Read Tontemboan 2 Korintus 3 Bible Online

2 Korintus 3 - Tontemboan bible

2 Korintus 3

¹Paweroten iow réén kami marayo in owak ami ka'i? Ra'ica taniitu em paémaan ami. Awéan piraan tou maperlu in surat kaloasan e mangé ituru' ai camu, kuma'pa surat aipatic iow paalin angé an tampa walina. Taan icami ra'ica maperlu sé surat tanu siitu.

²Icamuo in esa en surat kaloasan ami sé ipatic an untep in até ami wo sé ro'na kakailekan wo kabacaan é pakasa in tou.

³ Séra in esa oka en suméré sapaoka icamu tanu surat i Kristus si a itoké paalin ami. Wo en surat itu ra'ica aipatic in tinta, taan ang karapi i Roh i Amang Kasuruan si menonou; ra'ica ka'i am bawo im batu papatican taan an untep in até é tou.

⁴Icua ami en andumoro' in owak ami tanu siitu ampa'paan icami maéman a si Amang Kasuruan wo em pakasa in itu mamuali ampa'paan i Kristus.

⁵Kami ra'ica wana alasan eng kumua sapaoka kawooan ami méma' in tawoien anio', taan si Amang Kasuruan i méé mai icami makawoo.

⁶ Siao e méma' icami makawoo imamuali maselewir sé makua in esa perjanjian weru a sé tou. Em perjanjian itu ra'ica an ukum sé aipatico indior, taan asi Roh i Amang Kasuruan owo. Ampa'paan en ukum aipatic itu sa ra'ica kiiten, makawali am papaté, taan e Roh i Amang Kasuruan mawéé ing katouan.

⁷ An tutuw em perjanjian uré si makawali am papaté itu aipatic am batu maké im pupulat, en sendot i Amang Kasuruan menéla-nélang an amo i Musa. En télangna itu masendot keli wo kala'meren oka mai akar sé tou Israel ra'ica makawoo suméré in amo i Musa, mandé ka'i en sendot an amona itu meka'pu-ka'puo en télangna. Anaé, sa en perjanjian uré si makawali am papaté itu nisahkan ang karapi in sendot tuméla-télang an amo i Musa,

⁸wopé' taré en perjanjian weru si aiwéé i Roh i Amang Kasuruan, tantu nisahkan ka'i ang karapi in sendot si lumébé mai en télang asi télang an amo i Musa.

⁹Sa en perjanjian uré imukum sé tou itu taniitu eng kasendotna, tantu eng kasendot im perjanjian weru lébé sendotai si méma' sé tou mamuali wutul an dior i Amang Kasuruan.

¹⁰Ro'na icuata sapaoka eng kasendotan indior, ra'io talos sendot ampa'paan ing kasendotan intarépé'.

¹¹Wo sé itumang itu asalo ang karoro'anke' imasendot, taan sé akar ing kauré-uré tantu ulit-ulit lébé sendot.

¹²Ampa'paan kami makaanu in arapan tanu siitu, kami ra'ica maindé' en tumindak.

¹³ Icami ra'ica tanu si Musa, si makatutuw ing kaéng an amona wosama' sé tou Israel ra'ica suméré in sendot si mape'delo itu.

¹⁴Indior sé tou Israel, em pakawerot éra kinatutuwano. Wo akar asi endo anio' em pakawerot éra kinatutuwané', ra'ica kaangéan éra sa maca ing kitap-kitap andumoro' im taar uré itu. Icita ro'na kumua sapaoka em bewerot éra pakatutuwané' ing kaéng. Eng kaéng itu ro'na imawuka' an tutuw éra maéman a si Kristus.

¹⁵Tantu ka'i akar intarépé', sa séra maca ing kitap- kitap si aipatic i Musa, awéan en tumutuw in até éra akar ra'ica kaangéan éra sapa sé binaca itu. En itu meputé wo ing kaéng itumutuw in amo éra.

¹⁶Taan sa awéan sé mai an dior i Casuruan, tantu em bewerot éra si kinatutuwan itu imawuka. En itu meputé wo ing kaéng icaangkai an amo éra.

¹⁷Si Casuruan ituo e Roh. Wo am bisa en awéan Roh i Casuruan, am bitu ka'i awéan kaloasan.

¹⁸Intarépé' en amota im baya ra'io pakatutuwan ing kaéng wo icita masendot in télang i Casuruan. Wo ampa'paano in itu icita peroba-roban mamuali tanu Sia, menguré-uré icita makatélango. Eng katélang itu asi Casuruan owo, Siao e Roh.