Read Tontemboan Titus 1 Bible Online

Titus 1 - Tontemboan bible

Titus 1

¹En surat anio' a yaku owo, Paulus. Yaku anio' ata i Amang Kasuruan wo ruru'du'an i Yesus Kristus. Yaku ayutus en tumawang sé tou sinisiro i Amang Kasuruan wosama' em paémanen éra makaketer wo ro'na makailek in sususuien wutul. En sususuien itu en tumawang iséra tumambisa menonou mengaapo' a si Amang Kasuruan.

²Ra'ipé' niéma' i Amang Kasuruan eng kayo'baan, Sia ijumanjio sapaoka Sia méé oka mai ing katouan akar ing kauré-uré a sé im pakasa in tou. Wo en janji-Na itu tantu mamuali, ampa'paan Sia ra'ica kawisa tumowo. Wo ampa'paano im paarapen in janji e makéré ing katouan akar ing kauré-uré siituo em patuuran im pasusuiku a sé tou maéman.

³Wo asi témpo si aitantuo i Amang Kasuruan, ituru'-Na ai cita en lalan makéré ing katouan akar ing kauré-uré. Aitoké-Nao a yaku eng kumua in Abar Kaaruien andumoro' i Yesus Kristus itu wo icuaku kiit im perénta-Na. Siao si Lumolowirta.

⁴ Éi Titus, ico nianggapkuo toyaangku in esa, ampa'paan kita in dua puté maéman a si Kristus Yesus. Pekiupusenku a si Amang Kasuruan wo si Kristus Yesus Lumolowirta tumambérai in upus wo ing kaeluran ai co.

⁵Ico aitela'uku am pulou Kreta wosama' ro'na tu'tulenmu sapa sé ra'ipé' tu'tul an jamaat am bitu wo ka'i lumantik sé penatua ang kota-kota am pulou itu. Kiiteno mangé tanu sé aitaarkuo ai co.

⁶ Sé tou angkaien mamuali penatua musti tanu sia'i: ra'ica wana e ro'na méé kaséaan ai sia, wayake' in esa wéwéné e mamuali penanaan, sé toyaangna maéman a si Casuruan wo in taniitu ra'ica wana tou e makua sapaoka sé toyaang itu makaperi ra'ica loor kuma'pa tansunduren.

⁷Sé mengatilik an jamaat en tawoienna mengatu'tul sé jamaat i Amang Kasuruan, sia musti menonou ra'ica wana e ro'na méé kaséaan, ra'ica tirayo, ra'ica tae'bow, ra'ica lalangun, ra'ica tampenokolen wo ra'ica ata in doit.

⁸Taan séra musti masalé' materima sé tou walina en lumosér am baléna, masalé' mengaéma' sé loor, pinter, ra'ica marapit, menonou le'nas wo makawoo tumang ing kasalé'an in owak.

⁹Séra ka'i musti tou wutu-wutul makiit in sususuien wutul si sususuien aisusuio ai séra. Wo in taniitu kawooan éra maké in sususuien wutul itu en sumina'u sé tou wo ka'i makawoo rumondor im bewerot é tou sé masundur in sususuien itu.

¹⁰Icuaku in taniitu ampa'paan kelio sé tou masalé' mengasundur in sususuien wutul. An uner éra itu awéan tou Yahudi si maémano a si Yesus, pengasusuina sapaoka sé tou ra'ica Yahudi sa masalé' mamuali anggota jamaat musti sunaten owo. Séra itu mengauwak sé tou walina ang karapi in doroma' éra sé ra'ica wana en torona.

¹¹Sé tou tanu siitu musti iru'du'mu menes wosama' séra ra'io mengasusui sé ra'ica wana en torona. Ampa'paan sé pengasusui éra itu mengauwak sé tou wosama' séra ro'na makéré roit. Wo en sususuien éra itu lumicokoo sé keli pamalé'.

¹²Awéan esa nabi, sia tou éra in esa ang Kreta si sumangkumo kumua in tana'i, “Ulito sé tou Kreta kotowo, puté wo sé binatang luméwo-léwo', longi' wo weles ra'ica kiim tumawoi.”

¹³En aicua i nabi itu wutul. Ampa'paan in ituo, sina'uenmu mangé séra ang karapi i mauli-ulit wosama' séra tatapke' mercaya in sususuien wutul.

¹⁴Wo péronenio' séra sé mengalinga in sisisilen sé asalo niéma' é tou Yahudi wo péronenio' ka'i séra wosama' ra'ica makiit in atoran-atoran é tou sé mengakélong in sususuien wutul.

¹⁵A sé tou le'nas an dior i Casuruan, sapake' waya en émaanna le'nas. Taan sé tou najis wo sé ra'ica maéman a si Casuruan, em pawasan wo em pengaémaan éra ra'ica loor ampa'paan en até wo em bewerot éra najis.

¹⁶Séra ka'i mangaku makatuus si Amang Kasuruan taan sa sérén em paémaan éra, séra meputé wo sé tou makélong Sia. Séra karican oka mai wo ra'ica le'tek ampa'paan masundur im perénta i Amang Kasuruan wo ra'ica makawoo mengaéma' in sapake' mangé sé loor.