Read Tontemboan Kolose 2 Bible Online

Kolose 2 - Tontemboan bible

Kolose 2

¹En casalé'ku, wosama' kailekan iow sapaoka uli-ulit uter em paraméjianku en tumawang icamu ang Kolose, wo sé tou an Laodikia wo ka'i pakasa sé tou sé ra'ipé' makatuus yaku an tampa-tampa walina.

²Yaku rumaméji tanu siitu wosama' en até éra kaiboran wo meesa ang kaupusan akar séra makasiya' ang kakailekan andumoro' sé wutul wo uli-ulit maéman. Wo in taniitu kakailekan éra oka em pawasan i Amang Kasuruan sé indior icaenepé'. Em pawasan-Na itu tumuru' a si Kristus.

³Wo si Kristus ituo e ro'na muka' im pawero-werotenta akar kita ro'na makailek pakasa ing kapinteran asi Amang Kasuruan owo wo makailek sé indior ipaene-enep-Napé'.

⁴En itu aicuaku wosama' kamu ra'ica kauwakan i séike' mangé en tumawér icamu ang karapi i nunuwu' manam pengalingan.

⁵Ampa'paan mandé ka'i aku ra'ica an uner iow taan en atéku kasake' ang karapi miow. Wo aku arui an tutuw luminga sapaoka kamu menonou mensan-samaan si esa wo sé walina wo em paémanen iow a si Kristus kasake' keter.

⁶Kamu tumerimao si Kristus Yesus Apo' miow. Ampa'paano in itu, kamu musti menonou meesa wo Sia.

⁷Wo iwayao mio' eng katouanmu maa'mut ai Sia wo wanguneno mio' eng katouan iow mamangén ai Sia si tanu tuurna. Iwayao mio' ka'i em paémanen iow makaketer kaputé sé aisusuio ai camu, wo iwayao mio' en até miow mengua-ngua i makapulu'sama' a si Amang Kasuruan.

⁸Mareti-retio mangé kamu, oréoka awéan en tumawér icamu in sususuien andumoro' ing katouan sé ra'ica wana torona wo ra'ica wutul. En sususuien éra itu ra'ica asi Kristus owo, taan mengatuuré' asi kanaramen é tou indior wo ka'i a sé roh sé makakawasa ing kayo'baan.

⁹Anaé, kamu tioo katawéran in sususuien itu, ampa'paan pakasa em peri i Amang Kasuruan awéano an owak i Kristus ang karapi in lekep.

¹⁰Wo ampa'paan kamu meesao wo si Kristus, kamu ka'i niéma'o lekep. Siao si capala si cumawasa sé maperénta wo sé makakawasa.

¹¹Wo kamu sé meesao wo si Kristus, kamu itu tanu sinunato. Wo en sunat itu ra'ica sunat e niéma' é tou, taan en sunat si niéma' i Kristus, ampa'paan em peri ing kamesé-meséaan an owak iow pinokolo i Kristus.

¹² Ampa'paan an tutuw iow nibaptis, kamu tanu aicuburo mewali-wali wo si Kristus. Wo ang karapi im baptisan itu, kamu ka'i tinou sumawel mewali-wali wo Sia, ampa'paan kamu maéman asi kawasa i Amang Kasuruan si tumou sumawel si Kristus an uner é tou imaté.

¹³ Indior kamu tanu imatéo, ampa'paan kamu mengaéma'pé' ing kamesé-meséaan wo ampa'paan ra'ica sinunat iciit in atoran é agama Yahudi. Taan intarépé' kamu tinouo sumawel i Amang Kasuruan mewali-wali wo si Kristus, kekawus im pakasa ing kamesé-meséaanta niampungan-Na.

¹⁴ Eng kamesé-meséaanta itu tanu surat utang si pinatican andumoro' in tuduan ing kamesé-meséaanta. Taan intarépé' en surat utangta itu binatalo i Amang Kasuruan ampa'paan aipaku-Nao ang kayu salip.

¹⁵Ang kayu salip itu, pakasa é roh sé maperénta wo e roh sé makakawasa kinalao i Kristus. Niéma'-Na séra tanu tou pakawa'kesen, mawaya' makiit an somoi-Na. Séra mamuali séséro'en é tou an tutuw si Kristus muntung.

¹⁶ Ampa'paano in itu, tioo iwaya miow sé tou méé kaséaan ai camu, ampa'paan kamu ra'ica makiit in atoran é agama Yahudi andumoro' ing kakanen wo in elepen, kuma'pa andumoro' in endo-endo wangko', serap weru kuma'pa in endo Sabat.

¹⁷Ampa'paan pakasa sé atoran itu indior niéma' tanu im bayang andumoro' im perkara-perkara sé mamuali oka asi endo mengangai. Wo en ulitna sé aituru' an atoran-atoran itu Siao si Kristus.

¹⁸Anaé, tioo en laasa ing katouan iow itu léwoon in sususuien in tou si maturu' kéndo' ko'kos en até wo maapo' a sé malaékat wo mengatirayo andumoro' im papaturu'an sé aipapaturu' ai sia wo ka'i mengarangka' in owak ang karapi ra'ica wana alasan ampa'paan asalo imawero-werot ing kasalé'an ing kayo'baan.

¹⁹ En ulitna si tou tanu siitu ra'ica mengamangén asi Kristus si capala é pakasa in tou. Si Kristus itu tanu ro'kos si mengatu'tul waya in owak sé pineesa i no'at wo im buku-wuku, wosama' en owak-Na makaketer kumiit ing kasalé'an i Amang Kasuruan.

²⁰Kamu imatéo mewali-wali wo si Kristus, wo aiwekaro ang kawasa é roh ing kayo'baan anio'. Taan kéitu réén kamu imenonoué' tanu sé tou pakakawasan ing kayo'baan anio'? Kéitu réén kamu makiité' in atoran-atoran ing kayo'baan anio'? Tanumai,

²¹‘Tioo lisun en anio', tioo mepé' ing kakanen itu, tioo timboian en anio'.’

²²Pakasa sé atoran itu andumoro' in sapa sé ra'io wana torona kekawus im pinaké wo ra'ica akar ing kauré-uré. Sé atoran tanu siitu asalo kumiit im perénta-perénta wo in sususuien-sususuien sé niéma' é tou.

²³Sé atoran itu kaséréan woo loor, ampa'paan sé tou masusui in atoran-atoran itu kaséréan tanu kéndo' uli- ulit mengaapo' asi Amang Kasuruan. Wo séra kumo'kos in até wo makiit in atoran-atoran itu akar mengaokoi kéndo' in owak éra in esa. Taan pakasa en itu ra'ica wana torona, ampa'paan séra asalo makiit ing kasalé'an in owak éra in esa.