Read Tontemboan Ibrani 3 Bible Online

Ibrani 3 - Tontemboan bible

Ibrani 3

¹Poo-poow, sé tinowa i Amang Kasuruan i menonou an sorga. Mayoo kita lébé makatuus si Yesus, si pengaakunta tanu Ruru'du'an i Amang Kasuruan wo Imam Wangko'.

² Sia le'tek mengaéma' in tawoien si aitantuo i Amang Kasuruan ai Sia, meputé ka'i wo si Musa indior le'tek mengaéma' in tawoienna tanu kikiiten é tou Israel.

³Taan si Yesus em patus pengasiriin ilumébé mai wo si Musa, puté si tou mawangun im balé, sia em patus pengasiriin wo taré si walé itu.

⁴Susur im balé awéan bas e mangun, taan si mangun im baya waya si Amang Kasuruan in esa.

⁵Si Musa tanu tou si maselewir, sia le'tek maéma' in tawoienna tanu kikiiten é tou Israel. Em pakaselewir i Musa itu mamuali tuus sapa sé icua oka i Amang Kasuruan ai cita sa.

⁶Taan si Kristus le'tek tanu Toyaang si makakawasa am balé i Amang Kasuruan. Wo icitao em balé-Na itu sa timboianta wutu-wutul em paémanenta wo em paarapen si pengatirayota.

⁷ Ampa'paano in itu, ta'néieno mangé sapa sé aicua i Roh Le'nas ang kitap Le'nas, “Asi endo anio', sa lingan iow en suara i Amang Kasuruan,

⁸tioo ipengaketé en até kaputé é apo-apo' miow, séra mengasundur wo mauji ing katalesenan-Ku ang karoro'an imawaya' an tana' kapayasan.”

⁹Icua i Amang Kasuruan “An tana' kapayasan sé apo-apo' miow imangepé' a Yaku mandé séra suméréo in tuu-tuus kakaya'kaan sé niéma'-Ku epat ngapulu' ngata'un eng kauréna.

¹⁰Siituo e mangémai séra ica'ebow-Ku keli, wo icua-Ku, ‘En até éra mengii-ngiitke' in lalan si mengasélé'kow. Séra ra'ica kiim kumiit in lalan-Ku.’

¹¹Ampa'paan in ituo séra icae'bow-Ku keli wo isumpa-Ku, ‘séra ra'ica toro muntep am paenaan-Ku e mena' mewali-wali wo Yaku.’ ”

¹²Anaé, é poo-poow, mareti-retio mangé oréoka awéan esaan ai camu makaaté in léwo' wo ra'io ka'i maéman, akar sia sumali'si' wo tumayang asi Amang Kasuruan si menonou.

¹³Taan aweso taré kamu mensin-sina'uan angé susur in endo, ang kauré ro'napé' patuulen ‘endo anio'’. Wo in taniitu ra'ica wana ai camu eng kumeté oka in até ampa'paan kinauwakan ing kamesé-meséaanna.

¹⁴Ampa'paan kita imeesao wo si Kristus, anaé timboienta sumama-sama' em paémanenta akar ing kaka'puan ing katouan, kaputé kita ing kataré-tarépé' maéman ai Sia.

¹⁵ En anio' tanu si aipatic ang Kitap Le'nas tana'i, “Asi endo anio', sa lingan iow en suara i Amang Kasuruan, tioo ipengaketé en até kaputé sé apo-apo' miow an tutuw éra masundur si Amang Kasuruan.”

¹⁶ Si séi séra sé ilumingao in suara i Amang Kasuruan, wo masundurke' Sia? Sérao im baya sé tou aiwali i Musa kumesot an tana' Mesir.

¹⁷Wo si séi sé tou icae'bow keli i Amang Kasuruan epat ngapulu' ta'un eng kauréna? Sérao sé tou iméma' ing kamesé-meséaan wo e mayat éra ra'io metu'tul an tana' kapayasan.

¹⁸Wo si séi séra sé aisumpa i Amang Kasuruan ra'ica toro muntep asi tampa pengaenaan e mena' mewali-wali wo Sia? Séra ituo sé tou sé ra'ica le'tek a si Casuruan.

¹⁹Intarépé' kaangéantao sapaoka sé apo-apo'ta indior ra'ica ro'na muntep asi tampa pengaenaan i Amang Kasuruan, ampa'paan séra ra'ica maéman ai Sia.