Read Tontemboan Wahyu 17 Bible Online

Wahyu 17 - Tontemboan bible

Wahyu 17

¹ Kekawus in itu mai a yaku esaan asé pitu malaékat maali-ali im pitu paelepan, wo icuana, “Mayoo am bia'i, ituru'ku oka ai co en ukuman a si wéwéné sumunda-sundal itu. Sia makalukut an tampa keli rano.

² Sé kolano ang kayo'baan sumundalo ang karapina, wo sé tou ang kayo'baan linanguo in anggor kanajisanna.”

³ Kekawus in itu, yaku kinawasa i Roh i Amang Kasuruan wo aku uwiten angé i malaékat an tana' kapayasan. A mangé mbitu, kaséréanku si esa wéwéné makalukut an licur i esa binatang réindang matu'a. An owakna pinatican i ngara-ngaran ipaojat a si Amang Kasuruan. Si binatang itu makaro'kos pitu wo makasungé sangapulu'.

⁴Si wéwéné itu mekarai ing karai pares wo kaéng réindang wo pinerong i mas, im permata wo i mutiara. Eng kamana makatimboi im paelepan mas wuta sé andumoro' in léwo' wo sé karican asi kanajisanna.

⁵An tuintungna pinatican esa ngaran eng kaangéanna ayenepé'. En aipatic tana'i, “Yaku si Babel wangker, inang im pakasa é wéwéné sundal, palemboian im pakasa é léwo' ang kayo'baan.”

⁶Wo sérénku si wéwéné itu malanguo ampa'paan i melep in enda' é tou le'nas wo in enda' é sairi-sairi i Yesus. Keséréku isia, yaku mangaya-ngaya'ka'.

⁷Wo icua i malaékat a yaku, “Kéitu réén ko mangaya-ngaya'ka'? Isisilku oka ai co eng kaangéanna sé aicaenepé' andumoro' i wéwéné wo si binatang pakasakéanna si binatang pitu en do'kos wo sangapulu' en sungé.”

⁸ Si binatang si sinérému itu, indior awéan taan intarépé' ra'io wana. Wo sia mapaturu' oka ang kepal im papaté wo sia maangém am papaté. Sé tou i menonou ang kayo'baan e ngaran éra ra'ica aipatic an untep ing kitap ing katouan tumo'tolai eng kayo'baan anio' niéma', séra mangaya-ngaya'ka' oka an tutuw suméré si binatang itu, ampa'paan si binatang itu indior awéan taan intarépé' ra'io wana, taan mapaturu' oka sumawel.

⁹Em penting am bia'i musti pakénta eng kapinteran asi Amang Kasuruan owo wosama' ro'na kaangéanta andumoro' in sapa eng kaangéan é pitu ro'kos i binatang itu. Sé pitu ro'kos ituo sé pitu kuntung, am bawo é kuntung itu pengalukutan i wéwéné itu,

¹⁰wo sé pitu ro'kos ituo ka'i sé pitu kolano. Lima asé kolano itu imatéo. Wo si esa ang karoro'ané' imaperénta wo si esa ka'i ra'ipé' mai. Sa sia maai ra'ica talos uré e merénta.

¹¹Si binatang itu indior awéano taan intarépé' ra'io wana, sia in esao si kolano kawalu. Sia esaan asé pitu kolano itu ka'i wo sia maangém am papaté.

¹² Sé sangapulu' sungé sé sinérému itu, sérao sé sangapulu' kolano. Séra itu ra'ipé' maperénta, taan séra makéré oka kawasa merénta tanu kolano wayake' in esa jam mewali-wali wo si binatang itu.

¹³Sé sangapulu' kolano itu meesa en até e méé ing kaketeran wo ing kawasa éra a si binatang itu.

¹⁴Séra merang oka en sumundur si Toyaang i Domba, taan si Toyaang i Domba ra'- ica kinakalaan éra, ampa'paan Sia Tuang am pakasa é tuang, wo Kolano am pakasa é kolano. Si Toyaang i Domba itu mewali-wali wo sé tou sé tinowao, sé sinisiro wo sé le'tek ai Sia, muntung oka.

¹⁵Wo icua ka'i i malaékat itu a yaku, “Pakasa en dano sé sinérémuo si pakalukutan i wéwéné sundal itu, siituo sé tou, sé reru' é tou keli, sé bangsa, wo sé nunuwu'.”

¹⁶Wo sé sangapulu' sungé sé sinérému wo si binatang itu, masuut oka asi wéwéné sundal itu. Wo andéten éra eng kasiyaanna itu wo tangkolan éra. Wo kanen éra en sama'nana wo tunun éra in api.

¹⁷Ampa'paan si Amang Kasuruan matawoi an até éra wosama' émaan éra sapa en icasalé'-Na. Ampa'paan in ituo séra meesa e méé ing kawasa éra a si binatang itu, akar linekepo waya sé aicua-Na.

¹⁸Si wéwéné sinérému itu, siituo si kota wangker si maperénta sé kolano ang kayo'baan.