

⁶Mandé ka'i in taniitu, sa kami makua a sé tou sé uli-ulit maémano, kami makua andumoro' ing kapinteran. Eng kapinteran itu ra'ica asi kayo'baan owo, ra'ica ka'i asé tou owo sé makatimboi ing kakawasaan ang kayo'baan anio', si kakawasaan maka'pu oka.

⁷Sé ipakua ami itu kapinteran asi Amang Kasuruan owo. Eng kapinteran itu ra'ipé' kailekan é tou wo aicaenepé', taan en itu tinu'tulo i Amang Kasuruan an tutuw eng kayo'baan anio' ra'ipé' niéma' wosama' kéréanta em bagéan asi rarayo wo in sisiri'-Na.

⁸Wo ra'ica wana esa tou asé makatimboi ing kakawasaan asi kayo'baan anio' e makailek andumoro' ing kapinteran itu. Sa eng kapinteran itu kailekan éra, ra'ica aisalip éra si Apo' Yesus si parayo-rayo wo pasiri-siriin itu.

⁹ Ang Kitap Le'nas awéan aipatic in tana'i, “Sapa sé ra'ipé' sumangkum ako sinéré é tou, sé ra'ipé' sumangkum ako lininga, sé ra'ipé' sumangkum ako lumembo mai an até, siituo en tinu'tul i Amang Kasuruan a sé tou mengaupus Sia.”

¹⁰Taan intarépé' si Amang Kasuruan imaké i Roh-Na en tumi'tir waya in itu ai cita. Aicuao i Roh-Na ai cita ampa'paan e Roh-Na makailek im baya-waya, akar sé icaenep an owak i Amang Kasuruan.

¹¹Ampa'paan e makailek sé an até é tou, wayake' si roh an owak i tou itu. Taniitu ka'i si Amang Kasuruan, e makailek sé an até i Amang Kasuruan, wayake' i Roh-Na in esa.

¹²Wo e roh ai cita ra'ica aiwéé ing kayo'baan anio', taan e Roh si asi Amang Kasuruan owo wosama' kakailekanta pakasa sé loor sé aitambér i Amang Kasuruan ai cita.

¹³Wo in taniitu, sa kami makua andumoro' sé ipakua i Roh Le'nas a sé tou sé pengaakinen i Roh i Amang Kasuruan, kami makua ra'ica mapaké i nunuwu' ing kapinteran in tou, taan mapaké i nunuwu' si aisusui i Roh i Amang Kasuruan.

¹⁴Si tou ra'- ica pengaakinen i Roh i Amang Kasuruan, ra'ica mengaterima sé ipakua i Roh i Amang Kasuruan, ampa'paan paanggapenna sé ipakua i Roh itu ra'ica wana torona. Wo en itu ra'ica kaangéanna, ampa'paan wayake' si tou makaanu i Roh i Amang Kasuruan e ro'na makaangé andumoro' in itu.

¹⁵Si tou makaanu i Roh i Amang Kasuruan, sia makawoo numilai in sapa-sapake', taan ra'ica wana mandé esake' tou e ro'na numilai sia.

¹⁶ Ang Kitap Le'nas aipatic in tana'i, “Si séi réén e makailek im pakawerot i Casuruan? Wo si séi réén e ro'na sumina'u Sia?” Taan kita sé maémano, em pakawerotta meputé wo im pakawerot i Kristus.