Read Tontemboan Ibrani 11 Bible Online

Ibrani 11 - Tontemboan bible

Ibrani 11

¹Sa kita awéan em paémanen a si Amang Kasuruan, émanenta sapaoka kéréanta oka sapa sé paarapenta. Ampa'paan im paémanen itu kailekanta sapaoka kéréanta oka sapa sé ra'ica ro'na kaséréanta.

²Ampa'paan awéan em paémanen, sé tou indior icasalé' i Amang Kasuruan.

³ Ampa'paan awéan paémanen akar ro'na kaangéanta sapaoka en tana' wo en langit wo pakasa sé an untepna niéma' i nunuwu' i Amang Kasuruan. Anaé, pakasa sé ro'na kaséréanta, niéma' asé sapa sé ra'ica kaséréanta.

⁴ Ampa'paan si Habel awéan paémanen, sia méé raragés binatang pinokol asi Amang Kasuruan sé lumoorai wo i raragés aiwéé i Kain. Ampa'paan si Habel awéan paémanen, akar sia tinerima i Amang Kasuruan tanu tou si nianggap wutul wo e raragés aiwééna tinerima i Amang Kasuruan. Mandé si Habel uréo imaté, taan ampa'paan im paémanenna, sia tanu maroma'pé' ai cita akar intarépé'.

⁵ Ampa'paan si Henokh awéan paémanen, sia niangkai angé i Amang Kasuruan an sorga akar ra'ica sangkumenna em papaté. Wo ra'io ka'i wana tou en suméré isia, ampa'paan sia niangkaio mangé i Amang Kasuruan. Eng Kitap Le'nas méé ing kasairian sapaoka an tutuw sia ra'ipé' niangkai angé sia maarui in até i Amang Kasuruan.

⁶Si tou ra'ica maéman a si Amang Kasuruan, sia ra'ica kawisa mako maarui in até-Na. Si tou mai a si Amang Kasuruan sia musti maéman sapaoka si Amang Kasuruan itu awéan, wo sia musti maéman ka'i sapaoka si Amang Kasuruan méé mai in laasa a sé tou sé uli-ulit mengaéré Sia.

⁷ Ampa'paan si Nuh awéan paémanen, sia kinuanan i Amang Kasuruan sapa sé mamuali oka sa, sé ra'ipé' sumangkum ako sinéréna, wo ang karapi ing katale'tekanna émaanna esa kapal wangker en lumowir sé pamaléna asi sonop wangko'. Wo in taniitu ituru'na sapaoka sé tou ang kayo'baan patus ukumen, wo sia in esa tinerima i Amang Kasuruan tanu tou nianggap wutul ampa'paan im paémanenna.

⁸ Ampa'paan si Abraham awéan paémanen, kiniitanna si Amang Kasuruan an tutuw sia tinowa wo airu'du' mangé asi esa tampa si mamuali oka bagéanna. Wo sia mangé mandé ra'ica kailekanna am bisa en tampa angéanna.

⁹ Ampa'paan im paémanenna, mandé ka'i sia maento' an tana' si aijanjio i Amang Kasuruan mamuali anuna, taan sia maento' am bitu tanuke' in tou manangkéi. Si Ishak wo Yakub ka'i mento' mewali-wali wo isia an ténda asaloke' i manangkéi, mandé ka'i séra tumerima in janji si meputé asi Casuruan owo.

¹⁰Si Abraham ro'na talesen menonou taniitu ampa'paan sia ang karoro'an i maento-ento' ing kota makapandasi keter, si kota itu pawasa-wasano wangunen i Amang Kasuruan.

¹¹ Ampa'paan si Abraham awéan paémanen akar si Sara ro'na maowa-owak mandé ka'i sia matu'ao wo ra'io toro ka'i makéré toyaang. En itu imamuali ampa'paan si Abraham maéman sapaoka émaan oka i Amang Kasuruan sapa sé aijanji-Na.

¹² Mandé si Abraham an tutuw itu matu'ao keli wo en owakna tanuoka mapatéo, taan sia makéré keli taranak ra'io karékénan ka'i, tanu sé sumesendot an langit wo i rangi'ngis an tembir in ta'sic.

¹³ Pakasa in tou itu maéman a si Amang Kasuruan akar séra imaté. Sera ra'ica tumerima sapa si aijanji i Amang Kasuruan, taan si aijanji itu asalo tinéinteng wo pengapé-ngapéien éra an tayang. Wo séra imangaku sapaoka séra itu asalo tou imanangkéi ang kayo'baan anio'.

¹⁴Sé tou imangaku in taniitu tantu séra ang karoro'an i mangéré in ento'an tanu roong éra in esa.

¹⁵Wo em paento'an si paérén éra itu, ra'ica roong si aitela'uo éra, ampa'paan sa séra lumelo in doong si aitela'uo éra itu, tantu séra imaréngo a mangé mbitu.

¹⁶Taan intarépé' séra lumelo si esa roong en lébé loorai, siituo si roong an sorga. Ampa'paano in itu si Amang Kasuruan ra'ica malawi' im patuulen Amang Kasuruan éra, ampa'paan aitu'tulo i Amang Kasuruan ai séra esa kota.

¹⁷ Ampa'paan si Abraham awéan paémanen, airagésna si toyaangna Ishak tanu raragés an tutuw sia niuji i Amang Kasuruan. Iragés i Abraham si toyaangna in esa itu, mandé ka'i tinerimanao en janji-janji i Amang Kasuruan,

¹⁸ icauntep si janji anio', “Taranak asi Ishakke' en tuulen oka taranakmu.”

