Read Tontemboan 1 Korintus 7 Bible Online

1 Korintus 7 - Tontemboan bible

1 Korintus 7

¹Poo-poowku, intarépé' aku rumoma' andumoro' sé winuéi iow a yaku an untep in surat si aicirim iow indior. Em binuéi iow tana'i, “Loor réén si esa tuama ra'ica kumawéng?” Sa iciit yaku en itu loor,

²taan ampa'paan sé tou taporak katawéran mengaéma' in cabul, aweso taré sé tuama makapenanaan esa wo sé wéwéné ka'i makapenanaan esa.

³Si tuama icumawéngo musti mengaéma' ing kewajipanna an ubungan éra tanu mempenanaan, taniitu ka'i si wéwéné icumawéngo sia musti méma' ing kewajipanna itu ang karapi i penanaanna.

⁴Si wéwéné awéano penanaan ra'io ka'i makakawasa an owakna in esa, taan si makakawasa an owakna itu si penanaanna. Taniitu ka'i wo si tuama icumawéngo, sia ra'io makakawasa an owakna in esa, taan si makakawasa an owakna itu si penanaanna.

⁵Sé mempenanaan, si esa wo si esa ra'ica toro kumélong méma' ing kewajipan itu, aluar en itu pineroma'o miow in dua, ampa'paan e mindo témpo ra'ica talos uré en sumombayang. Taan makasombayang ako, menonouo sumawel tanu mempenanaan, ampa'paan kamu ra'ica makatang méma' ing kasalé'an in owak iow. Wo in taniitu si kikiiten é sétang ra'ica makawoo tumawér icamu méma' ing kamesé-meséaan.

⁶Sé aicuaku anio' asalo sina'u ra'ica perénta.

⁷En ulitna lébé icasalé'ku woo pakasa en tou meputé wo yaku. Taan si Amang Kasuruan itumambéro mai ing kamang a sé tou esa wo si esa ra'ica pineputé, si esa winéanai sia'i, sé walina ka'i winéanai siitu.

⁸A sé tou sé ra'ipé' icumawéng wo a sé wéwéné sé imabaluo sina'uenku, aweso taré menonouo ra'io kumawéng, kaputéku ka'i.

⁹Taan sa séra ra'ica makawoo tumang ing kasalé'an in owak, aweso taré séra kumawéng. Ampa'paan lébé loor séra kumawéng wo taré ra'ica kumawéng taan en até éra pakakawasan ing kasalé'an in owak.

¹⁰ A sé tou sé icumawéngo si anioo em peréntaku. (En ulitna ra'ica yaku iméé im perénta itu taan si Apo' Yesus.) Em perénta-Na itu tana'i: si wéwéné awéano penanaan ra'ica toro metané wo si tuama penanaanna.

¹¹Taan sa si wéwéné itu metanéo, sia musti menonou ra'io makapenanaan kuma'pa sia meeluran sumawel ang karapi i penanaanna. Taniitu ka'i si tuama awéano penanaan, ra'- ica toro metané wo si penanaanna.

¹²A sé tou walina yaku (ra'ica si Apo' Yesus) kumua: Sa awéan tuama maéman a si Kristus wo makapenanaan sé ra'ica maéman a si Kristus, wo si penanaanna itu masalé' menonou mewali-wali wo isia, si tuama itu ra'ica toro metané wo si penanaanna.

¹³Taniitu ka'i sa awéan esa wéwéné maéman a si Kristus makapenanaan si ra'ica maéman a si Kristus, wo si penanaanna itu masalé' menonou mewali-wali wo isia, si wéwéné itu ra'ica toro metané wo si tuama penanaanna.

