Read Tontemboan Wahyu 11 Bible Online

Wahyu 11 - Tontemboan bible

Wahyu 11

¹ Kekawus in itu awéan e méé a yaku sangapokol kayu tanuoka weka' pengaukur wo aku pinerénta in tana'i, “Tumooro wo mangéo ukuren em Balé Le'nas wo em pawetaan i raragés, wo rékéneno ka'i pira eng kakeli é tou maapo' am bitu.

² Taan tioo peuku-ukurenmu eng kintal si ang kesot im Balé Le'nas, iwayao mio' en itu ampa'paan eng kintal itu aiwééo a sé bangsa walina. Wo ipeléa-léak oka éra eng Kota Le'nas[2] epat ngapulu' rua ngaserap eng kauréna.

³Wéan-Ku oka kawasa a sé rua sairi-Ku e mangé kumua i nunuwuun-Ku ang karapi ing kumarai ing karai mala'lu eng kauréna sangariwu rua ngaatus enem ngapulu' ngando.”

⁴ Sé rua sairi itu aipeputé wo sé rua tuura in zaitun wo sé rua totombol patuliran in sosoloan, sé makatulung an dior i Casuruan si makatimboi ing kawasa am pakasa ing kayo'baan.

⁵Wo sa awéan e méma' séra icawangkur, am ba'ba' éra kumesot api en tumunu pakasa sé kaséké' éra itu. Sé tou e méma' iséra icawangkur, musti maté ang karapi i mulur tanu siitu.

⁶ Wo séra in dua awéan kawasa en lumémpen in langit wosama' ra'ica muran ang karoro'an éra makua i nunuwuun i Amang Kasuruan. Séra awéan kawasa ka'i méma' im palemboian in dano mamuali enda', wo kawasa e méma' pakasa ing kawangkuran ang kayo'baan, kawisake' en itu icasalé' éra émaan.

⁷ Sa séra icumawuso méé ing kasairian, kumesoto mai ang kepal im papaté si binatang luméwo-léwo'. Sia mai oka sumerang iséra, kumala wo maté iséra.

⁸ Wo e mayat éra ipakawaya oka an lalan ing kota wangker. Ang kota ituo si Casuruan éra aisalip. Ampa'paan ing kaléwo'an é tou, eng kota itu ro'na ipeputé tanu in Sodom kuma'pa Mesir.

⁹Sé tou asé im pakasa im bangsa, in suku, i nunuwu' wo i negara suméré oka i mayat éra eng kauréna tiga ari sténga. Wo ra'ica iwéé éra e mayat itu cubur.

¹⁰Pakasa in tou sé maento' ang kayo'baan maarui oka ampa'paan im pinatéan é rua nabi itu. Séra mésta oka wo mensan-sawelan ing kadow, ampa'paan sé rua nabi ituo akar sé tou maento' ang kayo'baan makéré in okoi.

¹¹ Taan kumawusai in tiga ari sténga, sé rua nabi itu winéano i Amang Kasuruan aseng ing katouan wo séra tumou sumawel. Wo pakasa sé tou sé suméré séra maindé' keli.

¹² Wo sé rua nabi itu luminga awéan suara taangko' an sorga makua ai séra in dua, “Sumosoro mai am bia'i!” Wo séra in dua icaangkai angé an sorga pakasaputen ing kambung, pakasérén waya é kaséké' éra.

¹³ An tutuw ituke' mangéroo mai repet. Sangapepulu' ing kota itu materi, wo pitu ngariwu tou imaté ampa'paan im pangéro' itu. Wo sé tou walina maindé' keli, wo séra rumayo wo sumiri' si Amang Kasuruan an sorga.

¹⁴Wo in taniitu si kawangkuran karua ilumangkoio. Wo séréno! Eng kawangkuran katelu ra'io uré ka'i maai.

¹⁵ Wo si malaékat kapitu sumengo in terompét, wo awéan suara si maangko' an untep in sorga makua, “Eng kakolanoan ing kayo'baan mamualio Kakolanoan i Casuruanta wo Kakolanoan i Kristus. Sia merénta oka akar ing kauré-uré.”

¹⁶Wo sé rua ngapulu' epat matu'a sé makalukut am palukutan pasiri-siriin éra an dior i Amang Kasuruan kumundu wo kumuru en sumiri' a si Amang Kasuruan.

¹⁷Icua éra, “Icua ami imakapulu'sama' ai Co Amang Kasuruan si Makakawasa, si awéano indior akar intarépé', ampa'paan Ico makéo ing kawasa wangko' wo tumo'tolo maperénta tanu Kolano.

¹⁸ Wo pakasa im bangsa mae'bowo, taan an témponao Ko tumuru' in e'bow-Mu wo makim sé tou imatéo. Si anioo en témpona e méé in laasa a sé ata-Mu, sérao sé nabi, wo pakasa sé tou le'nas, wo sé tou sé maindé' i ngaran-Mu, sé tou sé ra'ica pengasiriin kuma'pa sé tou pengasiriin. Si anioo en témpona ka'i e maté sé tou en luméwo' ing kayo'baan.”

¹⁹ Kekawus in itu, mawuka'o mai em Balé Le'nas i Amang Kasuruan an sorga, wo kaséréano em piti im perjanjian-Na an untep im Balé Le'nas itu. Wo mamuali mai eng kilat wo en téngéna in erut wo em pangéro' wo en uran éis repet keli.