Read Tontemboan Galatia 1 Bible Online

Galatia 1 - Tontemboan bible

Galatia 1

¹En surat anio' a yaku owo Paulus. Yaku mamuali ruru'du'an, ra'ica airu'du' é tou wo ra'ica ka'i niangkai i esa tou. Taan aku mamuali ruru'du'an ampa'paan i Yesus Kristus wo si Amang Kasuruan, Amangta, si tumou sumawel si Yesus an uner é tou imaté.

²Aicirimku en surat anio' a sé jamaat ang Galatia. Yaku wo pakasa sé poo-poow maéman am bia'i ka'i méé in siri' ai camu.

³Pekiupusenku a si Amang Kasuruan Amangta wo a si Apo' Yesus Kristus wosama' Sia méé mai in upus aitambér[1] wo eng kaeluran ang katouan iow.

⁴Kumiit ing kasalé'an i Amang Kasuruan Amangta, si Yesus si sumarakano in owak-Na en tumu'bus ing kamesé-meséaanta wosama' kita icawekar asi kaléwo'an si awéan ang kayo'baan intarépé'.

⁵Si Amang Kasuruanke' si parayo-rayo wo si pasiri-siriin akar ing kauré-uré! Ulit.

⁶Yaku mangaya'ka' keli ampa'paan kamu taloso rior tumela'u si Amang Kasuruan kekawus iow maéman a si Kristus. En ulitna kamu tinowa i Amang Kasuruan wosama' kamu makéré ing katouan akar ing kauré-uré, si aitambér i Kristus. Taan kamu icumiitke' in sususuien asi abar walina.

⁷En ulitna ra'ica wana lalan walina e makéré ing kalowiran. Taan kamu tinawéro é tou sé mengalicoko icamu ang karapi in sususuien andumoro' in abar sé mengasélé'kow. Em peangé-angén éra en sumali'si' in Abar Kaaruien andumoro' i Yesus Kristus si pakua ami.

⁸Sa woo awéan tou an uner ami kuma'pa esa malaékat ang sorga owo, sé mengakua ai camu andumoro' in abar walina si ra'ica puté wo in Abar Kaaruien sé aicuao ami ai camu, sia kutuken in ukuman si mute-uter.

⁹Kaputé sé aicuao ami indior, intarépé' waréngenku sumawel ing kumua ai camu: Kutuken in ukuman si mute-uter sa awéan tou mengakua ai camu andumoro' in sususuien walina si ra'ica puté wo in Abar Kaaruien, si tinerimao miow ai cami.

¹⁰Tioo mengawerot sa aku rumaméji marui in até é tou. Yaku rumaméji marui in até i Amang Kasuruan. Sa aku asaloke' rumaméji marui in até é tou, yaku anio' ra'ica ata i Kristus.

¹¹Poo-poow, si casalé'ku kailekan iow sapaoka en Abar Kaaruien andumoro' i Yesus Kristus si ipakuaku itu ra'ica asé tou owo.

¹²Ampa'paan en Abar Kaaruien itu ra'ica tinerimaku asé tou, wo ka'i ra'ica wana tou en sumusui in Abar Kaaruien a yaku. Taan si Yesus Kristus in esa en cumua in Abar Kaaruien itu a yaku.

¹³ Liningao miow en andumoro' ing katouanku indior si mengakiit in agama é Yahudi. Yaku wutu-wutul mengaokoi sé jamaat i Amang Kasuruan wo rumaméji maté iséra im baya.

¹⁴ Tanu tou si mengakiit in agama é Yahudi yaku en lébé incaya' miara ing kanaramen é apo-apo'ku, sa ipeputé wo sé kinakelian asé tou Yahudi sé merengan wo yaku.

¹⁵ Taan si Amang Kasuruan sumisiro yaku tumo'tolai aku an untepé' im poot i inangku wo tumowa yaku e mamuali ruru'du'an-Na ampa'paano in upus aitambér-Na.

¹⁶Wo ituru'-Na si Toyaang-Na a yaku, wosama' ipakua-kuaku en andumoro' i Toyaang-Na an uner é tou ra'ica Yahudi. Wo aku ra'ica mangilek sina'u asi séike' mangé mandé esake' nuwu' andumoro' in taar si tinerimaku itu.

¹⁷Yaku ka'i ra'ica mangé an Yerusalem e meta'- up wo sé tou en diorai mamuali ruru'du'an wo yaku. Taan aku mangéke' an tana' Arab, wo am bitu oka aku maréng sumawel ka'i an Damsyik.

¹⁸ Kekawus in telu ngata'un, aku mangé an Yerusalem e meta'- up wo si Kefas,[2] wo aku mento' am baléna sangapulu' lima ngando eng kauré.

¹⁹Taan ra'ica ipeta'upku sé ruru'du'an walina, yaku asalo meta'up wo si Yakobus, poow i Apo' Yesus.

²⁰Sapa sé aipaticku ai camu anio' wutul, wo kailekan i Amang Kasuruan aku ra'ica matowo.

²¹Kekawusku tumela'u in Yerusalem yaku mangé an Siria wo ang Kilikia.

²²Akar asi témpo itu sé jamaat maéman a si Kristus an Yudea ra'ipé' kawisa isuméré ing gioku.

²³Séra asalo luminga i nunuwu' é tou andumoro' yaku in tana'i, “Indior si tou itu mengaokoi cami, taan intarépé' sia e mengakua a sé tou en andumoro' im paémanen a si Kristus, si indior em paémanen itu icasalé'na ing ka'pun.”

²⁴Ampa'paan sapa e niéma' i Amang Kasuruan a yaku, séra rumayo wo sumiri' Sia.