Read Tontemboan Wahyu 14 Bible Online

Wahyu 14 - Tontemboan bible

Wahyu 14

¹ Kekawus ako in itu, kaséréanku si Toyaang i Domba makatulung an tolaina Sion wo awéan sangaatus epat ngapulu' epat ngariwu tou mewali-wali wo Sia. An tuintung é tou itu pinatican i ngaran i Toyaang i Domba wo ngaran i Amang-Na.

²Wo linganku awéan suara an langit. En suara itu taangko' kaputé in eras in dano an tekaan wangker wo tanuoka erut taténgé keli. En suara liningaku itu tanu in téngéna ing kecapi i paténgé' é tou.

³An dior im palukutan pasiri-siriin wo an dior é epat mahluk wo sé matu'a itu, sé sangaatus epat ngapulu' epat ngariwu tou makantar esa kakantaren weru. Ra'ica wana esaan tou ka'i e ro'na majar ing kakantaren itu, aluar iséra. Séra ituo sé tou sé tinu'buso i Amang Kasuruan ang kayo'baan anio'.

⁴Séra itu sé tou menonou le'nas, tanuoka sé tuama si ra'ipé' kawisa tumekel ang karapi é wéwéné ampa'paan séra miara ing kale'nasan. Sé tou itu uli-ulit makiit si Toyaang i Domba am bisa-wisake' en angéan-Na. Séra itu sé tinu'buso an uner é tou e mamuali raragés kataré a si Amang Kasuruan wo a si Toyaang i Domba.

⁵ Wo séra ra'ica kawisa tumowo, wo ra'ica wana e ro'na méé kaséaan.

⁶Wo kaséréanku si esa malaékat walina ituméléw rumangka-rangka' an langit. Sia itu maali-ali in Abar Kaaruien si akar ing kauré-uré torona icua a sé tou sé maénto' ang kayo'baan. Séra ituo sé pakasa im bangsa, in suku, i nunuwu' wo i negara.

⁷Si malaékat itu kumua in taangko', “Maindé'o mangé a si Amang Kasuruan, irayoo wo siriino mangé Sia! Ampa'paan an témponao Sia maai makim pakasa sé tou. Apoono mangé Sia si méma' in langit wo in tana', in ta'sic wo im pakasa em palemboian in dano!”

⁸ An tutuw i malaékat kataré imangém, mai ka'i si malaékat karua. Wo icuana, “Imaterio, imaterio eng kota Babel si wangker itu! Ampa'paan pakasa im bangsa ang kayo'baan linanguo é tou Babel ampa'paan i melep in anggor kanajisanna.”

⁹Kekawus in itu, mai ka'i si esa malaékat walina. Sia itu malaékat katelu, wo sia kumua in taangko', “Si séi e maapo' a si binatang kataré wo im patongna itu, wo tumerima in tuus an tuintung kuma'pa ang kamana,

¹⁰ elepenna oka en anggor i Amang Kasuruan, siituo en anggor kae'bowan-Na si aituas an untep in paelepan kae'bowan-Na. Wo sia okoien oka in api wo im balélang an dior é malaékat le'nas wo an dior i Toyaang i Domba.

¹¹ Wo en tembur in api e mokoi iséra itu memulu-mulut akar ing kauré-uré, wo séra pengoko-ngokoien endo wo em bengi. Séra ituo sé tou makuru en sumiri' si binatang wo im patongna itu wo sé itumerima in tuus i ngaranna.”

¹²Em penting am bia'i sé tou le'nas musti talesen mandé ka'i meta'up in okoi, sérao sé makiit im perénta-perénta-Na wo mauli-ulit maéman a si Yesus.

¹³Wo kalingaanku en suara an sorga icumua, “Ipatico en anio': Tumo'tol intarépé' pakakamangen sé tou sé le'tek makiit si Apo' Yesus akar imaté.” Wo e Roh i Amang Kasuruan in esa en cumua in tana'i, “Ulit, séra ro'na mena' asi pinala'lé-la'léan éra wo teriman éra oka en laasa asé im pakasa sé pinengaéma éra.”

¹⁴ Kekawus in itu kaséréanku esa kambung kulo' wo am bawo ing kambung itu awéan esa tou makalukut. Sia itu tanuoka si Toyaang i Tou. En do'kos-Na pinakéan i mahkota mas, wo eng kama-Na makatimboi esa pagi' telew.

¹⁵ Wo awéan malaékat walina kumesotai am Balé Le'nas. Wo sia mangko' ai Sia si makalukut am bawo ing kambung itu, “Iwayongo mio' em pagi'-Mu itu wo upuuno, ampa'paan en upuun ang kayo'baan wowoso, wo an orasnao in upuun.”

¹⁶Wo Sia si makalukut am bawo ing kambung mayong im pagi'-Na itu am bawo ing kayo'baan wo eng kayo'baan ka'i paupuuno.

¹⁷Kekawus in itu awéan ka'i esa malaékat walina kumesotai am Balé Le'nas si an sorga. Sia ka'i makatimboi esa pagi' telew.

¹⁸Wo awéan esa malaékat walina ka'i cumesotai am pawetaan i raragés. Si malaékat itu kumawasa in api. Wo sia mangko' a si malaékat si makatimboi im pagi' telew paupu', “Iwayongo mio' em pagi' telewmu itu wo upuuno sé wua-wua'na in anggor ang kayo'baan, ampa'paan em bua-wua'na itu wowoso.”

¹⁹Kekawus in itu iwayong i malaékat itu em pagi' paupu'na ang kayo'baan, wo upuunna sé wua'na in anggor itu, wo iténdélna sé wua'na itu am patepesan wangker. Si patepesan ituo eng kae'bowan i Amang Kasuruan.

²⁰ Sé wua'na in anggor itu tinepes ang kesot ing kota. Wo asi patepesan itu maroyong en enda' tanuoka royongan eng kararemna rua méter wo eng kalambotna telu ngaatus kilométer.[4]