Read Tontemboan 2 Yohanes 1 Bible Online

2 Yohanes 1 - Tontemboan bible

2 Yohanes 1

¹En surat anio' a yaku owo si penatua an jamaat. Ipaticku en surat anio' a si inang si sinisir i Amang Kasuruan, wo ka'i a sé toyaang i inang sé icaupusku kumiit in sususuien wutul i Amang Kasuruan. Wo ra'ica yakuke' e mengaupus icamu, taan pakasa in tou sé makailek in sususuien wutul mengaupus camu.

²Icaupus ami kamu ampa'paan en sususuien wutul itu an atétao wo en sususuien itu kasake' ai cita akar ing kauré-uré.

³Pangilekenku a si Amang Kasuruan Amangta wo a si Yesus Kristus Toyaang i Amang wosama' tumambérai in upus wo tumuru' ing kaupusan wo ing kaeluran ai cita sé makiit in sususuien wutul wo sé me- upu-upusan.

⁴Yaku arui keli ampa'paan kinailekankuo sapaoka awéané' sé toyaang i inang e menonou makiit in sususuien wutul, meputé wo si aiperénta i Amang ai cita.

⁵ Wo intarépé' pangilekenku a si inang wosama' icita im baya meupu-upusan. Em pinangilekku anio' ra'ica perénta weru, taan perénta anio' ai citao tumo'tolai asi kataré-taré an tutuw kita werupé' maéman.

⁶Wo asi kataré-taré liningao miow em perénta i Amang Kasuruan sapaoka kita musti menonou meupu-upusan. Sa kita menonou meupu-upusan, niéma'tao em perénta-perénta-Na itu.

⁷Kelio tou sé mengasélé'kow imapaturu'o wo isumeraro ang kayo'baan anio'. Séra itu ra'ica kiim mangaku sapaoka si Yesus Kristus imayo ang kayo'baan tanu in tou. Sérao sé mengauwak wo kaséké' i Kristus.

⁸Téiran iow sumama-sama' em paémanen si aisusuio ami wosama' ra'ica icatala. Wo in taniitu ro'na kéréan iow waya en laasa miow.

⁹Si tou ra'io ka'i makiit in sususuien i Kristus wo makiit oka in sususuien walina, sia itu ra'ica makaanu si Amang Kasuruan. Taan si tou makiit in sususuien i Kristus, sia itu makaanu si Amang wo ka'i si Toyaang.

¹⁰Sa awéan tou maai ai camu wo kumua in sususuien si ra'ica meputé wo in sususuien i Kristus, tioo teriman iow sia am balé miow kuma'pa sumiri' sia.

¹¹Ampa'paan si séike' en tumerima si tou itu wo méé in siri', sia itu iméma'o in léwo' meputé wo si niéma' i tou itu.

¹²Keliané' woo em paticku ai camu, taan aweso taré ra'ica an surat. Em paarapenku maai oka meta'up wo icamu wo mepaar ang karapi miow. Wo in taniitu en atéta wutu-wutul arui.

¹³Toya-toyaang i poow wéwéné i inang sé sinisir i Amang Kasuruan am bia'i, séra méé ka'i mai in siri' a si inang.