¹⁴Ampa'paan si tuama ra'ica maéman itu, sia patuso mamuali tou i Amang Kasuruan ampa'paan icumawéngo ang karapi i wéwéné si mamualio tou i Amang Kasuruan. Taniitu ka'i si wéwéné ra'ica maéman itu patuso mamuali tou i Amang Kasuruan ampa'paan kinawéngo i tuama si mamualio tou i Amang Kasuruan. Sa ra'ica taniitu sé toyaang éra tantu meputé wo sé toyaang ra'ica makatuus si Amang Kasuruan. Taan en ulitna sé toyaang éra ro'na mamuali tou i Amang Kasuruan.

¹⁵Taan sa si tuama kuma'pa wéwéné si ra'ica maéman itu masalé'o metané wo si penanaanna, iwayao mio' metané. Asi soal anio', si wéwéné kuma'pa si tuama maémano, ra'io wina'kes in janji ing kawéng esa wo sé walina. Kamu tinowa i Amang Kasuruan e menonou ang kaeluran.

¹⁶Éi kamu wéwéné-wéwéné maémano a si Kristus, ra'ipé' réén kailekan iow sapa e mamuali sa. Icamuo wona' e méma' sé penanaan iow ro'na lowiren. Taniitu ka'i kamu é tuama sé maémano a si Kristus, ra'ipé' réén kakailekan iow sapa e mamuali sa. Icamuo wona' e méma' sé penanaan iow ro'na lowiren.

¹⁷Aweso taré si esa wo si esa tou melur ing katouan in esa tanu si aitantuo i Amang Kasuruan ai sia, si katouanna maéman a si Kristus an tutuw tinowa i Amang Kasuruan. Si anioo em pasusuiku am pakasa in jamaat.

¹⁸En tuusna tana'i: Sa awéan tou sinunato wo sia towan i Amang Kasuruan e maéman a si Kristus, sia tioo rumaméji tumala in tuus sunat an owakna. Wo sa awéan tou sé ra'ipé' sinunat wo sia towan i Amang Kasuruan torona maéman a si Kristus, sia ra'io sangali mapasunat.

¹⁹Ampa'paan sinunat kuma'pa ra'ica sinunat sé rua itu ra'ica penting. Em penting sia makiit im perénta i Amang Kasuruan.

²⁰Aweso taré esa wo si esa tou menonou tanu sia menonou maéman a si Kristus an tutuw tinowa i Amang Kasuruan e maéman a si Kristus.

²¹Sa kamu ata an tutuw tinowa i Amang Kasuruan e maéman a si Kristus, en itu ra'ica sapa-sapa. Taan sa kamu makéré kaloasan e mamuali tou ra'ica pakakawasan é tou walina, pakén iow eng kaloasan itu mamuali tou ra'ica pakakawasan é tou walina.

²²Ampa'paan si esa ata si tinowao eng kumiit si Casuruan, mandé sia itu atapé' taan sia meputé wo si tou ra'ica pakakawasan é tou walina an dior i Casuruan. Taniitu ka'i si tou ra'ica pakakawasan é tou walina si tinowao i Kristus, sia itu meputéo ata i Kristus.

²³Kamu tinelesano i Amang Kasuruan wo em bééna winérano waya makaleke-lekep. Ampa'paano in itu, tioo kamu mamuali ata é tou walina.

²⁴Anaé, é poo-poow, tambisake' eng katouan iow an tutuw tinowa i Amang Kasuruan e maéman a si Kristus, menonou mangé tanu siitu an dior i Amang Kasuruan.

²⁵Intarépé' aku rumoma' andumoro' sé tou ra'ipé' icumawéng, mangala'un kuma'pa mangalitou. Andumoro' iséra itu, aku ra'- ica makéré perénta asi Casuruan owo. Taan aku si tou ro'na papercayan iow, ampa'paan si Casuruan tumuru'o ing kaupusan-Na a yaku, méé im bewerotku andumoro' iséra.

²⁶Pawerotenku tana'i: tuma'néi asi témpo ya'sa kelian kasusaan, lébé loor kamu ra'ica rumoba sapa-sapa asi katouan iow.

