Read Tontemboan 1 Korintus 9 Bible Online

1 Korintus 9 - Tontemboan bible

1 Korintus 9

¹Poo-poow, yaku anio' tou ra'ica pakakawasaan é tou walina. Yaku ruru'du'an i Yesus, ampa'paan aku isuméréo in owak i Yesus Apo'ta, wo ka'i ampa'paan icamu ituo em buéna im pinatawoiku torona i Casuruan.

²Mandé ka'i sé tou walina ra'ica mangaku sa aku ruru'du'an i Yesus, taan pengaakun iow aku anio' ruru'du'an-Na. Ampa'paan kamu maémano a si Apo' Yesus, mamualio tuus sapaoka aku anio' ruru'du'an-Na.

³Sa awéan tou rumoros yaku, tana'i en cuaku e méla in owakku ai séra:

⁴Ra'ica réén wana hak aku wo si Barnabas, e makéré kakanen wo elepen asi wuéna in tawoien ami?

⁵Ra'ica réén wana hak kami e makawali si penanaan ami esa paémanen eng kumiit ang karapi ami mangé sumelewir, kaputé im pinengaéma' é tuari i Apo' Yesus, wo sé ruru'du'an walina icauntep si Petrus?

⁶Kuma'pa wayake' réén yaku wo si Barnabas e musti mangéré sé paperlun ami susur in endo?

⁷Ra'ica wana suraro mangé merang wo sia in esa e mongkos im paperlunna. Wo ra'ica wana tou menganguma musew in anggor an umana wo ra'ica maarap kuman im bua'na in umana. Wo ra'ica wana tou sé matéir sé domba wo ra'ica maarap melep in susu é domba patéiranna itu.

⁸Sé aicuaku itu, ra'ica asalo kumiit im pakawerot é tou, taan aisusui ang Kitap Le'nas ka'i tanu siitu.

⁹ Ang Kitap Torat i Musa aipatic in tana'i, “Si sapi ang karoro'an i meléa-léak ing gandum an tangona, ra'ica toro wa'kesen en semurna wosama' si sapi itu ro'na kuman.” Sa réén taniitu, si sapi réén em pawéan rékén i Amang Kasuruan?

¹⁰Kuma'pa sé aipatic itu torona ka'i cita? Wutul si aipatic itu toronata. Ampa'paan eng kaangéanna sé aipatic itu tana'i: si tou mapajéko in uma wo si tou mapisi ing gandum an tangona, séra patus maarap makéré laasa asi tawoienna itu.

¹¹ An tutuw ami makua in Abar Kaaruien ai camu, en itu meputé wo icami imusewo in lulumbo im paémanen an até miow. Sa taniitu, ra'ica réén toro kami maarap ai camu wosama' sapa sé paperlun ami ang katouan susur in endo ro'na wéan iow?

¹²Sa sé tou walina masusui in Taar i Casuruan ai camu wo séra awéan hak e makéré sé paperlun éra susur in endo ai camu, tantu icamipé' en lébé awéan hak wo iséra. Taan ra'ica kiim ami maké in hak itu. Aweso taré tanggongen ami in esa eng kawenduan ami, wosama' kami ra'ica sumémpér sé tou en tumerima in Abar Kaaruien andumoro' i Yesus Kristus.

¹³ Tantu kailekano miow, sa sé tou maselewir am Balé Le'nas, séra makéré im paperlun ang katouan éra susur in endo am Balé Le'nas itu. Wo sé tou maselewir am pawetaan i raragés, séra ka'i makéré im bagéan in sama'na i binatang si airagés itu.

¹⁴ Taniitu ka'i wo sé tou makua in Abar Kaaruien andumoro' i Yesus Kristus, séra aitantuo mai i Casuruan e musti makéré ing kaperluan éra susur in endo asé tou sé mengalinga in Abar Kaaruien itu.

¹⁵Taan ra'ipé' sumangkum ako aku maké mandé esake' asé hak itu. Wo em pakasa en anio' aipaticku ra'ica ampa'paan i mangile-ngilek in hakku. Aweso taré aku maté, wo taré katalaan ing katirayoanku. Ampa'paan mamuali esa rarayo a yaku, sa aku makua in Abar Kaaruien andumoro' i Yesus Kristus ra'ica mangile-ngilek ai camu.

