Read Tontemboan Efesus 6 Bible Online

Efesus 6 - Tontemboan bible

Efesus 6

¹ Éi toya-toyaang, kiitenno mangé em perénta é matu'a miow ampa'paan kamu maémano a si Casuruan. Siituo em butul sé patus pengaémaan iow.

² Ta'néienno mangé em perénta i Casuruan anio', “Siriino mangé si amang wo si inang iow.” Si anioo em perénta penting i Amang Kasuruan si parapitan in janji-Na.

³Wo si anioo en janji-Na itu: Sa siriin iow si amang wo si inang iow, “Kamu kamangen oka wo en umur iow ang kayo'baan anio' awesan oka.”

⁴ Éi amang-amang, tioo pengaémaan sé toyaang iow mae'bow, aweso taré susuian iow angé séra wo sina'uen iow kumiit in sususuien i Casuruan.

⁵ Éi ata-ata, kiitenno mangé em perénta i tuang iow ang kayo'baan anio'. Selewiran angé si tuang iow ang karapi in siri' wo maindé' mangé ang karapi in lekep en até, kaputé kamu mengaselewir a si Kristus.

⁶Kiitenno mangé si tuang iow itu tioo asalo an dior éra e mengaarui in até éra. Taan selewirano mangé sé tuang iow tanu ata i Kristus si mengaéma' ing kasalé'an i Amang Kasuruan ang karapi in lekep en até.

⁷Émaano mangé en tawoien iow itu ang karapi in arui en até kaputé kamu mengaselewir a si Casuruan, ra'ica mengaselewir sé tou.

⁸Ampa'paan kailekano miow sapaoka sé tou mengaéma' ing kalooran, mandé ka'i sia ata kuma'pa tou ra'ica pakakawasan é tou walina, tantu makéré oka in susuli' asi Casuruan.

⁹ Éi tuang-tuang, kamu musti ka'i sama' a sé ata miow. Tioo pengaetengan iow séra akar séra maindé' ai camu. Ta'néieno mangé sapaoka kamu wo sé ata miow puté-puté makaanu esa tuang, Siao si Casuruan si an sorga, Sia ra'ica mengasisir in tou.

¹⁰Kumusi' in surat anio', kamu musti keter maké ing kaketeran si kinéréan iow asi Amang Kasuruan owo, ampa'paan kamu imeesa ang karapi-Na.

¹¹Pakéno mangé waya em pakakas ipaperang si aiwéé i Casuruan ai camu, wosama' kawooan iow sumundur im pakauwak i kikiiten é sétang.

¹²Ampa'paan kita merang ra'ica sumundur sé tou, taan en sundurenta itu sé maperénta, wo sé makakawasa wo sé kawasa ing kayo'baan si riréimbeng anio' wo sé roh léwo' an langit.

¹³Ampa'paan in itu, pakéno mangé waya em pakakas im paperang asi Amang Kasuruan owo, wosama' kawooan iow en sumundur asi endo léwo' itu wo kamu kasake' keter kekawus iow merang.

¹⁴ Anaé, kumete-ketero mangé makatulung tanu suraro sé tu'tulo i merang. Wo pakéno mangé en sususuien wutul tanu mapaké im pawe'ber am pinggangmu wo ra'ica marapit tanu mapaké ing karai bési ipari'dir in owakmu.

¹⁵ Wo tu'tulo e mangé kumua in Abar Kaaruien andumoro' i Yesus Kristus si mengaali ing kaeluran tanu in sapatu miow.

¹⁶Andumoro' in sapake' pakéno mangé em paémanen iow a si Amang Kasuruan tanu ipari'dir in owak, ampa'paan ang karapi im pari'dir in owak itu pakasa sé pana api asi léwo' owo ro'na kape'delan iow.

¹⁷ Kamu linowiro i Amang Kasuruan, pakénno mangé eng kalowiran iow itu tanu pengaloindong an do'kos iow. Wo ka'i terimano mangé en Taar i Amang Kasuruan tanu sa'bel si aiwéé i Roh Le'nas en sumundur sé kaséké'.

¹⁸Émaano mangé waya en itu ang karapi i masombayang susur in oras wo mangileko mangé a si Amang Kasuruan ang karapi im pakaakinen i Roh Le'nas. Menomba-nombayango mangé, wo tatapke' matéi-téir am pakasa in témpo wo tioo mento' taan tatapke' masombayang. Susur iow in sumombayang, ipengasombayang angé waya sé tou le'nas.

¹⁹Wo ipengasombayang angé ka'i aku, wosama' an tutuwku i rumoma' wéan i Amang Kasuruan aku nunuwu' isumoma, akar ra'io wana eng kaindé'anku ing kumua in Abar Kaaruien en andumoro' i Yesus Kristus. En Abar Kaaruien itu indior ra'ipé' aicua a sé pakasa en tou, taan intarépé' aicuao ai séra.

²⁰Yaku ayutus mengakua in Abar Kaaruien itu, wo ampa'paano in Abar Kaaruien ituo, akar in intarépé' aku pakabuin. Isombayang angé, wosama' ra'io wana eng kaindé'anku makua in Abar Kaaruien itu, tambisa si musti cuaku a sé tou.

²¹ Si Tikhikus oka e maangé ai camu eng kumua in andumoro' ing katouanku wo sapa si niéma'ku, wosama' ro'na kakailekan iow andumoro' yaku. Sia poow si paupu-upusta wo sia tou le'tek mengaselewir si Casuruan.

²²Siituo imangémai sia ru'du'ku mangé ai camu, wosama' kailekan iow en abar andumoro' icami wo ka'i sia mibor in até miow.

²³Pekiupusenku wosama' si Amang Kasuruan Amangta wo si Yesus Kristus Apo'ta méma' sé poo-poow menonou ang kaeluran, ang kaupusan wo am paémanen.

²⁴En upus si aitambér i Amang Kasuruan mewali-wali a sé im pakasa in tou sé ra'ica mento' mengaupus a si Apo'ta Yesus Kristus.