Read Tontemboan Kolose 1 Bible Online

Kolose 1 - Tontemboan bible

Kolose 1

¹En surat anio' a yaku owo Paulus si mamuali ruru'du'an i Kristus Yesus kumiit ing kasalé'an i Amang Kasuruan wo ka'i asi Timotius poowta.

²En surat anio' aicirim ami a sé poo-poow le'nas ang Kolose, sé maémano a si Kristus. Pekiupusenku a si Amang Kasuruan, Amangta, sa woo ro'na Sia tumambérai in upus wo ing kaeluran-Na ai camu.

³An tutuw iow pengasombayang ami, pengua-ngua ami i makapulu'sama' a si Amang Kasuruan, Amang i Apo'ta Yesus Kristus,

⁴ampa'paan liningao ami andumoro' im paémanen iow a si Kristus Yesus wo andumoro' in upus iow a sé im pakasa é tou le'nas.

⁵Kamu maéman wo mengaupus taniitu ampa'paan kamu maarap wo mengento-ngento' sapa sé aitu'tu'o i Amang Kasuruan torona miow an sorga. Em paarapen itu liningao miow an tutuw in sususuien wutul ipakua-kuao ai camu. Siituo en Abar Kaaruien andumoro' i Yesus Kristus.

⁶Wo en Abar Kaaruien itu aicaseraro am bisa-wisa ang kayo'baan wo em buéna kinaséréano ang katouan é tou. Taniituo ka'i wo icamu, tumo'tolai kamu luminga in Abar itu wo wutu-wutul makailek in upus aitambér-Na, kamu kinamango i Amang Kasuruan.

⁷ Pakasa en Abar Kaaruien andumoro' i Yesus Kristus itu, kinailekan iow asi Epafras owo si karapi ami maselewir si caupus ami. Sia le'tek mengaselewir asi Kristus torona ing kalooran iow.

⁸Siao ka'i eng kumua ai cami sapaoka kamu meupu-upusan ampa'paan ing kawasa i Roh Le'nas.

⁹Ampa'paano in itu, tumo'tolai kami luminga andumoro' miow, kami ra'ica mento' menomba-nombayang torona miow. Pekiupusen ami a si Amang Kasuruan wosama' kamu wéan-Na mai ing kapinteran wo ing kakailekan wutul, wosama' sapa sé icasalé'-Na, kailekan iow im butul.

¹⁰Wo in taniitu kamu patus menonou an dior-Na wo maarui in até-Na am baya-waya wo ro'na méé im buéna loor am pakasa im pengaémaan wo makaawes makatuus si Amang Kasuruan.

¹¹Pekiupusen ami ka'i a si Amang Kasuruan wosama' kamu keteren-Na mai ang karapi ing kawasa i rarayo wo in sisiri'-Na, wosama' an tutuw iow meta'up ing kawenduan, kamu kasake' le'tek wo talesen masaru waya in itu,

¹²wo makua ka'i mangé i makapulu'sama' a si Amang, si Amang Kasuruanta ang karapi in arui, ampa'paan Siao e méma' icamu patus makéré im bagéan ang kakolanoan in sendot-Na si aitu'tul-Nao a sé tou le'nas.

¹³Kita aiwekaro i Amang Kasuruan asi kawasa ing kariréimbengan wo yéra-Na ang Kakolanoan i Toyaang-Na si caupus-Na keli.

¹⁴ Ampa'paano si Toyaang-Na itu akar kita tinu'buso, eng kaangéanna eng kamesé-meséaanta niampungano i Amang Kasuruan.

¹⁵Si Kristus itu tanu paséréan pakasa im peri i Amang Kasuruan si ra'ica kaséréan. Si Kristus itu Toyaang-Na luluna si lébé penting asé pakasa sé niéma'-Na.