²⁷Sa awéan tuama icumawéngo, ra'ica toro sia rumaméji metané wo si penanaanna. Wo sa awéan tuama sé ra'ipé' icumawéng, sia ra'ica sangali rumaméji mangéré wéwéné ing kawéngen.

²⁸Taan sa si tuama masalé' kumawéng, en itu ra'ica meséa'. Taniitu ka'i, sa si mangala'un masalé' kumawéng, en itu ra'ica meséa'. Taan sé tou icumawéngo, mendam oka ing keli kawenduan ang katouanna. Si icasalé'ku woo wosama' kamu ra'ica mamendam ing kawenduan itu.

²⁹Poo-poow sé maéman, em paangé-angénku tana'i: Kita ra'io kelian en témpo! Anaé, tumo'tol intarépé' sé tuama makapenanaano, musti méma' tanuoka kéndo' ra'ica wana penanaan.

³⁰Wo sé tou maamé' tioo memero-merot andumoro' ing kawenduan. Wo sé tou maaru-arui tioo memero-merot ing kaaruian. Wo sé tou awéano en tinelesan tioo memero-merot andumoro' ing kasiyaanna.

³¹Sé tou asalo menguru-ngurus ing katouan éra asi cayo'baan anio', séra ra'ica toro kuma'pu in témpo e memero-merotke' andumoro' sé itu. Ampa'paan eng kayo'baan pakaento'anta anio' ra'io uré ka'i imaka'pu.

³²En icasalé'ku wosama' kamu ra'ica maindé-indé' murus ing katouan iow. Em paangé-angénku tana'i: Sé tuama ra'ica wana penanaan, memero-meroto mangé andumoro' si Casuruan wosama' sia maarui si Casuruan.

³³Taan sé tuama awéano penanaan, memero-meroto mangé andumoro' ing kayo'baan tumambisa sia marui si penanaanna.

³⁴Eng kasiwakanna em pakawerotna imaruao. Wo sé wéwéné si ra'ica wana penanaan wo sé mangala'un, memerot-meroto mangé andumoro' si Casuruan, wééo mangé en owak wo e mu'kur torona si Casuruan wosama' le'nas an dior-Na. Taan se wéwéné awéano penanaan memero-meroto mangé andumoro' ing kayo'baan, tumambisa sia marui si penanaanna.

³⁵Ipakuaku pakasa itu torona ing kalooran iow, ra'ica méro icamu méma' sapa en icasalé' miow. Taan icasalé'ku kamu méma' sé patus ai camu wosama' kamu ro'na kumiit si Casuruan ra'ica wana e makala-kala'.

³⁶Taan sa si esa tuama mentantuano kumawéng wo si esa wéwéné, wo weroten i tuama itu ra'ica loor sa ra'ica kawéngenna si patunanganna itu, ampa'paan si wéwéné patunanganna itu ka'i makamatu'ao, wo sa si tuama itu masalé' awéan penanaan, aweso taré séra kumawéng. En itu ra'ica kamesé-meséaan.

³⁷Taan sa awéan esa tuama makawoo tumang ing kasalé'an in owak, wo musé'o e ra'ica kumawéng wo si patunanganna, wo em pinusé'na itu ra'ica pinelesé' taan wutu-wutul an até owo, e niéma'na itu loor.

³⁸Anaé, si tou icumawéng wo si patunanganna iméma'o in loor, wo si tou ra'ica icumawéng wo si patunanganna, iméma'o sé lébé loor.

³⁹Si wéwéné kinawéngo ra'ica toro kawéngen é tuama walina, ang kauré si penanaanna menonoué'. Sa si penanaanna imatéo, sia ro'nao kumawéng ang karapi i tuama si icasalé'na si esa paémanen a si Kristus.

⁴⁰Taan iciit im pakawerotku in esa, sia lébé arui sa sia ka'i ra'ica kawéngen. Wo pendamenku e Roh i Amang Kasuruan maakin yaku an tutuwku makua sé itu.