Read Tontemboan Kolose 4 Bible Online

Kolose 4 - Tontemboan bible

Kolose 4

¹ Éi tuang-tuang, mengaéma'o mangé sé wutul a sé ata miow wo wééo mio' waya sapa e mamuali hakna. Weroteno mangé sapaoka kamu ka'i awéan Tuang an sorga.

²Masombayango mangé in re'dem kamu ang karapi im bewerot weresi wo ka'i makua mangé i makapulu'sama' a si Amang Kasuruan.

³Wo isombayang ka'i mangé kami wosama' wukaan-Na mai en lalan ai cami eng kumua in abar si indior aicaenepé' andumoro' i Kristus. Ampa'paan i méma' in itu akar aku ayuntep am bui.

⁴Isombayango mangé wosama' ro'na sisilku i makakii-kiit en abar itu, ampa'paan siituo si musti émaanku.

⁵ Menonouo mangé kamu ang karapi wuta ing kapinteran asi Casuruan owo an tutuw kamu mewali-wali wo sé tou ra'ipé' maéman a si Kristus. Wo pakéno mangé sumama-sama' en témpomu itu, wosama' séra ka'i maéman a si Kristus.

⁶Wo rumaméjio mangé memaké-maké sé nunuwu' e méma' in até é tou arui wo manam palingan. Wo in taniitu kailekan iow tumambisa en sumowat ang karapi im butul sé wuwuéien é tou.

⁷ Pakasa en abar andumoro' yaku am bia'i, icua oka i Tikhikus ai camu. Sia poow si caupusta, ata le'tek si re'dem matawoi wo ka'i karapi ami e maselewir si Casuruan.

⁸Sia airu'du'ku mangé ai camu wosama' kailekan iow en abar in an andumoro' sé mamuali ai cami, wosama' ka'i sia mibor in até miow.

⁹ Sia maangé oka mewali-wali wo si Onesimus si poow icaupusta wo le'tek. Si Onesimus esaan an jamaat iow. Séra in dua oka eng kumua ai camu pakasa sé mamuali am bia'i.

¹⁰ Si Aristarkhus, si binui mewali-wali wo yaku méé ka'i mai in siri' ai camu taniitu ka'i si Markus, si toyaang metuari wo si Barnabas. Andumoro' si Markus anio' sumangkumo aicuaku ai camu sapaoka sa sia maai, terimano mangé sia ang karapi in sama'.

¹¹Si Yesus si patowan éra Yustus, méé ka'i mai in siri' ai camu. An uner é tou Yahudi am bia'i sé maémano a si Yesus Kristus, wayake' séra in telu sé matawoi ang karapiku torona ing kakolanoan i Amang Kasuruan. Séra wutu-wutul e miboro yaku.

¹² Si Epafras méé ka'i mai in siri' ai camu. Sia esaan an jamaat iow wo ata i Yesus Kristus. Kamu penomba-nombayangna wosama' em paémanen iow a si Kristus Yesus makaenté-enté' tanu tou wangkoo wosama' kamu ka'i wutu-wutul makailek sapa waya sé icasalé' i Amang Kasuruan.

¹³Wo aku ro'na méé kasairian andumoro' si Epafras, sapaoka sia repet eng ketawoi torona miow wo torona éra sé an Laodikia wo Hierapolis.

¹⁴ Si Dokter Lukas si caupus ami méé ka'i mai in siri', taniitu ka'i si Demas.

¹⁵Icuao mangé ka'i en siri' ami a sé poo-poow a mangé en Laodikia, wo a si Nimfa ang karapi é jamaat sé mali'us maapo' am baléna.

¹⁶Wo sa en surat anio' binacao an uner iow, raméjinio' icirimo mangé a sé jamaat an Laodikia wosama' bacan ka'i an uner éra. Wo en surat si aicirimku a sé jamaat an Laodikia, musti bacan ka'i an uner iow.

¹⁷ Wo icuao mangé a si Arkhipus, “Tawoieno mangé en tawoien si aiwéé mai i Casuruan ai co akar ing kumawus.”

¹⁸Yaku Paulus ka'i méé mai in siri' ai camu. En siri' anio' yaku in esa e matic.[2] Ta'néien iow angé sapaoka aku an untepé' im bui! Isombayangku sa woo ro'na en upus aitambér i Amang Kasuruan mewali-wali wo icamu.