¹⁶Ampa'paano si Kristus, akar émaan i Amang Kasuruan pakasa sé ang kayo'baan wo sé an sorga, pakasa sé kaséréan wo sé ra'ica kaséréan, tanumai palukutan pasiri-siriin kuma'pa kakolanoan, roh sé maperénta kuma'pa sé makakawasa. Em baya-waya niéma' i Amang Kasuruan ampa'paano si Kristus wo torona i Kristus.

¹⁷Ra'ipé' niéma' em baya-waya si Kristus awéano, wo Siao ka'i en tumu'tul pakasa in itu an tampana asi esa wo si esa.

¹⁸ Siao si capala matu'tul sé jamaat, kaputé in do'kos si makakawasa in owak. Anaé, Siao en lébé penting wo im baya-waya, ampa'paan Siao si luluna, si kataré-taré tinou sumawel an uner é tou imatéo.

¹⁹Ampa'paan icasalé' i Amang Kasuruan, sapaoka pakasa em peri-Na awéan an owak i Kristus ang karapi in lekep.

²⁰ Wo ampa'paan si Kristus ituo, akar émaan i Amang Kasuruan pakasa sé ang kayo'baan wo sé an sorga meeluran sumawel wo Sia. Niéma'-Na pakasa ro'na meeluran sumawel wo Sia, ampa'paano in enda' i Kristus si maté ang kayu salip.

²¹Indior, kamu ka'i menonou tayang asi Amang Kasuruan wo mamuali kaséké'-Na an untep in até wo e ngaas iow en tuusna em pengaémaan iow léwo'.

²²Taan intarépé' kamu niéma'o i Amang Kasuruan meelurano sumawel wo Sia ampa'paan im papaté in owak i Kristus, wosama' kamu menonou le'nas wo ra'ica wana kaséaan wo ra'ica wana e ro'na itudu an dior-Na.

²³Ampa'paano in itu kamu musti le'tek maéman wo kasake' keter makatimboi asi Abar Kaaruien andumoro' si Yesus Kristus. Wo tioo itela'u miow em paarapen si an untep in Abar Kaaruien itu, si aiwééo ai camu wo liningao miow. Wo en Abar Kaaruien itu aicuao a sé pakasa é tou ang kayo'baan. Wo yaku Paulus mamuali tou mengaselewir eng kumua in Abar Kaaruien andumoro' i Yesus Kristus itu.

²⁴Intarépé' aku arui ampa'paan ro'na mendamai ing kawenduan torona ing kalooran iow. Wo eng kawenduan anio' musti pendamen in owakku tanu in lumekep ing kawenduan si musti wuléngen woo i Kristus torona in owak-Na siituo sé jamaat-Na.

²⁵Yaku imamualio tou si mengaselewir sé jamaat itu ampa'paan aku tinokéan i Amang Kasuruan in tawoien eng kumua im pakasa in Taar-Na ai camu.

²⁶En Taar-Na itu indior aicaenepé' asé im pakasa é tou maatu-atus ngata'un eng kauréna, taan intarépé' aipapaturu'o i Amang Kasuruan a sé tou le'nas.

²⁷Wo Sia masalé' kumua a sé tou-Na sapaoka sé icaenepé' itu uli-ulit loor wo wangko' asé pakasa in tou sé ra'ica Yahudi. Sé ipakaenep itu tana'i, si Kristus an atéo miow, eng kaangéanna kamu awéan paarapen makéré im bagéan asi rarayo wo in sisiri' asi Amang Kasuruan owo.

²⁸Anaé, si Kristus ituo sé ipakua ami a sé im pakasa in tou. Kami masina'u wo masusui iséra ang karapi wuta ing kapinteran asi Amang Kasuruan owo, wosama' kami ro'na makawali pakasa in tou wutu-wutul lekep ampa'paan meesao wo si Kristus.

²⁹Torona in ituo aku tumawoi wo mauli-ulit rumaméji ang karapi i mamangén ang kaketeran si aiwéé mai i Kristus wo repet matawoi an untep in owakku.