Read Tontemboan Filemon 1 Bible Online

Filemon 1 - Tontemboan bible

Filemon 1

¹En surat anio' a yaku owo Paulus, si binui ampa'paan makua in abar andumoro' i Kristus Yesus wo asi Timotius owo poowta an esa paémanen. En surat anio' aipatic ami wo iwéé ai co Filemon si caupus ami, si katawoi ami,

² wo ka'i a si Apfia poowta wéwéné an esa paémanen wo a si Arkhipus karapita si mewali-wali maraméji mengakua andumoro' i Yesus a sé tou. Wo ipatic ka'i a sé jamaat sé mengali'us maapo' am balému.

³En upus aitambér wo eng kaeluran i Casuruan Amangta wo a si Apo' Yesus Kristus mewali-wali wo icamu!

⁴Susurku sumombayang, penuu-nuulenku e ngaranmu wo mengakua makapulu'sama' a si Amang Kasuruanku,

⁵ampa'paan liningakuo en abar andumoro' im paémanenmu a si Apo' Yesus wo andumoro' in upusmu a sé pakasa é tou le'nas.

⁶Yaku masombayang wosama' em pepoowanta tanu tou maéman ro'na méma' icita makaawes eng kailekan am pakasa sé loor sé ai citao ampa'paan kita meesao wo si Kristus.

⁷Poowku Filemon, ico mengaupuso sé tou le'nas akar séra kinaiborano in upusmu. Ampa'paano in itu yaku arui keli.

⁸Ampa'paano in upus i Kristus itu yaku mekiupus ai co, mandé ka'i aku ro'na woo rumu'du' ico andumoro' in sapa si musti émaanmu,

⁹taan ampa'paan ing kaupusanmu a sé tou, lébé loor pekiupusenku ai co ang karapi in lekep en até. Wopé'ka'i aku anio' Paulus matu'ao wo ka'i intarépé' binui ampa'paan i Kristus Yesus.

¹⁰ Pekiupusenku ai co andumoro' i toyaangku Onesimus, yaku mamuali amangna am paémanen ang kauréku an untep im bui.

¹¹Indior sia ra'ica wana torona ai co, taan intarépé' sia wutu-wutul awéano torona ai co wo ka'i a yaku.

¹²Intarépé' sia si paupu-upusku itu, iru'du'ku mangé sumawel ai co.

¹³En ulitna icasalé'ku woo en tumang sia am bia'i, wosama' sia ro'na sumawel ico maselewir a yaku ang kauréku an untep im bui ampa'paan makua in Abar Kaaruien i Yesus Kristus.

¹⁴Taan sa ra'ica énanmu, ra'- ica kiimku méma' in sapa-sapa wosama' eng kalooran émaanmu ra'ica ampa'paan pinelesé' taan émaanmu eng kalooran itu ang karapi lekep en até.

¹⁵Siituo wona' sia aipetané ang karoro'anke' wo ico wosama' sia ro'na terimanmu sumawel akar ing kauré-uré.

¹⁶Intarépé' sia ra'ica asaloke' atamu taan lumébé mai wo in itu. Ampa'paan sia mamualio poow an esa paémanen si paupu-upus. Sa ciit yaku, sia tanuo siitu, lébé-lébépé' ka'i ai co, tantu sia lébé ipaupu-upusmu ampa'paan sia atamu wo ka'i intarépé' sia tanu poowmu an esa paémanen a si Apo' Yesus.

¹⁷Ampa'paano in itu, sa anggapenmu aku karapimu an esa paémanen, terimano mangé sia tanuoka ko tumerima yaku.

¹⁸Sa sia méma'o ing kaséaan kuma'pa awéan utang ai co, yuntepo mio' waya en itu an tanggonganku.

¹⁹Yaku Paulus, kamakuo in esa e matic in anio': “Yaku oka en tumu'bus pakasa in utang i Onesimus.” Wo ra'io sangali ita'néiku sapaoka ko awéan utang a yaku e makawali ico makéré ing katouan weru an tutuw ko mamualio tou maéman.

²⁰Éi Filemon poowku an esa paémanen, an témponao émaanmu sé pinangilekku ai co. Aruieno mai en atéku ampa'paan im paesaanta a si Kristus.

²¹An tutuwku imatic in surat anio', percayanku sapaoka eng kale'tekanmu émaanmu oka sapa em pinangilekku. Wo percayanku ka'i sapaoka en émaanmu lumébé mai asi pinangilekku.

²²Wo ka'i tu'tulio' tampa en loséranku am balému, ampa'paan aku maarap, en somba-sombayang iow sowaten i Amang Kasuruan wosama' yaku ro'na maréng angé sumawel ai camu.

²³ Si Epafras icumirim mai in siri' ai co. Sia binui mewali-wali wo yaku ampa'paan maselewir a si Kristus Yesus.

²⁴ Sé kara-karapiku an esa tawoien, si Markus, si Aristarkhus, si Demas wo si Lukas, séra ka'i cumirim mai in siri' ai co.

²⁵En upus aitambér i Apo' Yesus Kristus mewali-wali wo icamu!