Read Tontemboan 2 Timotius 4 Bible Online

2 Timotius 4 - Tontemboan bible

2 Timotius 4

¹Si Kristus Yesus maai oka sumawel wo Sia mai kumawasa tanu Kolano. Siao e makim sé tou menonoué' wo sé tou imatéo. Ampa'paano in itu intarépé' an dior i Amang Kasuruan wo si Kristus Yesus, uli-ulit icuaku ai co é Timotius wosama':

²icuamuo mangé en Taar i Casuruan a sé tou, loor kuma'pa ra'ica loor en orasna, ko musti tu'tul e mengua-ngua in Taar itu. Sina'ueno mangé sé tou mengaéma' ing kameséaan, romaan angé séra ang karapi wuta ing katalesenan an tutuw ko mengasusui iséra.

³Émaanmu waya en itu, ampa'paan asi esa endo mengangai sa, sé tou ra'io kiim luminga in sususuien wutul itu. Taan taré towan éra sé guru sé icasalé' éra e marui in até éra ang karapi i nunuwuun manam pengalingan.

⁴Séra ra'ica kiim luminga in sususuien wutul i Casuruan, taan masalé'ke' luminga in sisisilen sé asalo niéma' é tou.

⁵Taan ko é Timotius, kawasanmu mangé en owakmu mandé sapake' e mamuali. Malese-leseno mangé masaru ing kawenduan, émaano mangé melala'us en tawoien mengakua in Abar Kaaruien andumoro' i Yesus Kristus wo émaan sumama-sama' en tawoien si aiwéé i Casuruan ai co.

⁶Andumoro' yaku, intarépé' yaku tawio maté. Eng katouanku intarépé' tanuoka in elepen anggor aituas tanu tuus raragés in owakku a si Casuruan.

⁷Niéma'kuo en tawoienku ang karapi in sama' akar i malekep, kaputé wo si tou repet em pakatéron kumiit mekowa' tuméron akar in sumiwak. Wo aku kasake' le'tek maéman a si Casuruan.

⁸Yaku, aitu'tulo i Casuruan mahkota ampa'paan aku mengaéma' im butul an dior-Na. E mahkota itu iwéé-Na oka a yaku asi endo Sia mai makim pakasa in tou. E mahkota itu ra'ica yakuke' e ro'na makéré, taan teriman oka ka'i é pakasa in tou sé mengento-ento' Sia maai sumawel ang kayo'baan. Si Casuruanta anio' ulit Akim si ra'ica marapit.

⁹Timotius! raméjinmu mario-rioro maai a yaku.

¹⁰ Ampa'paan si Kreskes imangém ang Galatia wo si Titus imangémo an Dalmatia. Wo aku aitela'uo ka'i i Demas, sia imangémo an Tesalonika ampa'paan sia masalé-salé'ke' sé andumoro' ing kayo'baan.

¹¹ Wo si makaento' ang karapiku am bia'i waya oka si Lukas. Ampa'paan in ituo mangéo pangérénmu si Markus wo kamu in dua mewali-walio mai am bia'i. Ampa'paan si Markus ro'na sumémbong méma' in tawoienku am bia'i.

¹² Airu'du'kuo si Tikhikus mangé an Efesus.

¹³ Sa ko maayo am bia'i, oréoka ipelupamu e maalimai in jubaku si aitela'uku am balé i Karpus ang kota Troas wosama' aku ra'ica kautingan. Paalinai ka'i eng kitap-kitapku, lébé-lébépé' ka'i eng kitap si niéma' ang kulit é binatang owo.

¹⁴ Si Aleksander si makailek mangaéma' im pakakas an tambaga owo, iméma'o kelian kaléwo-léwo'an a yaku. Ukumen oka i Casuruan sia kiit sé niéma'na.

¹⁵Sia uli-ulit mengakélong in sususuien si aisusuitao. Ampa'paan ituo ko musti mareti-reti ai sia.

¹⁶An tutuw ing kataré-taré aku méla in owakku am pengadilan, ra'ica wana esaan angé asé tou en tumawang yaku. Pakasa in tou tumela'uo yaku. Taan pangilekenku a si Casuruan wosama' ra'ica ukumen-Na séra.

¹⁷Taan mandé ka'i aku aitela'u éra, si Casuruan kasake' ang karapiku. Kineter-Na mai aku wosama' aku ro'na kumua in Abar Kaaruien andumoro' i Yesus Kristus a sé tou ra'ica Yahudi ang karapi i makakii-kiit. Wo iwekar-Na ka'i aku am pakasa sé kaléwo-léwo'an, tanuoka aku icawekar am ba'ba' i singa.

¹⁸Iwekar-Na oka ka'i aku asé tou sé mawasa-wasa in léwo' e méma' yaku icawangkur. Lowiren-Na oka ka'i aku akar muntep an sorga, asi tampa Sia Makakawasa tanu Kolano. Siao em patus iparayo-rayo wo pasiri-siriin akar ing kauré-uré! Ulit.

¹⁹ Timotius, icuao mio' en siri'ku a si Priska, a si Akwila wo a sé taranak i Onesiforus.

²⁰ Si Erastus makaento'pé' ang Korintus. Wo si Trofimus aitela'ukupé' a Miletus ampa'paan sia sumakit.

²¹Wo ico rumaméjio maai an tutuw ra'ipé' mai en oras kautingan. Kelian sé tou maéman méé mai in siri' ai co. Séra itu si Ebulus, si Pudes, si Linus, si Klaudia.

²²Pangilekenku wosama' si Casuruan mewali-wali wo ico. Pangilekenku ka'i wosama' si Casuruan tumambérai in upus-Na ai camu im baya.