Read Tontemboan 1 Petrus 4 Bible Online

1 Petrus 4 - Tontemboan bible

1 Petrus 4

¹Ampa'paan si Yesus Kristus imendamo ing kawenduan an owak-Na, kamu ka'i musti kumeter in até miow wosama' kamu mawerot meputé im pakawerot i Kristus. Ampa'paan si tou imendamo ing kawenduan an owakna, tantu sia ra'io kiim ka'i méma' ing kamesé-meséaan.

²Anaé, eng kauré kamu menonou ang kayo'baan anio', pakéno en témpo si matela'u itu e méma' ing kasalé'an i Amang Kasuruan, ra'ica méma' ing kasalé'an é tou.

³Ampa'paan indior keliano en témpo pinaké miow mengéma-ngéma' sé ra'ica loor meputé im pengaémaan é tou sé ra'ica makatuus si Amang Kasuruan. An tutuw itu kamu menonou tanu sia'i: makiit ing kasalé'an in owak, kasalé'an maéma' in léwo', malangu-langu, maéma' ing kasalé-salé'an mengele-ngelep in elepen mengalangu, wo mengaapo' a sé opo-opo' si ra'ica toro émaan iow.

⁴Taan intarépé' kamu ra'io ka'i mengaéma' sé ra'ica loor tanu indior, akar sé tou ra'ica makatuus si Amang Kasuruan itu mangaya-ngaya'ka'. Ampa'paano in itu, kamu paroros éra.

⁵Taan panowaten éra oka a si Amang Kasuruan si tu'tulo makim pakasa in tou sé menonou wo sé tou imatéo.

⁶Ampa'paano in itu en Abar Kaaruien andumoro' i Yesus Kristus aipakua-kuao a sé tou imatéo, wosama' mandé en owak éra matéo meputé wo sé imamuali a sé pakasa in tou, taan ampa'paan i roh, séra ro'na menonou kumiit ing kasalé'an i Amang Kasuruan.

⁷En endo kaka'puan ing kayo'baan makatawio. Ampa'paano in itu, musti kawasan iow en owak asé kaléwo-léwo'an wo elur em bewerot wosama' kamu ro'na sumombayang.

⁸ Wo si kumataré-taré, kamu musti meupu-upusan. Ampa'paan sa kita meupu-upusan, ra'io ka'i kata'néianta eng kakeli ing kameséaan sé niéma' é tou walina ai cita.

⁹Wo wéano mio' tampa en loséran asi esa wo sé walina ang karapi in arui en até wo ra'ica mengi-ngimbulu.

¹⁰Kamu si esa wo si esa itumerimao ing kamang aitambér i Roh Le'nas, anaé musti pakén iow sumama-sama' eng kamang aitambér itu en sumelewir sé kakélé tou.

¹¹Sa awéan tou tumerima ing kamang aitambér i Roh Le'nas eng kumua in taar i Amang Kasuruan a sé tou, musti icuana en itu kumiit in taar i Amang Kasuruan. Wo sa awéan tou tumerima ing kamang aitambér i Roh Le'nas en tumawang sé tou, musti émaanna en itu maké ing kaketeran asi Amang Kasuruan owo. Anaé, pakén iow sumama-sama' eng kamang aitambér i Roh Le'nas ai camu esa wo si esa wosama' asé pakasa sé niéma'o miow itu, sé tou ro'na rumayo wo sumiri' si Amang Kasuruan, ampa'paano i Yesus Kristus. Si Amang Kasuruan itu makaanu i rarayo wo in sisiri' wo ing kakawasaan akar ing kauré-uré! Ulit.

¹²Poo-poow sé icaupusku! Kamu uli-ulit makéré ing kawenduan uter. Taan eng kawenduan itu, e muji im paémanen iow wosama' em paémanen iow itu makaketer. Anaé, tioo kamu mangaya'ka' wo maanggap waya camu e makéré ing kawenduan tanu siitu.

¹³Taan maaru-aruio mangé, ampa'paan kamu kumiito imendam ing kawenduan tanu si pinendamai i Kristus, wosama' an tutuw i Kristus maai sumawel ang karapi i rarayo wo in sisiri'-Na, kamu ro'na masalé-salé' wo maaru-arui.

¹⁴Pakakamangeno kamu, sa kamu iparoros é tou ampa'paan makiit si Kristus, ampa'paano e Roh i rarayo wo in sisiri'-Na ai camuo. Siituo si Roh i Amang Kasuruan.

¹⁵Tioo awéan esaan ai camu si musti okoien ampa'paan mapaté tou, marombit, maéma' in léwo' kuma'pa marambét in urusan é tou walina.

¹⁶Taan sa kamu okoien ampa'paan tou Krésten, kamu ra'ica toro malawi'. Aweso taré kamu rumayo wo sumiri' si Amang Kasuruan ampa'paan kamu patuulen makiit si Kristus.

¹⁷Ampa'paan intarépé' an témponao pakasa in tou akimen i Amang Kasuruan wo eng kataré akimen-Na, sé tou-Na in esa. Wo sa kita sé tou-Na eng kataré akimen-Na, tambisa réén e mamuali sa a sé tou sé ra'ica maéman in Abar Kaaruien-Na?

¹⁸ Ang Kitap Le'nas aipatic in tana'i, “Sé tou maéman sé mengéma-ngéma' im butul musti mawendu owo, kumawus in itu séra ro'na makéré ing katouan akar ing kauré-uré. Sa taniitu, tambisa e mamuali oka a sé tou sé ra'ica maéman a si Casuruan, wo sé tou iméma' ing kamesé-meséaan?”

¹⁹Wo in taniitu, sa awéan tou niokoi ampa'paan en itu kasalé'- an i Casuruan, sia musti mengéma-ngéma' im butul wo sumarakan in owakna a si Casuruan si méma' sia. Sia ro'na papercayan ampa'paan Sia mengema-ngéma' sapa si aijanji-Na.