¹⁶Sa aku makua in Abar Kaaruien i Amang Kasuruan, yaku ra'ica toro marayo in owak. En itu musti tawoienku, ampa'paan aku airu'du' i Amang Kasuruan. Icawangkur aku sa ra'ica ipakuaku en Abar Kaaruien andumoro' i Yesus Kristus itu.

¹⁷Wo sa émaanku en tawoien makua in Abar Kaaruien andumoro' i Yesus Kristus asalo ampa'paan ing kasalé'anku in esa, yaku patus makéré laasa. Taan aku makua in Abar Kaaruien itu ampa'paan en itu musti émaan. Si Amang Kasuruan e méé in tawoien en émaanku.

¹⁸Anaé, sa taniitu sapa en laasa kéréanku? En laasa kéréanku anio': yaku makawoo kumua in Abar Kaaruien andumoro' i Yesus Kristus wo ra'ica wana e méé laasa, wo aku ra'ica maké in hakku e mangilek in laasa e mengakua in Abar Kaaruien itu.

¹⁹Mandé ka'i aku ra'ica ata asi séike', taan niéma'kuo en owakku ata é pakasa in tou. Niéma'ku en itu, wosama' ro'na akinenku lébé keli en tou mai a si Kristus.

²⁰Sa ang karapi é tou Yahudi, émaanku eng katouanku tanuoka kéndo' ing katouan é tou Yahudi, wosama' aku ro'na makin sé tou Yahudi a si Kristus. Wo sa ang karapi é tou Yahudi sé keter maéma' in ukum Torat, émaanku eng katouanku meputé wo iséra makiit wutul in ukum Torat. Mandé en ulitna aku ra'ica wina'kes in ukum Torat. Niéma'ku tanu siitu, wosama' aku ro'na makin séra a si Kristus.

²¹Taniitu ka'i, an tutuwku mewali-wali wo sé tou ra'ica Yahudi, sé ra'ica makiit in ukum Torat, émaanku eng katouanku meputé wo iséra. Émaanku taniitu wosama' ro'na akinenku sé tou ra'ica Yahudi a si Kristus. Anaé, aku ra'ica toro ipeputé tanu tou sé ra'ica makiit im perénta-perénta i Amang Kasuruan, taan aku uli-ulit maéma' im perénta i Kristus.

²²An tutuwku an uner é tou ra'ipé' keter em paémanen, émaanku ka'i en owakku meputé wo iséra, wosama' aku ro'na maakin iséra a si Kristus. Niéma'kuo en owakku meputé wo sé pakasa in tou sé paselewiranku wo lalan sapake' mangé en itu, émaanku, en lumowir piraan tou ai séra.

²³Niéma'ku en owakku tanu siitu wosama' mengeli-ngeli sé tou maéman in Abar Kaaruien andumoro' i Kristus. Asi Abar Kaaruien ituo aku ro'na makéré ing kamang asi Casuruan mewali-wali wo sé tou walina.

²⁴Tantu kailekano miow sapaoka am papekowaan pakasa in tou sé cumiit tuméron, wayake' in esa e makéré laasa. Taniitu ka'i kamu. Tumérono tanu siitu akar kéréan iow en laasa.

²⁵Susur in tou sé kumiit mekowa' musti tumang in owak am baya-waya. Sia méma' tanu siitu ampa'paan sia masalé' makéré mahkota si rior maweles. Taan kita anio' talesen matang in owak am baya-waya ampa'paan kita masalé' makéré mahkota si ra'ica maweles akar ing kauré-uré.

²⁶Ampa'paan in ituo aku tuméron angé a si esa angé- an si wutul. Yaku tanuoka si petinju si ra'ica asalo karuki-ruki.

²⁷Pelati-latinku wo kawasanku pakasa en owakku eng kumiit ing kasalé'an i Casuruan. Yaku méma' tanu siitu, wosama' aku ra'ica kaputé wo sé tou aicélong i Amang Kasuruan, taan aku makéré laasa kumawusai aku makua in Abar Kaaruien andumoro' i Yesus Kristus a sé tou.