Read Tontemboan Filipi 3 Bible Online

Filipi 3 - Tontemboan bible

Filipi 3

¹Anaé, é poo-poowku, maaru-aruio mangé ampa'paan kamu meesao wo si Apo' Yesus. Yaku ra'ica mendam in uter e matic sumawel sapa sé aipatickuo ai camu. Ampa'paan eng kasalé'anku en tuméir icamu wosama' kamu ra'ica kauwakan in sususuien imasélé'kow.

²Mareti-retio mangé kamu a sé tou sé mengaéma' in léwo', sé patus patuulen asu wo sé malesé' sé tou maéman a si Kristus en sunaten.

³Taan icitao sé tou wutu-wutul sinunat, ra'ica iséra. Ampa'paan icitao sé tou mengaapo' a si Amang Kasuruan si pakaakinen i Roh-Na, wo mengatirayo ampa'paan meesa wo si Kristus Yesus, wo ra'ica mengamangén a si sapa sé kaséréan tanumai atoran in sunat.

⁴En ulitna yaku ro'na mamangén asi sapa sé kaséréan. Sa awéan tou maanggap sia in esa ro'na mamangén asi sapa sé kaséréan, yakupé' en lumébémai wo isia.

⁵ Yaku sinunat an tutuw in umurku walu ngando. Yaku tou Israel, asi suku i Benyamin, wutu-wutul tou Ibrani. Wo aku tou Farisi, si le'tek keli an ukum Torat.

⁶ Yaku incaya' keli an agama Yahudi akar paokoienku sé jamaat sé maéman a si Kristus. Wo yaku wutu-wutul le'tek makiit in ukum Torat akar ra'ica wana tou e ro'na méé kaséaan a yaku andumoro' in itu.

⁷Eng katouanku tanu siitu indior anggapenku awéan eng katoronaan, taan intarépé' anggapenku ra'ica wana eng katoronaan ampa'paan i Kristus.

⁸Ra'ica siituke', am baya-waya ra'ica wana torona, sa ipeputé wo yaku intarépé' si makatuuso si Kristus Yesus, Apo'ku. Wo ampa'paano i Kristus Yesus, iwekarku waya en itu wo anggapenku tanu noo, wosama' aku lébépé' ka'i makatuus si Kristus Yesus,

⁹wo meesa ang karapi-Na. Anaé, aku ra'ica nianggap wutul i Amang Kasuruan ampa'paan i rumaméji makiit in ukum Torat, taan aku nianggap wutul ampa'paan maéman a si Kristus. Ampa'paan sé tou nianggap wutul i Amang Kasuruan kiit im paémanen éra.

¹⁰Intarépé' en icasalé'ku asalo makatuus si Kristus Yesus wo ing kawasa si tumou Sia am papaté. Wo icasalé'ku imendam ing kawenduan si sinangkum-Nao wo mamuali tanu Sia si mawendu akar imaté,

¹¹wosama' ang kasiwakana aku ro'na touen sumawel an uner é tou imatéo.

¹²Yaku ra'ica kumua sapaoka eng katouanku mamualio kaputé ing katouan i Kristus Yesus kuma'pa eng katouanku makakii-kiito. Taan aku tatap rumaméji wosama' aku ro'na menonou kaputé ing katouan-Na ampa'paan yaku sinisir-Nao mamuali anu-Na.

¹³Poo-poow, yaku in esa ra'ica maanggap sapaoka eng katouanku mamualio kaputé ing katouan i Kristus Yesus. Taan awéan esa si niéma'kuo: ailupakuo sapa sé sumangkumo niéma'ku indior wo rumaméji makéré sapa si an diorku.

¹⁴Wo aku menéro-néron akar in angéan ing ka'karan e makéré in laasa an sorga. Torona in ituo si Amang Kasuruan itumowao icita sé meesao wo si Kristus Yesus.

¹⁵Ampa'paano itu, mayoo kita sé lekepo em paémanen e mawerot in taniitu. Sa awéan ai camu membalinaan em pakawerot wo yaku andumoro' in itu, ituru' oka i Amang Kasuruan ai camu sapaoka en aicuaku itu wutul.

¹⁶Em penting keli kita menonou kiit asé sapa sé kinéréantao akar intarépé'.

¹⁷ Poo-poow, kiiteno mangé em pakatouku. Wo wéanio' rékén sé tou sé menonou mengakiit im pakatou ami.

¹⁸Icuaku in taniitu, ampa'paan awéan e mangémai akar en atéku wendu keli. Tanu sé makakeli-kelio aicuaku ai camu ang karapi i maamé', ita'néiku ai camu sapaoka intarépé' keli tou imangaku séra makiit si Kristus, taan séra ra'ica menonou makiit in sususuien i Kristus si maté ang kayu salip en tumu'bus ing kamesé-meséaanta!

¹⁹Sé tou menonou tanu siitu ukumen oka i Amang Kasuruan akar ing kauré-uré. Séra menonou asaloke' makiit ing kasalé'an in owak éra in esa. Séra tirayo mengaéma' in sapa sé kalawiin. Séra mawerotke' andumoro' sé ang kayo'baan anio'.

²⁰Taan icita imamualio tou in sorga. Wo an sorga itu owo, maai oka si Lumolowir si paento-entoonta, Siao si Apo' Yesus Kristus.

²¹An tutuw Sia maai, roban-Na oka en owakta si ra'ica keter wo si ro'na materi anio', mamuali tanu in owak-Na si parayo-rayo wo pasiri-siriin. Sia ro'na méma' in itu ampa'paan Sia makaanu ing kawasa si makawoo méma' im baya-waya kumuru ai Sia.