Read Tontemboan 2 Korintus 2 Bible Online

2 Korintus 2 - Tontemboan bible

2 Korintus 2

¹Anaé, pinusé'kuo an até, yaku ra'io maréng angé ai camu sa asalo iméma' in até miow mawendu.

²Sa en até miow émaanku mawendu, ra'io wana ka'i e ro'na mibor in atéku. Ampa'paan icamuo e musti mibor yaku, taan en até miow niéma'kuo mawendu ampa'paan rinomaanku.

³An tutuw aku matic in suratku indior, kamu rinomaanku. Wo in taniitu sa aku maai sumawel ai camu ang Korintus, yaku ra'ica mawendu. Icamuo e musti maarui yaku. Ampa'paan percayanku sapaoka sa aku arui kamu ka'i arui.

⁴An tutuwku imatic in surat indior ai camu, yaku uli-ulit ra'ica makaaté in sama' wo mawendu wo makakeli-keli mengamé-ngamé'. An tutuw itu ra'ica kiimku méma' icamu mawendu ampa'paan in surat itu, taan en icasalé'ku wosama' kailekan iow, yaku uli-ulit mengaupus icamu.

⁵Intarépé' icasalé'ku numuwu' andumoro si tou mengaéma' im bendu. Niéma'na em bendu itu ra'ica a yaku taan ai camu im baya kuma'pa a sé piraanke' ai camu. Icuaku ‘piraan ai camu’ am bia'i wosama' e nunuwu'ku ra'ica talos uter ai sia.

⁶Kinelian ai camu imukumo sia wo en ukuman itu ro'nao ai sia.

⁷Anaé, intarépé' wéano mio' sia kaampungan wo kaincayaan, wosama' sia ra'ica talos mawendu wo ra'ica katalaan in arapan.

⁸Anaé, pekiupusenku ai camu, ituru'o mangé ai sia sapaoka kamu uli-ulit mengaupus sia.

⁹Indior aipaticku en surat ai camu e muji sa kamu wutu-wutul mengakiit sé aituru'kuo.

¹⁰Sa ampungan iow si tou iméma'o ing kaséaan ai camu, ampunganku ka'i si tou itu. Ampa'paan sapa sé niampungankuo, sa wutul awéan em perlu ampungan, en itu ampunganku an dior i Kristus torona ing kalooran iow.

¹¹Émaanku en itu wosama' si kikiiten é sétang ra'ica wana témpo loor muwak icita, ampa'paan kailekanta em pawasa-wasanna léwo'.

¹² An tutuwku icateka'o mangé an Troas eng kumua in Abar Kaaruien andumoro' i Yesus Kristus, kinaséréankuo sapaoka si Amang Kasuruan imuka'o in lalan a yaku en sumelewir am bitu.

¹³Taan aku ra'ica makaaté in sama', ampa'paan a mangé mbitu aku ra'ica meta'up wo si poowta Titus. Anaé, aku mapermisi a sé tou asi tampa itu wo mangé a Makedonia.

¹⁴Taan makapulu'sama' a si Amang Kasuruan. Sia maaki- akin icami akar imuntung ampa'paan i Kristus. Pakén i Amang Kasuruan icami wosama' sé tou am bisa-wisa makatuus si Kristus. Anaé, em paselewir ami tanu im bou manam si pengakawouan am bisa-wisa.

¹⁵Ampa'paan an dior i Amang Kasuruan icami tanu im bouna ing kamenyan mawou manam asi Kristus owo an uner é tou ang karoro'an makiit in lalan kalowiran wo an uner é tou ang karoro'an makiit in lalan papaté.

¹⁶Sa tou sé ra'ica tumerima in Abar Kaaruien andumoro' i Yesus Kristus wo maangé am papaté, icami anio' tanuoka wou im buruk. Taan sa tou sé tumerima in Abar Kaaruien itu wo lowiren, kami tanuoka im bou manam si makawali ing katouan. Anaé, si séi e ro'na méma' in tawoien anio'?

¹⁷Kami ra'ica meputé wo sé kinakelian tou sé mengakua in abar i Amang Kasuruan e mangéré ing kauntungan in esa. Em paangé-angén ami lekep en até, ampa'paan si Amang Kasuruan e rumu'du' icami. Wo si Amang Kasuruan in esa en suméré sapaoka icami makua in abar itu tanu ata-ata i Kristus.