Read Tontemboan Galatia 5 Bible Online

Galatia 5 - Tontemboan bible

Galatia 5

¹Si Kristus iméma'o icita ra'io ka'i ang kakawasaan in ukum Torat, wosama' kita ra'io pakawa'kesen in ukum Torat. Ampa'paano in itu timboieno sumama-sama' eng kaloasan itu, wo tioo maréng menonou tanuoka ata si pakawa'kesen in ukum Torat.

²Wéan rékén sumama-sama'! Yaku Paulus kumua in tana'i ai camu: Sa kamu méé in owak en sunaten wosama' nianggap wutul an dior i Amang Kasuruan, sapa si niéma' i Kristus ai camu ra'ica wana en torona.

³Ita'néiku ka'i sumawel, si tou iméé in owakna in sunaten wosama' nianggap wutul an dior-Na, musti émaanna waya en atoran in ukum Torat.

⁴Sa kamu rumaméji nianggap-Na wutul ampa'paan mengaéma' in ukum Torat, kamu aicatanéo wo si Kristus. Wo in taniitu icélong iow en upus aitambér i Amang Kasuruan.

⁵Taan kita maarap nianggap-Na wutul ampa'paan ing kawasa i Roh Le'nas wo ampa'paan im paémanenta a si Kristus.

⁶Ampa'paan torona é tou sé meesao wo si Kristus Yesus, sia sinunat kuma'pa ra'ica sinunat en itu ra'ica penting. Em penting am bia'i em paémanen si aituru' ang karapi in upus a sé tou walina.

⁷Indior kamu le'tek makiit in sususuien wutul in andumoro' i Kristus. Taan intarépé' si séi réén sé makala-kala' icamu akar ra'io ka'i makiit in sususuien wutul?

⁸Ra'ica si Amang Kasuruan si lumepéi camu in da'ica kumiit in sususuien wutul, ampa'paan Siao en tumowa icamu eng kumiit si Kristus.

⁹ En sususuien mengasélé'kow ayandé tanu i ragi. E ragi mandé sangatekicke' ro'na méma' pakasa in adonan roti ruméis.

¹⁰Taan ampa'paan i Apo' Yesus percayanku kamu ra'ica kumiit im pakawerot é tou walina taan makiitke' im pakawerotku. Wo si seike' si tou en lumicoko i ngaas iow, tanggongenna oka en ukuman i Amang Kasuruan.

¹¹Poo-poow, awéan sé tou makua sapaoka aku masusuié' andumoro' in sunat a sé tou ra'ica Yahudi wosama' séra musti sunaten iciit in ukum Torat. Taan em pakua éra itu ra'ica wutul. Sa em pasusuiku tanu siitu, yaku ra'ica okoien é tou Yahudi. Wo sa aku masusuié' andumoro' in sunat, ra'ica iméma' sé tou Yahudi mae'bow mandé ka'i aku masusui andumoro' ing kepaté i Yesus ang kayu salip.

¹²Sé tou mengalicoko icamu ampa'paan in sunat, iwayao mio' séra mokol im penonowan in anu éra in esa.

¹³Poo-poow, kamu tinowao i Amang Kasuruan mamuali tou sé ra'io ka'i pakakawasan in ukum Torat. Taan tioo pakén iow eng kaloasan itu imamuali alasan i menonou ang kamesé-meséaan. Taan aweso taré kamu si esa wo sé walina mensen-selewirano mangé ang karapi in upus.

¹⁴ Ampa'paan pakasa sé an atoran in ukum Torat linekepo asi esa perénta anio': “Icaupuso mangé sé kakélému tou, kaputé ico mengaupus in owakmu in esa!”

¹⁵Taan kamu ra'ica toro tanuoka sé binatang mengkang-karétan wo menlo'-lo'motan. Mareti-retio wosama' kamu ra'ica mempatéan.

¹⁶Si anioo em peangé-angénku: Kamu musti menonou kumiit ing kasalé'an i Roh Le'nas. Wo in taniitu kamu ra'ica menonou oka kumiit ing kasalé'an in owakmu in esa.

¹⁷ Ampa'paan eng kasalé'an léwo' an owak tatapke' mensunduran wo ing kasalé'an i Roh Le'nas. Wo eng kasalé'an i Roh Le'nas mensunduran wo ing kasalé'an léwo' an owak. Sé rua itu mensali'si'anke', akar ra'ica kaémaan iow in andumoro' sé loor sé wutu-wutul icasalé' miow émaan.

¹⁸Taan sa iwaya miow e Roh Le'nas merénta in owak iow, kamu ra'ica menonou pakaakinen in ukum Torat.

¹⁹Sé tou makiit ing kasalé'an in owak kaséréan asé im paémaan éra, tanu mai: mengabersina, mengaéma' sé karican, mengaéma' ing kasalé'an in owak sé ra'ica wutul,

²⁰mengaapo' a sé opo-opo', mengasihir, mengkaséké'an, meindo-indoan roma', menganganat, mengkae'bowan, mengawerotke' in owakna in esa, mengaéma' im petanéan, mengaéma' sé tou mentan-tanéan,

²¹kokanat, malangu-langu, wo pésta ing kuman wo mengele-ngelep sé pakalangun wo pakasa sé léwo'. Andumoro' in itu aicuakuo indior, wo intarépé' ita'néiku sumawel: Sé tou menonou tanu siitu ra'ica makéré im bagéan ang Kakolanoan i Amang Kasuruan.

²²Taan sé tou pakaakinen i Roh Le'nas, wuéna ing katouanna tanu sé anio': awéan upus, kaaruian, kaeluran, katalesenan, kasamaan in até, kalooran, kale'tekkan,

²³ko'kos en até, kumawasa in owak. Ra'ica wana ukum e ro'na sumundur sé tou mengaéma' pakasa in itu.

²⁴Si séike' sia si mamualio tou i Kristus Yesus, pinaténao em peri-perina sé ra'ica loor wo pakasa ing kasalé'an in owakna ang kayu salip.

²⁵Kita menonou ampa'paano i Roh Le'nas, anaé mayoo kita menonou pakaakinen-Na.

²⁶Wo tioo mengatirayo, tioo mengaéma' sé tou walina mae'bow, wo tioo kokanat si esa wo sé walina.