¹⁹Ampa'paan paweroten i Abraham sapaoka sa si Ishak maté, tantu sia touen sumawel i Amang Kasuruan. Wo an tutuw si Amang Kasuruan tumu'tulo domba iragés isawel si Ishak, si Abraham tanuoka itumerima sumawel si Ishak am papaté.

²⁰ Ampa'paan si Ishak awéan paémanen, kamangenna si Yakub wo si Esau andumoro' sé maai oka sa.

²¹ Ampa'paan si Yakub awéan paémanen, an tutuw sia matawio imaté, kamangenna sé rua toyaang tuama i Yusuf esa wo si esa. Wo sia kumundu maapo' a si Amang Kasuruan makawangén an tempok im beka'.

²² Ampa'paan si Yusuf awéan paémanen, an tutuwna tawio imaté, icuana sapaoka sé taranak Israel kumesot oka a Mesir. Wo aitaarna wosama' en du'i-ru'ina musti uwiten tutuw éra kumesot a Mesir.

²³ Ampa'paan sé matu'a i Musa awéan paémanen, kekawus i Musa itumou, sia ayenep é matu'ana telu ngaserap eng kauréna, ampa'paan sérén éra sapaoka si toyaang itu makagio pasung wo séra ra'ica maindé' im perénta i colano.

²⁴ Ampa'paan si Musa awéan paémanen, tutuw sia imawangkoo ra'ica kiimna patuulen toyaang i mengala'un kolano Mesir,

²⁵ampa'paan ra'ica kiimna menonou maaru-arui ang kamesé-meséaan si ang karoro'anke', taan icasalé'na mawendu mewali-wali wo sé tou i Amang Kasuruan.

²⁶Si Musa kumélong en tumerima im pakasa ing kasiyaan a Mesir, wo en lébé icasalé'na iséro' ampa'paano im paémanenna a si Kristus si maai sa. Ampa'paan si Musa maarap in laasa iwéé oka i Amang Kasuruan ai sia.

²⁷ Ampa'paan im paémanenna, itela'una en Mesir ra'ica maindé' icae'bow i colano Mesir. Sia mawaya' melala'us makaséréke' an dior tanuoka makaséréo si Amang Kasuruan si ra'ica kaséréan itu.

²⁸ Ampa'paan im paémanenna, iru'du'na sé tou Israel mesic in enda' i domba ang konséng im papalen am balé éra wosama' sé toyaang luluna tuama éra ra'ica patén i malaékat im papaté. Wo in taniitu sia iméma'o in endo wangko' Paska[2] asi kumataré.

²⁹ Ampa'paan sé tou Israel awéan paémanen, séra lumewet in Ta'sic Réindang tanuoka malewet an tana' pera. Taan sé tou Mesir ituminep an ta'sic an tutuw éra ka'i imepé' lumewet.

³⁰ Ampa'paan sé tou Israel awéan em paémanen, e ri'dir mésél ing kota Yerikho rume'ba kekawus éra maya' lumi'cir ing kota itu pitu ngando eng kauré.

³¹Ampa'paan si Rahab si wéwéné sundal itu awéan paémanen, sia ra'ica mekiit pinaté kaputé é tou ang kotana sé ra'ica le'tek a si Amang Kasuruan, ampa'paan sinungkulna am baléna kerapi in elur sé mawere-weren é Israel.

³² Keliané' woo en icuaku ai camu, taan ra'io awes ka'i en témpo sa isisilku andumoro' sé Gideon, Barak, Simson, Yefta, Daud, Samuel wo sé nabi.

³³ Ampa'paan séra im baya awéan paémanen, akar awéan en icumala sé kakolanoan, awéan sé maperénta ang karapi ra'ica marapit, awéan sé makéré sapa si aijanjio i Casuruan, wo awéan ka'i sé kumetep im ba'ba' é singa,

³⁴ awéan sé me'del in api mengembu-ngembung si ra'io icakua, awéan sé pinarak in sa'bel taan icaséip. Awéan sé lembi maketero, wo awéan ka'i sé maketero am paperangan akar icumala sé suraro sé am banua walina owo.

³⁵ Ampa'paan sé wéwéné awéan paémanen, akar kinéréan éra sumawel sé tou am pamalé éra sé imatéo ampa'paan tinouo sumawel. Awéan ka'i sé tou tumerima im paokoien akar imaté, taan ra'ica kiim éra iwekar am paokoien wo ra'ica tumela'u im paémanen éra. Ampa'paan émanen éra sapaoka séra touen oka sumawel wo makéré ing katouan si lébé loorai.

³⁶ Awéan ka'i sé tou ipaséro' wo papasuten, wina'kes i ranté wo pakabuin.

³⁷ Séra winangkil im batu, ginorit wo sina'bel akar i maté. Séra manangké-nangkéi asalo mekarai ing kulit i domba kuma'pa kulit i mémbé', wo séra lengéi, wendu wo paoko-okoien.

³⁸Eng kayo'baan anio' ra'ica patus pengaento'an éra. Séra manangké-nangkéi an tana' kapayasan wo ang kuntu-kuntung, ang goa-goa wo am bo'bok am paawuun im batu-watu ing kuntung.

³⁹An tutuw éra im baya itu menonoué' séra maarui in até i Amang Kasuruan ampa'paan im paémanen éra, taan akar maté ra'ica kinéréan éra sapa si aijanji i Amang Kasuruan ai séra.

⁴⁰Ampa'paan si Amang Kasuruan mawasao in loor ra'ica asalo ing katoronaan éra taan ka'i katoronaanta sé menonou intarépé'. Aitantuo i Amang Kasuruan sapaoka an tutuw em paémanenta makaleke-lekepo, séra ka'i émaan oka i Amang Kasuruan makaleke-lekep.