Read Tontemboan Wahyu 10 Bible Online

Wahyu 10 - Tontemboan bible

Wahyu 10

¹Wo sérénku si esa malaékat walina si kumete-keter tumumpa mai an sorga owo. En owakna pakasaputen ing kambung, wo awéan limbawa an dangka' in do'kosna. Eng giona tanuoka si yéndo wo eng kécéina tanuoka totombol in api.

²Eng kamana makatimboi ing gulungan kitap teké' si makawuka'. Eng kécéi kakanna am bawo in ta'sic wo eng kécéi ka'birina am bawo ing katanaan.

³Wo sia kumua ang karapi in taangko' tanu si singa mengauwang. Kekawusna imangko', sé pitu erut mapalinga in suara éra.

⁴Makanuwu' mai sé pitu erut itu, casalé'ku woo e matic sapa sé pinali- ngaku. Taan kalingaanku en suara an sorga icumua in tana'i, “Ségélen owo sapa en aicua é pitu erut itu wo ra'ipé' toro ipaticmu.”

⁵ Wo si malaékat sinéréku makatulung am bawo in ta'sic wo am bawo ing katanaan, sia mangkai ing kama kakan maturu' an langit,

⁶wo sumumpa ai Sia si menonou akar ing kauré- uré, si méma' in langit wo pakasa sé an untepna, in tana' wo pakasa sé an untepna, in ta'sic wo pakasa sé an untepna. Icua i malaékat itu in tana'i, “En témpona ra'io ka'i pelando-landoi!

⁷An tutuw i malaékat kapitu sumengo in terompétna, asi témpo ituo si Amang Kasuruan lumekep im pawasa-wasan sé ipakaenep-Napé' tanu sé sumangkumo aicua-Na a sé ata-Na, sérao sé nabi.”

⁸ Wo en suara si liningakuo an langit itu icumua ka'i a yaku, “Mangéo indon eng gulungan kitap si makawuka' ang kama i malaékat si makatulung am bawo in ta'sic wo am bawo ing katanaan itu.”

⁹Wo aku mangé a si malaékat itu, mekiupus ai sia wosama' iwééna a yaku eng gulungan ing kitap itu. Wo icuana a yaku, “Indono wo kaneno. Eng gulungan itu méma' oka im pootmu mananam pentu', taan am ba'ba'mu eng gulungan itu mananam tombal tanu im biluk.”

¹⁰Wo indonku eng gulungan kitap ang kama i malaékat itu, wo kanenku. Am ba'ba'ku eng gulungan itu mananam tombal tanu im biluk taan kelo'motku mako, an untep im poot kananaman pentu'.

¹¹Kekawus in itu, awéan en cumua a yaku, “Musti icuamu ka'i sumawel e nunuwuun i Amang Kasuruan andumoro' in sapa sé mamuali oka a sé kelian bangsa, negara, nunuwu' wo ka'i a sé kolano.”