Read Tontemboan 1 Tesalonika 4 Bible Online

1 Tesalonika 4 - Tontemboan bible

1 Tesalonika 4

¹Poo-poow, aisusuio ami ai camu tambisa em peri mengaarui in até i Casuruan, wo kamu wutu-wutul menonouo tanu siitu. Wo intarépé' pangileken ami ai camu ang karapi ing kawasa i Apo' Yesus, wosama' kamu rumaméjipé' mangé menonou mengaarui si Amang Kasuruan.

²Kailekano miow sé aisusuio ami ai camu maké ing kawasa i Apo' Yesus.

³Si anioo waya eng kasalé'an i Amang Kasuruan: menonouo mangé toronake' Sia, menonou le'nas wo ra'ica mengabersina.

⁴Kamu sé tuama, musti esake' wéwéné e mamuali penanaan iow. Wo menonou angé le'nas an dior i Casuruan wo kamu siriin oka é tou.

⁵Tioo kamu menonou kumiit ing kasalé'an in owak sé ra'ica wutul, wayake' sé tou ra'ica makatuus si Amang Kasuruan si mengaéma' in tanu siitu.

⁶Andumoro' in ubungan iow mempenanaan, tioo kamu mengauwak kuma'pa mengaéma' ing kaséaan a sé poo-poow iow. Ampa'paan ukumen i Amang Kasuruan sé tou mengaéma' in tanu siitu, puté wo sé aicuao ami wo sé wutu-wutul aipokéi ami ai camu indior.

⁷Kita tinowao i Amang Kasuruan e menonou ang kale'nasan wo ra'ica mengaéma' in andumoro' sé cabul sé karican oka mai.

⁸Ampa'paan in itu, si séike' si ra'ica kiim tumerima in sususuien anio', sia itu ra'ica asaloke' kumélong sé tou, taan kumélongo si Amang Kasuruan si mééo mai i Roh Le'nas ai camu.

⁹Wo en andumoro' i meupu-upusan wo sé poo-poow maéman, werotenku kamu ra'io sangali susuian ampa'paan en itu aisusuio i Amang Kasuruan tambisa e meupu-upusan.

¹⁰Ampa'paan, en itu aituru'o miow waya a sé poo-poow sé maéman am pakasa in sangkum i Makedonia. Taan é poo-poow, uli-ulit pekiupusenku wosama' kamu mauli-ulit mengaupus sé tou walina.

¹¹Rumaméjio mio' kamu menonou mensan-samaan wo tioo icarambét an urusan é tou walina, taan aweso taré kamu tumawoi mangéré ing kakanen iow in esa tanu si sumangkumo aitaar ami ai camu.

¹²Wo in taniitu, kamu siriin oka é tou sé ra'ica maéman a si Apo' Yesus, wo kamu ra'ica mengamangén a sé tou walina.

¹³Poo-poow, sa awéan tou maté, ra'ica kiim ami kamu mawendu keli kaputé sé tou ra'io wana em paarapen. Ampa'paan in itu, icasale' ami kumua ai camu sapa si mamuali oka a sé tou matéo.

¹⁴Ampa'paan sa émanenta sapaoka si Apo' Yesus imatéo wo itumou sumawel, émanenta ka'i sapaoka si séike' e maéman ai Sia akar imaté, touen oka sumawel i Amang Kasuruan wo li'usen-Na mangé kumarapi wo si Yesus.

¹⁵ Si Apo' Yesus in esa sumangkumo icumua sa Sia maai oka sumawel. Wo kita sé menonoué' an tutuw Sia maai sumawel, ra'ica icaangkai rior wo sé tou imatéo.

¹⁶Sa Sia maayo, awéan oka esa perénta an sorga kumua in taangko', si Kikiiten é malaékat mangko' repet wo en terompét i Amang Kasuruan tuméngé. Asi témpo ituo si Apo' Yesus tumumpa mai a mangé en sorga owo, wo sé tou maéman ai Sia sé matéo, séra en dior touen sumawel.

¹⁷Kekawus in itu, kita sé menonoué' asi témpo itu, angkaien oka i Amang Kasuruan ang kambung mewali-wali wo sé tou sé tinou-Nao sumawel wo sumungkul si Apo' Yesus ang kambung. Wo icita im baya mento' oka mewali-wali ang karapi i Apo' Yesus akar ing kauré-uré.

¹⁸Ampa'paan in itu, musti isisil iow angé sumawel en sususuien anio' a sé tou walina wosama' kamu ro'na mengkeng-keteran in até.