Read Tontemboan 2 Korintus 13 Bible Online

2 Korintus 13 - Tontemboan bible

2 Korintus 13

¹ Asi kumatelu anio' woo aku masalé' maai ai camu. Ang Kitap Le'nas aipatic, “Susur in awéan perkara musti awéan kasairian é rua kuma'pa telu tou, wo em perkara itu uli-ulit ro'na percayan.”

²Asi keaiku kumarua, isumangkumo ta'néiku a sé tou sé iméma'o ing kamesé-meséaan wo ka'i a sé tou walina wosama' mentoo mio' mengéma-ngéma' ing kameséaan. Wo intarépé', ang karoro'an aku mentayangan wo icamu, ta'néiku sumawel sapaoka sa aku maai sa, repetanku oka en tumindak sé pakasa in tou sé mengéma-ngéma'pé' ing kamesé-meséaan.

³Yaku oka en tumuru' in tuus sé icasalé' miow sapaoka aku airu'du' i Kristus e rumoma' ai camu. Sa romaan-Na kamu romaan-Na oka ra'ica in lemé', taan turu'-Na eng kawasa-Na an uner iow.

⁴Wutul an tutuw i Kristus aisalip, Sia lembi, taan Sia menonou ampa'paano ing kawasa i Amang Kasuruan. Kami ka'i ra'ica keter tanu si Kristus, taan kami ka'i menonou tanu si Kristus ampa'paano ing kawasa i Amang Kasuruan. Anaé, tindaken oka ami ang karapi ing kawasa i Amang Kasuruan torona ing kalooran iow.

⁵Ujin owo sumama-sama' en owak iow sapaoka kamu wutu-wutul menonou maéman a si Kristus kuma'pa ra'ica! Ujino sumama-sama'. Ra'ica réén parcayan iow sapaoka si Kristus Yesus menonou an untep in owak iow? Sa ra'ica taniitu, kamu ra'ica talesen im paujin.

⁶Paarapenku kakailekan oka miow sapaoka kami talesen im paujin tanu ruru'du'an i Kristus.

⁷Isombayang ami a si Amang Kasuruan wosama' kamu ra'io mengaéma' ing kaséaan. Isombayang ami tanu siitu, ampa'paan icasalé' ami kamu méma' sé loor. Ra'ica ampa'paan icasalé' ami en tumuru' sapaoka kami talesen im paujin tanu ruru'du'an i Kristus. Ra'ica sapa-sapa sa kami paweroten tanu tou si ra'ica talesen im paujin.

⁸Ampa'paan kami ra'ica toro mengaéma' sé mensunduran wo in sususuien wutul i Casuruan. Si ro'na émaan ami asalo makiit in sususuien wutul itu.

⁹Arui kami sa kamu keter, mandé ka'i kami ra'ica keter. Isombayang ami wosama' kamu maréng sumawel menonou wutul.

¹⁰Ampa'paan in ituo aipaticku en surat anio' an tutuw aku ra'ipé' an uner iow. Wo in taniitu sa aku maai sa, ra'io sangali repetanku en tumindak icamu ang karapi imaké ing kawasa aiwéé i Amang Kasuruan a yaku. Eng kawasa itu aiwéé a yaku e méé ing kaincayaan am paémanen iow, ra'ica in tumeri.

¹¹Anaé é poo-poow, maaru-aruio mangé, wutuleno em peri miow si suméa'. Terimano mangé pakasa en sina'uku! Meesao mangé en até wo em bewerot iow wo menonouo mangé ang kaeluran. Si Amang Kasuruan, pelemboian in upus wo ing kaeluran, mewali-wali oka wo icamu!

¹²Membém-béano mangé in siri' si esa wo sé walina ang karapi wuta in upus[2] tanu poow sé maéman a si Kristus. Pakasa in tou le'nas am bia'i icumirimai in siri' ai camu.

¹³En upus aitambér i Apo' Yesus Kristus wo en upus i Amang Kasuruan wo em paesaan i Roh Le'nas mewali-wali wo icamu im baya.